NAHUMI 2
2
I Nineve ki vota
1Nineve, ga taharigamu!
Na merongami ka ata me.
Ngaira ka page sugarigamu.
Anumasigi na para ni hinua ma na tara!
Nanê na me!
2Na Araha ki sugi vatea aporo
na arahanga tangara na Isiraelita.
Na arahanga ga nahunia i nago,
matena na merongata ka mamêngara vige erasira,
manga na roga raha i erasia na mu.
3Nineve, na bêata na merongami ka memera.
Na tuguni iata ka rotorotoaga memera.
Ngaira ka tehe tanga na hearihatana.
Na kati ni me ka togatoga manga na gi.
Na hosi iata ka bâ râha.
4Na kati ni me ka gaha i tara,
ka hetaratarari
igê na mahera na hinua raha.
Ngaira ka togatoga manga na ahame
ma ka sisiki manga na marangea.
5Na maneraha ni me ka hoe nika.
Ngaira ka ura sugusugu renira.
Ngaira ka gaha tanga na para ni hinua.
Ngaira ka gurua na papa,
i tâ pusira na mane ni me,
ga tahakurua na para
renia na heariha.
6Na maani para, ga maatia na ve,
ka para ma, ma ka tahataha.
Igê na ruma raha iana na maneraha
na enoni ka bubununuga
ma ka sugare bê aporo.
7Na hinua raha ka parênia
ma ka henahuraura na enoni igê.
Na gete ka mumu manga na kuê
ma ka hatarigi na matota,
suria ga ape ruruhi.
8Na enoni ka ogohe tenia i Nineve
manga na nonganonga ga tangahia.
Na uniha ki vivi: “Aporo me! Aporo me!”
Ma ki mareha ngavê na hitangita,
vige aharo me.
9Na mane ni me ka ngere, ka vi:
“Hanago na siliva!
Hanago na golo!”
Na hinua ki aharêsia na ruruguha.
10I Nineve ki aruhuruhu,
Ki hihiruga
ma ki mamangu raha.
Ga tatata na buniata na enoni.
Ka gisigisi na êgata
ma ka kuku na maata.
11I Nineve i he?
Ngaia ki manga na tâtâ iata na laione,
na agua ga hagangêra igê na kareta,
ma ka rukuruku igê na laione,
na ani mane ma na ani hehene
ma na kareterua.
12Na laione mane i gagarihira na ganiani,
ki ngasira ki torera
tangara na laione hehene ma na kareterua.
Igê na tâtâ iana ki rurugi igê na ganiani.
13Na Araha ki tamasi tanga na maneraha,
i marungia i Nineve, ki vi:
“Bâ, inê na merongamu.
Inê be sungigi na kati ni me iamu.
Inê be hagamesira na mane ni me iamu.
Naka ngaira ka ramo manga na laione,
inê be tavogi râ tenigo na ara ni marâ hato,
go hanagogi tenira na enoni getera.
I asa vige rongoa nikâ
na mane tora tamasinga iamu.”
Currently Selected:
NAHUMI 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific