HAGARAHENGA 2
2
Na vogasiana ni bereti
1Manga na enoni ma ki vogasia na Araha renia na koni, ngaia ki menamenaria nga ki voravora re na palaua. Ngaia ki toraria renia na oile ni olive ma ki naka igê na marâ i sigini koro, matena ga sungia. 2Ngaia ki tagarenia nga tangara na mane ni vogasiha tenia na raraha iana o Aroni. Ta na hitangita na mane ni vogasiha ki arahia nga na makona na palaua ma na oile i vunuvunu na rimana, ma ki sungia igê na bea ni vogasiha henigi na marâ hato ga sigini koro matena ga sungigi. Na girarana vi na makona hagenani i arahitenia ki na anina na Araha. Na vanuhana na ngêra ni vogasiha ngekana ki hagakoro obana na Araha. 3Na makona i hitahita râ ki tangara na mane ni vogasiha. Ngaia ki apuna teha ngavê, suria ngaia ki na vogasiha ni ngêra tanga na Araha.
4Manga ga vogasi renia na bereti ga hagabangia, ki apu vige aroa na makona henia na isiti: na bereti upupuga, ga bani aroa henia oile ni olive, se na bereti manihinihi ga taruhia renia na oile ni olive. 5Manga ga vogasi renia na bereti ga hanua igê na bea na bahitana na aiani ngaira ka aroa na makona henia na oile ni olive, mareha vi henia na isiti. 6Ga menamenaria nga, ka meria na oile ni olive huria ma ka kahu vogasi renia.
7Manga ga vogasi renia na bereti ga hanua igê na bahitana na kapa, ga aroa na makona henia na oile ni olive. 8Ga tagarenia nga tanga na mane ni vogasiha, hanana i vogasia na Araha renia, ma ngaia ki torea nga tanga na bea ni vogasiha, 9ki tavoa ta agua ma ki susu tanga na Araha renia. Na girarana vi na bereti hagenani ki na anina na Araha. Na vanuhana na ngêra ni vogasiha ngekana ki hagakoro obana na Araha. 10Na agua i hitahita râ ki tangara na mane ni vogasiha. Ngaia ki apuna teha ngavê, suria ki na vogasiha ni ngêra tanga na Araha.
11I apu hagetage vigamu aroa na makona henia na isiti, matena mu vogasia na Araha renia na bereti. I apu hagetage na isiti se na pirui vige toraria renia na ngêra, ga vogasia re na Araha. 12Mu tagarenigi na nagoni na mu na koni i na ara ni harisi tanga na Araha, hanana mu vogasia renigi ma ki apu vigamu susu renigi igê na bea ni vogasiha. 13Na ara ni mateni mu vogasia igê na Araha renigi na bereti, mu hagamarasigagi, suria na asi ki na girarana na suruheri i berarogami, God megamu. Tahema ki tuguhigamu vigamu hagamarasigagi. 14Matena mu tagarenigi na nagoni na mu na koni tanga na Araha, mu hanugi nga, se mu menamenarigi. 15Mu nakagi henigi na oile ni olive ma na marâ ga sigini koro matena ga sungigi, ma kamu kahu tagarenigi tanga na mane ni vogasiha. 16Na mane ni vogasiha ki susu nga tanga na Araha renigi tani na koni ma tani na oile ma na ara ni marâ hato ga sigini koro matena ga sungigi. Na girarana vi na ngêra ni vogasiha hagenani ka na anina na Araha.
Currently Selected:
HAGARAHENGA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific