RANGANIHA 1
1
1I rarona na buka ikê ka oga igê na marâ, i ranganigi o Jesu Kirisito. God ki bani hagagirara renigi na marâ ngegana, hanana vi ngaia ki hagarongora na kariana God renigi na marâ nga, ga sugi voravora me. O Kirisito ki bani hagagirara o Joane, na kariana, renigi na marâ ngegana, suria ngaia ki hagatorangenia na angero tanga. 2Mo Joane ki bani hagarongo mataha renigi na marâ, i bani bâsigi. Ikê nga na tamasinga iana renia na taroha tenia God, ma renia na monariha, i rangania o Jesu Kirisito. 3I babarisi na enoni, i tomania na buka ikê, ma ka babarisi na enoni, ga rongoa na taroha igê na tamasinga poropete ngekê, ma ka arâ surigi na marâ i rarona na buka ngekê. Suria na marâ hato ngegana ka sugia ma, vi ge voravora me.
O Joane ki sege tangara na haku gi pi na enoni ga tongesuri
4Inê ki no Joane. Inê kê segesege tangagamu na haku gi pi na enoni mu tongesuri, mu oga i na apanena i Asia.
Inê kê nunginungi, hanana ga tarahugamu na koroha ma na marapeha tenia God, i gâga i ngekê, i bani oga me i nago, ma ki page arâ me, ma tenira na higona gi pi, ga oga i maana na atohana, 5ma tenia o Jesu Kirisito o Karena, i tamasi monari tare, ma ki hagenago ki mauri aporo tenira na enoni, ga me, ma ki marungira nikâ na araha hato ni maveta.
O Jesu Kirisito ki takuigia, ma renia na mera iana ngaia ki rupasigia tenigi na tasi iaka, 6ma ki katogia, ka vora re na hakuta raha na enoni ni vogasiha, hanana ga tagara tanga God Vaemana. Ge visia raha, ma ke kasia akê o Jesu Kirisito na Araha, i teha tare ma tarema! Monari.
7Bâ, ngaia ki page arâ me igê na vaha! Na enoni hato ka page bâsia, ma henira kani ngaira nikâ na enoni, ga bani takea renia na ora. Na ara ni enoni hato i maveta ka page angiangi maramara renia. Ua, i monari!
8Na Araha God raramohaga hunia, i gâga i ngekê, i bani oga me i nago, ma ki page arâ me, ngaia ki vi, “Inê ka na Alapa ma na Omega,” i vi, vi “Inê ka na Haganegana ma na Hagahatongina.”
O Joane ki bâsia o Kirisito
9Inê o Joane, na goami igê na tongesuriha. Ma suria igia ka na kariana o Kirisito, inê megamu, ka tage piringiape igê na mamasiaganiha, i tarahura na enoni, ga oga igê na Arahanga iana. Ngaira ka bani paiê, ma ka kasiê igê na marê i Patemosi, suria inê kê tarohenigi na tamasinga iana God ma na monariha, i rangania o Jesu. 10Igê na tangiana iana na Araha na Higona Apu ki angariê, ma i muriku inê kê rongoa na ringena raha, i rongo raha manga na ahuri. 11Na ringena i vi: “Gu segegi so i na buka na marâ, go bâsigi, ma ko hagatorangenia râ tangara na haku gi pi na enoni, ga tongesuri: tanga na ani i Epeso, tanga na ani i Simirina, tanga na ani i Peregamo, tanga na ani i Tiatira, tanga na ani i Satisi, tanga na ani i Pilatelepia, ma tanga na ani i Laotisea.”
12Inê kê aharo aporo, hanana vi gê bâsia, vi o ti kini tamasi tangê, ma kê bâsigi na ani gi pi na laiti na golo igê na atohani. 13Ma i berarogani ki ura igê ta na marâ, i bâ manga na enoni, i tuguni renia na tuguni borahu, i so tare i êgana, ma ki susube renia na golo. 14Na varehuna ki siki manga na varehuna na sipi, ma ki siki ahuru ngavê, ma na maana karu togatoga manga na gi. 15Na êgana karu togatoga manga na barasi, ga bani hagaronoa hato, ma ka taruhia bâkoro. Ma na ringena ki rongo raha manga na apena na bagabêrugu raha. 16Ngaia ki têgi na higu gi pi i rimana i otona, ma tenia na harana ki hura me igê na tatapa, i masi heri. Na maana ki mave manga na arito igê na ritovagana.
17Matena gê bâsia, inê kê apuri i maana manga na enoni, i bagamane. Ngaia ki hatariê renia na rimana i otona, ma ki vi: “Siana ko magu. Inê ki na ani, gê hagenago ma kê hagemuri. 18Inê ki na ani, gê mauri. I nago inê kê bani me, ma ku bâ, i ngekê inê kê mauri tare ma tare ma. Inê kê marungirerua na mera ma na agua ga oga igê na enoni, ga bani me. 19Tahema gu segegi so na marâ, go bâsigi, na ani, ga oga i ngekê, ma na ani, ga page voravora me i muri me. 20Na higu gi pi, go bâsigi i rimaku i otoku, ma na ani gi pi na laiti na golo igê na atohani ka tonga na girarani, ga gâga pinihi mênga. Ngaigi ki manga ikê: na higu gi pi ka na angelo iata na haku gi pi na enoni, ga tongesuri, ma na ani gi pi na laiti igê na atohani ka na haku gi pi na enoni, ga tongesuri.
Currently Selected:
RANGANIHA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific