2 SAMUELE 3
3
1Na hearihatana i berarogata na apanena iana o Saulo ma na apanena iana o Tavite ki râ borahu era. O Tavite ki rârâ ma ki kahu ramo ngavê, ma na apanena iana o Saulo ki rârâ ma ki kahu so ngavê.
Ngaira o karena o Tavite
2I Heberone o Tavite ki aparara igê o karena ge ono. Ngaira kani igê: hagenago o Amanone, kenana kani ka Aginoama ni Jeserele; 3na ruata ka no Kileaba kenana kani ka Abigaile ni Karamele ka nâna o Nabala; na oruta ka no Abasalome kenana kani ka Maka, ka karena o Talamai na maneraha i Gesure; 4na heta ka no Atonia, kenana ka Gagiti; na rimata ka no Sepatia, kenana kani ka Abitale; 5na onota ka no Itereama, kenana kani ka Egela. O karena hato ngegana ka vora i Heberone.
O Abenere ki pane henia o Tavite
6Matena i tavoraha mênga na hearihatana i berarogaterua na apanena iana o Tavite ma na apanena iana o Saulo, o Abenere ki kahu ramo ngavê i berarogata na enoni, ga pane henia o Saulo.
7I ta na tangiana o Isiboseti karena o Saulo ki tuguria o Abenere, ki vi: “Tanu hega kanigo memêru ka Risipa ka karena o Aia kaniana râ ma o Saulo?” 8Vikana o Abenere ki mangariaga ngavê ma ki vi tanga o Isiboseti, ki vi: “Gu takusia vari vi na o kani inê? Gu takusia vari, vi inê kê pane henia Juta? Bâ, inê kê toto surira tare o vaemamu o Saulo, na goana ma na tamana. Inê kanigê roherohe pusigo tare, hanana vi siana o Tavite ki teharigo. Ma i ngekê igo ko visiê, vigê katoa na tarana i pe oto henia na gete! 9-10Na Araha ki surua tanga o Tavite, vi ngaia ki page hatungia na arahanga tenira o Saulo ma na raraha iana, ma ki page kasia o Tavite ki maneraha i Juta ma i Isiraele nikâ, i na apanena hagenani. Na Araha ke nahuiê be me, manga vi inê ma kê pe katoa ke vagavaga me mave na suruha ngekana!” 11O Isiboseti ki pe tamasi bê aporo rârâ, suria i magutenia bâraha o Abenere.
12O Abenere ki hagatorangenira na mane tora tamasinga tanga o Tavite, i oga i Heberone, ka vi: “Ti kani marungia na apanena ikê? Garu heaganari, hanana gê page tamanigo, hanana i Isiraele hagenani ki page panepane henigo.”
13O Tavite ki arami, ki vi: “Hoita! Matena go arâ me go merâ me nga ka Mikale ka karena o Saulo. Manga i mareha, na heaganariha iakerua ki asa vige akê me.” 14O Tavite ki hagatorangenira nikâ na mane tora tamasinga tanga o Isiboseti, ka vi: “Vateê aporo ka Mikale kaniaku. Inê kê bani vuria renigi na tangarê gi tage na gavoni na varata na Pilisitina, hanana vigê aruragia.” 15Vikê o Isiboseti ki torea vê ka Mikale tenia o vaniana o Palatiele karena o Laisi. 16O Palatiele ki angi gogogo suria kaniana rârâ ma ki tariha i hinua i Bagurimi. I ngekana o Abenere ki vi: “Gu aporo.” Ma ngaia ki aporo.
17O Abenere ki râ i pasita na enoni raha i Isiraele ma ki vi tangara, ki vi: “I arihu me noga igamu kamu bani obania vi o Tavite ke maneraha iami. 18Hoi, ikênga nga na matena koro tangagamu. Mu takusia aporo na tamasinga iana na Araha, i vi, ‘Renia na kariaku o Tavite inê be hagatahira na kariaku na Isiraelita tenira na Pilisitina ma tenira na merongata getera hato.’” 19O Abenere ki tamasi nikâ tangara na raraha iana o Benamino, ma hemuri ngaia ki râ i Heberone ki hagarongoa o Tavite renia na heaganariha i berarogata na varo ninuni iana o Benamino ma na Isiraelita.
20Matena o Abenere henira na me iana tangahuru gi rua ka bani ata vê i Heberone i pasina o Tavite, o Tavite ki magoto tangara. 21O Abenere ki vi tanga o Tavite, ki vi: “Hoi maneraha, inê be râ ma be katoa i Isiraele hagenani ke pane henigo. Ngaira ka page aganarigo ko maneraha iata. Vikana ki page togotogo na obaniha iamu ma ko page marungia na apanena hagenani.” O Tavite ki surua tanga, vi arâ purupurunguniaga.
O Abenere ki me
22I murina ma ngekana o Joaba, ki bêngenira na mane ni me iana o Tavite ma na mane ni hagaotonga getera iana o Tavite, ka râ ka rurugu ma ka migiaporo me rako teha ngavê na marâ ga henahuraugi. O Abenere ki bani râ tenia o Tavite i Heberone, suria o Tavite ki kasia vê ki râ ma ki surua tanga, vi arâ purupurunguniaga. 23Matena i ata me o Joaba henira na me iana, ngaia ki rongo, vi o Abenere ki bani vatugia me na maneraha o Tavite, i kasia vê ki râ ma ki surua tanga, vi arâ purupurunguniaga. 24Vikê o Joaba ki râ i pasina na maneraha ma ki hagatea, ki vi: “Na tarana ta go katoa? Inê kê rongo, vi o Abenere ki vatugigo me! Tanu hega kanigo kasia vê ki râ vikana? 25Ngaia ki râ me ikê, hanana vi hagabekasigo, ma hanana vi tarahua na katoha iamu ma vi i he ko arâ igê. Igo ko bani girara!”
26Matena o Joaba ki bani hura me tenia o Tavite, ngaia ki kasira na mane tora tamasinga, hanana viga meaporo o Abenere. Ngaira ka meaporo me tenia na vekaru i Sira. Ma o Tavite ki pe hagare rârâ. 27Matena o Abenere ki ata i Heberone, o Joaba ki meura râ getea igê na maanipara ni hinua. Ngaia ki kato manga vi tamasi pinihi tanga. Manga i ngekana ngaia ki ahura na obana. Vikana o Joaba ki nahuia ki me o Abenere baruna o Asaele o vesina. 28Matena o Tavite ki rongo, ngaia ki vi: “Na Araha ki girara, vi na tarana i katoa o Joaba ki pe takegami na kariaku menê. 29Na hagaitangiha mena ke tarahura hete o Joaba ma na apaparaha hagenani iana. Ta na mane surigi na apaparaha iana ke tarahua na hiraga, se na asiahu, se i araria ma na tagaraha iana na gete, se i meme igê na hearihatana, se i magê tare!” 30Vikê o vahegoana o Joaba mo Abisai karu nahuia ki me o Abenere baruna o Asaele o vesiterua, i me igê na hearihatana i Gibeone.
Ga bagia o Abenere
31Hoi, o Tavite ki bonasira o Joaba ma na mane ni me iana ka tarisigi na tuguni iata ma ka tuguni kakaga ka angisia o Abenere. Matena ga râ tanga ga bagia, o Tavite ki mumuria na gahua. 32Ngaira ka bagia o Abenere i Heberone ma na maneraha ki angi raha igê na anoano, ma na enoni hato nogata. 33O Tavite ki angi maramara vikê:
“O Abenere, tanu hega ko me
igê na tarana i pe hagarahasigo?
34Na rimamu ka pe rakugi.
I mareha na seni i ugamu.
Igo ko me manga na enoni
na manero ka nahuia ki me!” Ma na enoni ka angisia aporo nikâ.
35Suria na tangiana hagenani na enoni ka uhungia o Tavite, hanana vige ngê. Ma o Tavite ki tohe, ki vi: “God ke nahuiê be me, manga vigê ngêngê, matena i tangitangi mênga!” 36Ngaira ka aganaria na tamasinga ngekana ma ka naka ma vê. I monari, na ara ni marâ i katogi na maneraha, na enoni ka aganarigi. 37Na kariana hato o Tavite ma na Isiraelita hato ka aitangisia, vi na mera iana o Abenere ki pe takea rârâ na maneraha. 38Na maneraha ki vi tangara na mane ni hagaotonga iana, ki vi: “Mu pe girara vari, vi i ngekê ki me na mane i bêngenira bâkoro na Isiraelita? 39Henaka God ki ateê kê maneraha, inê ki mamênga vi ve raramohaga. O karena ka Seruia ngegana ka ramo tehariê mênga. Na Araha ke hagaitangira na manero ngegana renigi na meni ga ararira!”
Currently Selected:
2 SAMUELE 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific