KOLOSE 4
4
1Igamu na enoni mu araha, mu katora bâkoro na enoni vurivuri iami. Mu takusia vi na Araha God nogana ki nahunigamu nogami.
Tani na ramata
2Mu ama ni nunginungi nga, ma kamu takusia na marâ, mu visia igê na nunginungiha iami ma kamu visia koro God. 3Ma na matena mu nunginungi, mu nunginungi nikâ tangagami, hanana God ki page hagamarumungenigami, kami tarohenia tatahura na taroha renia o Kirisito, ga pe bani girara i nago. Suria inê kê tarohenia, tahema i ngekê inê kê oga i ruma ni hagaitangiha. 4Mu nunginungi tangê, hanana ve tarohenia, ma be hagatako obata na enoni renia, suria na tarana ngekê ki tuguhiê.
5Mu giraragamu maninga renira na enoni, ga pe tongesuria o Kirisito, ma kamu tarohenia tangara igê na ara ni mateni, i arari. 6Matena mu tamasi tangara na enoni, i koro, na enoni ka vagevagesia na tamasinga iami, ma ka obania bâraha, vi ga karinga, ma ki tuguhigamu, mu girara, manga i he kanimu aramia bâkoro na ara ni enoni igê na tarani ga oto.
Na hatongina na leta
7O Tigiko, na goaka hetakui igê na tongesuriha, ki tamanigami. Igami kami hagêguri togo renia. Ngaia ki na tamamami igê na tagaraha tanga na Araha. Ngaia ki page hagarongogamu renigi na ara ni marâ hato, ga kahu tarahuê noga. 8Tahema inê be hagatorangenia tangagamu, hanana ge hagakoro obami, suria ngaia ki page hagarongogamu renigami hato, vi manga i he ka na ogaha iamami. 9O Onesimo ki takua. Ngaia ki na goaka igê na tongesuriha. Igami kami takuia bâraha, ma igami kami raroni togo renia. Ngaia ki na hitangimi. Ngairerua karu page hagarongogamu renigi na ara ni marâ, ga vora me ikê.
10O Arisitako ki oga heniê i ruma ni hagaitangiha. Ngaia ki vi “Mauru Koro” tangagamu, mo Mareko nikâ, o goana o Banabasi. (Inê kê bani visia tangagamu, vi gamu unia banu i pasimi, manga vi atata vê i pasimi.) 11O Josua, ga hêtana nikâ vi o Jusito, ki hagamauru koro tangagamu nikâ. Ngaira gi oru ngegê ka na Siu, ga tongesuria o Kirisito, ma ngaira ma ngegê ka na ani i berarogata na Siu, ga tagara heniê tanga na Arahanga iana God, ma ngaira ka tamaniê bâraha.
12O Epaparasi ki vi “Mauru Koro” tangagamu. Ngaia ki na hitangimi nikâ, ma ki tagara tanga o Kirisito Jesu. Ngaia ki nunginungi tare tangagamu i mêrihana hagenani. Ngaia ki nungia God, ki hagagatagatanigamu igê na tongesuriha, hanana mu nganganihaga igê na tongesuriha, ma kamu tongesuri i mêrihami hagenani, ma kamu katogi na ara ni marâ hato, God i obanigi. 13Inê mareku kê girara bâkoro, vi ngaia ki tagara bâraha tangagamu, ma tangara na enoni i Laotisea me Hierapoli, suria gê bâsia. 14O Luka, na mane mangata koro iamami, mo Temasi karu hagamauru koro tangagamu.
15Mu visia “Mauru Koro” tangara na goaka igê na tongesuriha i Laotisea, ma tanga ka Numipa, ma tangara na enoni ga tongesuri, ga rotu haku i pasina. 16I murina mu tomania hato na leta ngekê, mu girara ka tomania nogata na haku na enoni, ga tongesuri, i Laotisea. Ma igamu nikâ kamu tomania na leta, i arâ me pania i Laotisea. 17Mu vi tanga o Agiripo, ki hatongia na tagaraha iana tanga na Araha, ga bani kasia tanga.
18Renia na rimaku mareku inê kê sege vikê: Inê Paulo kê vi tangagamu “Mauru Koro”. Siana kamu bonotenia, vi inê kê oga i ruma ni hagaitangiha!
Inê kê nungia God, ki korokoro tangagamu.
Currently Selected:
KOLOSE 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific