Jonás 1
1
So Jonás dataueeguesop Ñim Lo'onatac 'Enauacna
1Qaq huo'o so na'a'q nache Ñim Nataxala' 'enapega so Jonás, som llalec so Amitay, 'eeta': 2«'Aue, 'anqo'ona qome ye 'amaqtaqaic huaqta'a't nỹecpi ye Nínive, nache 'aua'aqtaxanem da ỹataqta aỹem iviro'ot nam qauemsat maye ỹo'ottac yemayepi.»
3Qalaxaye so Jonás, dataueeguesop Ñim Nataxala' taỹa ye Tarsis, qalaxaye ỹa'auaxaañi da taỹa so ñegaxasom le'enaxat Jope, yem huaña da natenalec aso notaxaqui maye mashe huotaique da taỹa da Tarsis. Huaña nache desheenaxana aso lliquiaxaqui da yaqto' huenoteuo da taỹa yemaye da dataueeguesop Ñim Nataxala'.
4Qalaxaye Ñim Nataxala', anacot so la'at lta'araic ỹasheerelec naqa'en aso auaxai, qaq cha'aye ỹataqta lta'araic se'eso la'at, nache 'eeta'am da huotaique dolagui naqa'en aso notaxaqui. 5Nache so lo'opi aso notaxaqui, ỹataqta lta'araic da lli'iỹaxa, nache ñi 'oonolec somayepi nqouagaxaunot so ỹotta'a't natamnaxala'pi, qataq ỹasaxangui so 'etaxat so lla'acpi, maye huetangui aso nnotaxaqui da yaqto' huaỹoxootegue naqa'en asomaye. Qaq so Jonás qalaxaye nale'ena co'ollaxa da taña so pa'aguiñi aso notaxaqui nache do'ocheta.
6Nache so lataxala' so lo'opi aso notaxaqui nqo'ooña so huetaña so Jonás, nache 'enapega, 'eeta': «¿Ta'ainco' da 'auo'ocheta? ¡Qoñisheguem ña 'anqouagaxaunot ca 'anatamnaxala'! shapegueto' da 'am hua'axaỹa, nache qomi' huapegueto da qomi' nca'alaxatrec.»
7Nache so lo'opi aso notaxaqui detaqtega't, 'eeta': «Qomi' no'on da ñalletaxa't, yaqto' saỹatenaq chaq negue't ca ỹoqta lasouaxashet de'era souaqaigui.» Nache somayepi ỹo'ot so nalletaxac, nache taalec so Jonás da lasouaxashet damaye. 8Nache somayepi inat so Jonás, 'eeta': «¿Qomi' 'aua'aqtaxanema nagui da ta'ainco' da ñeque'eenaqtapigui de'era? ¿Negue't ca 'aro'onataxanaxac? ¿Hua'ague ca 'auachegoqta'ague? ¿Negue't ca 'alhua maye 'auachegoqta'a? ¿Negue't ca 'arhuo' le'ecpi?» 9Nache so Jonás, 'enapeco': «Aỹem hebreo le'ec, qaq huo'o naq 'enec ñaqa'en Ñim Nataxala', maye lo'onatac na piguem, auaxai qataq ana 'alhua.» 10Qaq co'ollaq hua'axaỹa de'era so notaxaqui lo'opi nache nquictec da lli'iỹaxa, souaxat de'era la'aqtaxanaxac so Jonás, da ỹa'axattac da dataueeguesop Ñim Nataxala', nache 'enapego' somaye, 'eeta': «¿Ta'ainco' da 'auo'ot de'era?» 11Qalaxaye co'ollaq qaila'a da aso lapaxa so 'etaxat da nquictasheguem, nache qainattaco' somaye: «¿Chaq shenaqtec 'am da yaqto' vi'iiguet ana lapaxa na 'etaxat?» 12Nache somaye, 'enapeco': «Aỹem qauasaqaiñigui na 'etaxat, yaqto' vi'iiguet ana lapaxa ana auaxai, cha'aye saỹateeta da nachaỹem ỹasouaxashet de'era lta'araic qoviỹaigui.»
13Nache so notaxaqui lo'opi ỹataqta na'añaxat co'ollaxa da huotaique da ỹe'eguelaxatta so lqaxaỹaxa aso nnotaxaqui. Qalaxaye sa ỹañoxot da ỹe'eguelaxatta, cha'aye ana lapaxa so 'etaxat ỹataqta nquictasheguem, nache ihuogoqchettac somayepi. 14Nache somayepi nachoxonnot Ñim Nataxala', 'eeta': «'Am Nataxala', 'am ñachoxonnaqot nagui da saishet da qomi' 'aualaua't, da sasouaxalec de'era shiỹaxaua, qataq saishet da qomi' 'aumataleguete da l-leuaxa damaye da qaica ca ỹasouaxat. Cha'aye 'Am Nataxala', nache 'am maye 'aro'onatac de'era.» 15Qaq ime, nache so Jonás qaỹasaxangui aso auaxai, nache aso auaxai vi'iiguet aso lapaxa. 16Qaq co'ollaq ỹauaachigui de'era somayepi, nache ỹataqta lta'araic naqa'en da 'enec Ñim Nataxala', nache ỹauo'o aso lachetaqtaxanaqte da ỹanot Ñimaye, qataq ỹan da la'aqtac da nache 'eetai' da natameetacot.
Da natamnaxac so Jonás
17Qalaxaye Ñim Nataxala', mashe ỹaqataxaatai' co'ollaxa aso nỹaq late'e da yaqto' iuoxonañi naqa'en so Jonás. Nache so Jonás ivi' soua tres na'axa'te qataq soua tres pe' da huetaigui na lauel asomaye.
Currently Selected:
Jonás 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.