MANE NI HAGAOTONGA 20
20
Na hagaitangiha tanga na varo ninuni iana o Benamino
1Na Isiraelita hato, haganega tenia i Tane i na apanena tanga i Libanone ki tariha i Bereseba i Negeve, henira na ani kerekê i Gileata, ngaira ka haku renia na tarana i erataga ngekana. Ngaira hato ka haku me igê na agua apuna iana na Araha i Misipa. 2Na bêni na varo ninuni hato iata na Isiraelita ka oga igê na hekarigiana iata na kariana God. Na 400,000 na mane ni me ke oga nikâ henira. 3Na raraha iana o Benamino ka rongo, vi na Isiraelita hato getera ka haku i Misipa.
Na Isiraelita ka hagatea na mane ni hagarahenga, ka vi: “Gu visia me, manga i he kani vora me na tarana i erataga ngekana.” 4Na mane ni hagarahenga, ga nahuia ki me na gete râ ma iana ngekana, ki arami, ki vi: Inê ma na gete râ ma iaku kamuru râ i Gibea i na apanena iana o Benamino, kamuru mêru so igê. 5Na mane i Gibea ka râ me ka rihia na ruma igê na bungiana, hanana viga toreê. Ngaira ka obania viga nahuiê kê meme. Ma ki mareha. Ngaira ka tuguria na gete iaku râ ma, hanana viga merongo era. Vikana ngaia ki me. 6Inê kê torea na gahuana ma kê reteretea ma kê kasigi na mavoroni tonganira na varo ninuni tangahuru matarerua iata na Isiraelita. Na enoni ngegana ka katoa na tarana i era ngavê, i berarogaka. 7Igia hato ikê ka na Isiraelita. Na ta ke katoa renia?”
8Na enoni hato ka aharaga, ka vi: “Igia hato ka gâga nga ikê. Siana ta na hitangika ki aporo i ruma iana, se i ruma na gahu iana. 9Nika, ge kato vikê. Ge kato ke tarahura na mane, hanana ge taharia i Gibea. 10Na tangahuruta na mane na Isiraelita ka bâbâsurigi na ngêra tangara na mane ni me, ma na ani getera ka arâ nga ka hagaitangia i Gibea renia na tarana i erataga ga katoa i Isiraele.” 11Vikê na mane hato i Isiraele ka haku renia na tarana gi tage ma: tanga ga taharia na hinua i Gibea.
12Na varo ninuni iata na Isiraelita ka hagatorangenira na mane tora tamasinga suria na apanena hagenani iana na varo ninuni iana o Benamino, ka vi: “Tanu hega mu katoa na tarana i erataga vikana? 13Hoi, mu tagarenira tangagami na eragani nuni ngegana, hanana mi mutera ma kami hagamagahurua na eraha ngekana tenia i Isiraele.” Ma na raraha iana Benamino ka pe tê viteata na Isiraelita getera. 14Na hinua hato iata na raraha iana o Benamino ka haku i Gibea ka meraheariha na Isiraelita getera. 15-16Na mane ni me tenigi na hinua ngegana ka vora na 26,000. Na mane ni me nogata i Gibea ka vora 700. Ngaira ka na mane ga maha ma ka manisingenia na hearihatana. Na ara ni hitangita ka manisingenia ga mama oto renigi na hêsigogo. 17Na Isiraelita na ani getera nogata ka vora na mane ni me 400,000. Ngaira ka manisingenigi na marâ ni hearihatana.
18Na Isiraelita ka râ tanga na agua ni hagarahenga i Betele, ma ka hagatea God igê, ka vi: “Na varo ninuni iana o ti kani hagenago ki taharia na varo ninuni iana o Benamino?”
Na Araha ki arami, ki vi: “Na varo ninuni iana o Juta.”
19Hoi, ki tangi me ma na Isiraelita ka tavoraha ma ka tênga hagarangia na hinua i Gibea. 20Ngaira ka nanê, hanana viga taharira na mane ni me tenia na varo ninuni iana o Benamino. Na mane ni me ka ura nanê ka maatia na hinua. 21Na mane ni me tenia na varo ninuni iana o Benamino ka hura me tenia na hinua. Ngaira ka nahuira ka me na 22,000 na mane ni me na Isiraelita igê na tangiana ngekana. 22-23Na Isiraelita ka aporo tanga na agua ni hagarahenga ma ka hetaki i maana na Araha rârâ ma ki bungi. Ngaira ka hagatea na Araha, ka vi: “I hega, i arari ma vigami meraheariha nikâ na goamami na raraha iana o Benamino se mareha?”
Na Araha ki arami, ki vi: “Mu aporo râ nikâ!”
Vikana na Araha ki hagaramonira na mane ni me na Isiraelita. Ngaira ka hagarêra na mane ni me iata ka ura igê na bani atohata manga i nago. 24Ngaia ki na ruata na matena ga râ ka meraheariha igê na mane ni me tenia na varo ninuni iana o Benamino. 25Na mane ni me tenia na varo ninuni iana o Benamino ka hura me nikâ tenia na hinua. Igê na matena ngekê ngaira ka nahuira ka me na 18,000 na mane ni me ramo iata na Isiraelita. 26Hemuri na Isiraelita hato ka râ i Betele ma ka hetaki igê. Ngaira ka oga so i ngekana i maana na Araha ma ka pe ngê rârâ mataro me ki bungi. I ngekana i maana na Araha ngaira ka susu tanga ma ka vogasia igê renigi na ngêra ga ngê haku. 27-28I na matena ngekana na bokesi na suruheri iana na Araha ki gâga mênga i Betele. O Pinegasi karena o Eliasare ma o vesina o Arone ki bâsuria. Na enoni ka hagatea na Araha, ka vi: “I hega, i arari ma, vigami meraheariha nikâ na goamami na raraha iana o Benamino, se mi nakara vê?”
Na Araha ki arami, ki vi: “Mu meraheariha. I gomaha inê kê page katogamu, kamu teharira.”
29Hoi, na Isiraelita ka kasia ta na apanena na mane ni me ka ahirihia i Gibea. 30Igê na oruta na tangiana ngaira ka tavo uga râ tangara na mane ni me tenia na varo ninuni iana o Benamino ma ka kasira na mane ni me iata ka ura ka maatia i Gibea, ka nanê tanga na hearihatana manga i nago. 31Na mane ni me tenia na varo ninuni iana o Benamino ka hura me tenia na hinua tanga na hearihatana. Ngaira ka arege tenia na hinua. I na matena ngekê nikâ ngaira ka nahuira ka me tani na mane ni me na Isiraelita igê na agua i tatara igê na tara tanga i Betele ma igê na tara tanga i Gibea. Ngaira ka nahuira ka me na ararina na 30 na Isiraelita. 32Na varo ninuni iana o Benamino ki vi: “E, igia ka teharira nikâ manga i nago.”
Ma na Isiraelita ka bani kato hete, viga guruguru bê aporo, hanana ga katora na mane ni me tenia na varo ninuni iana o Benamino ka guruguru râ tenia na hinua tangagi na tara. 33Vikê matena na mane ni me na Isiraelita ka aporo ma ka haku aporo i Balatamare, hoi, na mane ni me ga ahi rihia i Gibea, ka parama ma ka gaha me tenigi na ahiahi iata rihia na hinua. 34Na 10,000 na mane ni me ramo, ga bani atera tenigi na ara ni varo ninuni iata na Isiraelita, ngaira ka taharia i Gibea. Na hearihatana ki tê era ngavê. Na mane ni me tenia varo ninuni iana o Benamino ka pe takusia vi na Isiraelita ka sugi mutera ngavê. 35Na Araha ki katora na Isiraelita ka teharira na mane ni me tenia na varo ninuni iana o Benamino. Na Isiraelita ka nahuira ka me na 25.100 na merongata igê na tangiana ngekana. 36Na raraha iana o Benamino ka kahu tahetara, vi ngaira ka so renira.
Na mane ni me iata na Isiraelita ka hagaparu, viga gava tenira na mane ni me tenia na varo ninuni iana o Benamino, suria ngaira ka hagêguritogo renira na tamata na mane ni me, ga nakara ka ahirihia i Gibea. 37Na mane ni me ngegana ka hata ni gaha tanga i Gibea. Ngaira ka totoko suria na hinua ma ka mutera na enoni hato igê. 38Na mane ni me na Isiraelita ma na mane ni me ga ahi, ngaira ka bani naka ta na giraraha, i manga ikê: Matena ga bâsia na robona na gi i akê tenia na hinua, 39na mane ni me na Isiraelita igê na hearihatana ga arege râ tenia na hinua, ka arigu bê aporo. I ngekana na mane ni me tenia na varo ninuni iana o Benamino ka bani nahuira ka meme na Isiraelita tangahuru gi oru. Ngaira ka takotako, ka vivi: “E, igia ka teharira nikâ manga i nago!” 40Hoi, na giraraha ki vora me. Na robona na gi ki akê tenia na hinua. Na mane ni me tenia na varo ninuni iana o Benamino ka bâ bê aporo ma ka gasuga, suria ga bâsia na hinua hagenani i vatavata. 41Hoi, na mane ni me na Isiraelita ka arigu bê aporo, ma na mane ni me tenia na varo ninuni iana o Benamino ka magu ma ka tugupu, suria ga tahetara, vi ngaira ka sugi mute. 42Ngaira ka gava tenira na Isiraelita ma ka tango tanga na masusu. Ma ki bara tangara, vige tahi. Ngaira ka bara i berarogata na mane ni me na Isiraelita ma na tamata na mane ni me, ga hura me tenia na hinua. Ma ngaira ka mute. 43Na Isiraelita ka hagabarasira na merongata. Ngaira ka ama ni tarigenira nga ka akê kerekê hagatê tenia i Gibea. Ngaira ka mutera. 44Na 18,000 na mane ni me ramo tenia na varo ninuni iana o Benamino ka me. 45Na ani ga hita ka arigu bê aporo ma ka gava tanga na masusu, tanga na hê i Rimone. Na Isiraelita ka nahuira ka me i tara na 5, 000 na hitangita. Na Isiraelita ka ama ni tarigenira nga na ani ga hita râ tanga i Gitome. Ngaira ka nahuira ka me na 2,000. 46Ngaira haku na ani ga me na mane ni me tenia na varo ninuni iana o Benamino ka vora na 25,000. Ngaira hato ka na manisi igê na hearihatana.
47Nga noga ma na 600 na mane ni me ka gava tanga na masusu tanga na hê i Rimone. Ngaira ka oga igê surigi na hageha ge he. 48Na Isiraelita ka aporo tangara na ani ga hita tenia na varo ninuni iana o Benamino ma ka mutera hato, na mane, na gete, na kare ma na togoha. Ngaira ka hagamakakagi na hinua hato i na apanena iana o Benamino.
Currently Selected:
MANE NI HAGAOTONGA 20: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific