RUTI 2
2
Ka Ruti ki tagara i mu ni koni iana o Boasi
1Na goana ka Naomi ka no Boasi. Ngaia ki na mane ruruguha ma ki raha tangara na enoni. Ngaia ki na raraha iana o Elemeleki o vaniana ka Naomi. 2I ta na tangiana ka Ruti ki vi tanga ka Naomi, ki vi: “Gu nakê be râ i mu ni koni ma be ruguni na guani, ga pu bera renigi na mane ga retegi. Inê kê girara gê tarahua ta na enoni, i hagamarumungeniê, kê tagara vikana.”
Ka Naomi ki arami, ki vi: “Kareku, i koro ma gu râ.”
3Hoita, ka Ruti ki râ i mu ni koni ma ki ruguni na koni igê na bogona na mu ga bani rete igê na enoni tagara. Ngaia ki ruguni koni ga pu bera renigi. Ngaia ki babarisi, suria ngaia ki na mu iana o Boasi.
4Rârâ i hemuri ma o Boasi ki ata me tenia i Beteleheme. Ngaia ki tarahura na enoni tagara ma ki vi tangara, ki vi: “Na Araha ke ngahisigamu!”
Ngaira ka arami, ka vi: “Na Araha ke korokoro tangago!”
5O Boasi ki hagatea na mane i bâsurira na enoni tagara, ki vi: “Ti ka na kere gete ikana? Na gete iana o ti nge?”
6Na mane ki arami, ki vi: “Ngaia ka na gete na mahuara ngekana, i râ me henia ka Naomi tenia i Moaba. 7Ngaia ki nungiê, hanana vigê hagamarumungenia ki ruguni na koni igê na bogona na mu, ga bani retegi igê na enoni tagara. Ngaia ki bani tagara me igê na mavorarotagana rârâ ma kani kahu mamaro sisite i ngekê igê na mamaru.”
8Hoi, o Boasi ki vi tanga ka Ruti, ki vi: “Gu rongo. Go ruguni ma i mu iaku. 9Gu tagara henira na gete tagara ikê. Go gâga henira ma kamu tage ruguni i murita na enoni ga reterete koni. Inê kê bani bonasira na mane tagara iaku, hanana vi siana ka katoa tangago ta na tarana i era. Matena go pasi tono, i koro ma ko arâ ma ko totono igê na pi na hê, ga bani hagavunusigi renia na ve.”
10Ka Ruti ki tube so i ano ma ki hagatea o Boasi, ki vi: “Tanu hega kanigo anumasiê vikana? Tanu hega kanigo koro ngavê tangê? Na mahuara ma kani inê!
11O Boasi ki arami, ki vi: “Inê kê bani giraragi na tauhamu tanga ka hungâmu i murina i me o vaniamu. Inê kê bani girara, vi igo ko panirerua o vaemamu ma kenamu ma ko pania i pasimu, ma ko oga i berarogata na enoni, go pe bani girarara me i nago. 12Na Araha ke vurigo bâkoro renigi na tauhamu. Na Araha God iata na Isiraelita ke vurigo raha ngavê, suria go ruku i pasina!”
13Ka Ruti ki arami, ki vi: “Araha, igo ko koro ngavê tangê. Igo ko hagakoro obaku, suria go tamasi bâkoro tangê. Vikana, henaka inê kê pe maratorata na kariamu, suria inê kani i murita ma.”
14Igê na matena ni ngêra o Boasi ki vi tanga ka Ruti, ki vi: “Râ me ke ngê. Gu anumia na bereti igê na apira.” Vikê ka Ruti ki oga so henira na enoni tagara. O Boasi ki vatea na koni ga bani hanua. Ka Ruti ki ngê masu ma tani na ngêra ki hita râ. 15Matena ka Ruti ki râ nikâ, hanana vi ruguni na koni, o Boasi ki bonasira na enoni tagara, ki vi: “Mu naka vê ki ruguni na koni igê nikâ na agua ka tâtâ igê na ehogoni na koni, ma siana kamu vivi pusia. 16Mu okegi nikâ tani na bêni na koni tenigi na ehogoni ma kamu nakagi so tanga ki ruguni.”
17Hoi ka Ruti ki ruguni rârâ na koni ma ki manurahi. Matena i ruguni na koni ngaia ki tarahua na 30 kilo. 18Ngaia ki migiaporo na koni i hinua ma ki hagabâsia ka hungâna renigi, vi gi hita kani ruguni. Ngaia ki vatea nikâ renigi na ngêra ga hita, matena i ngê. 19Ka Naomi ki hagatea, ki vi: “I he kanigo ruguni igê na koni ngegê i ngekê? I rako ngavê! O ti ka na mu iana go ruguni igê? God ke korokoro tanga na mane i takuigo!”
Vikê ka Ruti ki hagarongoa ka Naomi, vi ngaia ki ruguni na koni i mu iana na mane ga hêtana vi o Boasi.
20Ka Naomi ki vi: “Na Araha ke korokoro tanga o Boasi! Na Araha ki hagamonarigi tare na suruha iana tangara na ani ga mauri ma na ani ga me. Na mane ngekana ki na raraha i hagarangigia. Ngaia ka na hitangita na ani i tuguhira viga anumasigia.”
21Ka Ruti ki vi: “Ta na marâ i koro ngavê kani visia tangê. Ngaia ki nakê kê ruguni na koni henira na enoni tagara mataro me ki hato na mu hagenani.”
22Ka Naomi ki vi tanga ka Ruti, ki vi: “I monari, kareku. I koro, kanigo tagara henira na gete, ga tagara i mu iana o Boasi, suria manga vigu tagara i mu iana ta na mane getea, vari ngaia ke katoa ta na tarana i pe oto tangago.” 23Vikê ka Ruti ki tagara henira na gete i mu iana o Boasi. Ngaia ki ruguni rârâ mataro me ki hato na mu. Ngaia ki ama ni oga nga henia ka hungâna.
Currently Selected:
RUTI 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific