Abdías 1
1
Da taỹa'a nhuaxanaguec ye Edom
1Da lauanaqchec so Abdías, maye chegoqo'ot Ñim Nataxala' maye ỹa'axata'a da 'eetec qome da taỹa'a ye Edom.
Qomi' sa'axasoqchigui so la'aqtaxanaxanec Ñim Nataxala', 'eeta'
huo'o so namaxashec maye taỹa na ỹotta'a't shiỹaxauapi da da'aqtaxanem da na'aqtac maye, 'eeta':
«¡Qolaq! ¡Ñeqo'onaxa ye Edom le'ecpi nache ñalaataxai'!
2Aỹem, 'am so'otec qome da qaica ca 'ara'amaqchec da 'aualectaigui na ỹotta'a't shiỹaxauapi,
qataq ỹataqta qaica ca 'enec qanqa'en 'am.
3Qaq dam 'ana'amqaanaxac, ỹataqta 'am ỹatenachet.
'Am maye qonetaigui nam lpoxoỹaxapi ana coma'pi,
qataq qonetasheguema nam qaỹoqotcheguemapi,
ỹoqo'oye 'aupi'itaxaatega da qaica ca ishet da 'am iqalagoxotec.
4Qalaxaye na'aictaxa da qoneta'am ca vi'ic maye huaỹotac na piguem,
qataq da 'aỹa'anaigui ana huaqaañipi ca 'arpata'c,
qalaxaye nache 'am sachegoxotchiguiña qome camaye da 'auanaañi ñaqa'en».
Qaq 'era da la'aqtac Ñim Nataxala'.
5Qaq da huo'otaq 'am naua'a da pe ca cachaxaicpi da 'am decachiỹot,
qalaq saishet da imauec da ỹache nam 'ogoxoshetpi,
qataq da huo'otaq 'am naua'a ca uva lo'opi da 'am decachiỹot,
qalaq huo'o ana no'onaxatañi ala ana uvapi.
Qalaxaye nam 'ampa'aguenaxauapi namayepi ỹataqta 'am nhuotta.
6¡Qalaxaye 'am Esaú, ca qoneteco' ye ỹataqta mashe 'am qanhuotta!
¡Nache ỹataqta qaimattec da qaỹacona so ỹataqta no'on 'ogoxoshetpi!
7Qaq nache 'enauac nam 'am itauaatacpi co'ollaxa, ỹataqta 'am ỹatenachet,
nache 'am ỹo'orauec, qoca'ai naqa'en ye maiche 'ana'alhua.
Qataq ivira'a nam 'anauochaxauapi da 'am dataỹa'aguet,
nache namayepi ỹanangui na 'ec ana lqoinapi.
¡Cha'aye 'am Edom, ỹataqta qaica ca 'araỹaanataxanaxac!
8Qaq Ñim Nataxala', 'enapec: Que'eca na'a'q qom sauo'o ca nhuaxanaguec ye Edom,
nache selaxachigui nam ỹaanaxanaxaicpi,
qataq seuotaxanec nam laỹaanataxanaxacpi
nam netaña aye qasoxonaxapi maye lalamaqte so Esaú.
9Qaq nam 'añaxaicpi alleppi ye Temán, ỹataqta iviloxol qome da lcolanaxa,
qaq nam netañapi aye qasoxonaxapi maye lalamaqte so Esaú,
ỹataqta qaica qome ca no'onañi da nca'altauec.
Na lasouaxashetpi ye Edom le'ecpi
10Qaq souaxat da ỹataqta sa
'auyacnapec qataq 'aualauat
so 'arqaỹa Jacob,
nache 'am talec qome da ncoxo,
qataq ỹataqta imauec da 'am qailaxachigui.
11Cha'aye co'ollaq anac so
npa'aguenaxauapi somaye,
da deuotaxanec so lsallaxa maye
huetaigui so huaqta'a't nỹecpi,
qataq co'ollaq anac so chegaqauec
alleppi da ỹacagaxat so lasompi ye Jerusalén
nache 'am saishet da 'ampaxateguet somayepi,
qaq co'ollaq qanallichigui so nogoxoshetpi,
nache 'aue'enaxat da lataxac somayepi.
12Qataq saishettaxa da
'antootapeguec da 'auauaachigui
nam 'arqaỹañecpi
so na'a'q co'ollaq huaigui
da nque'eenaxac,
qataq saishettaxa da 'antooteguec
da 'auauaachigui da qailaxachigui
na Judá le'ecpi,
qataq saishettaxa da 'avi'iitac
namayepi so na'a'q co'ollaq
huo'o da lachetataic.
13Qataq saishettaxa da
'aunoxoneua'a ye ỹalamaxat
huaqta'a't nỹecpi
co'ollaq huo'o da nque'eenaxac,
qataq saishettaxa da 'antooteguec
da qauem maye talec,
qataq saishettaxa da 'aucachiỹa
da lsallaxa co'ollaq mashe qaica ca la'añaxac.
14Qataq saishettaxa da qonetangui
co'ollaxa so ñec maye hua'axagui so lỹa ñec
da yaqto' 'aualauat nam datauecpi,
qataq saishettoxo' co'ollaxa da
'aỹa'anec nam no'onañi lca'alaxaicpi
da huaigui so na'a'q maye huo'o da lachetataic.
15Qalaxaye mashe sa qaỹapeque ca
na'a'q da Ñim Nataxala',
nmit na ỹotta'a't shiỹaxauapi.
Qaq dam 'auo'ot nataqa'en 'am
qaỹo'otec qome, nache 'am talec
ca 'ansheetenaguec.
16Nache dam 'eetec da qanỹomiitac
co'ollaq huaña añi qui'itta ñeqasoxonaxa,
qaq nache 'eetec qome da
queto'ot da nỹomtac na ỹotta'a't shiỹaxauapi,
nache ivitta'a da iqueno'oc na lataxa,
huaña nache imauec da pal.
17Qalaxaye añi qasoxonaxa Sión
huo'o qome ca lca'alaxaicpi,
qaq añimaye ỹataqta sa qaishetapec qome.
Nache nam chegoxoguetpi so Jacob,
qaltaq ỹe'eguelaxa qome da nalec na na'alhuapi.
18Qaq nam chegoxoguetpi so Jacob,
qalaq 'eeta'am qome ca norec,
qataq nam llalaqpi so José, qalaq
'eeta'am na le'eraxa ca norec,
qaq nam chegoxoguetpi so Esaú,
qalaq 'eeta'am ca nca'atoxonaxat,
da qaỹe'eraxatoigui nache ivitta'a da ỹataqta ỹavicta,
nache qaica qome ca lca'alaxaicpi
nam chegoxoguetpi so Esaú.
Qaq 'era da la'aqtac Ñim Nataxala'.
19Qaq nam Israel le'ecpi maye netaña ye Néguev, ỹacona qome da nalec aye qasoxonaxapi maye na'alhua so Esaú, qaq nam netaña ye nalochiguiñi 'alhua, qalaq ỹacona qome ye 'alhua maye lalamaxat na Filistea le'ecpi. Nataqa'en ỹacona qome ye 'alhua ye Efraín, qataq ye 'alhua ye Samaria, qaq nam chegoxoguetpi so Benjamín, qalaq ỹacona qome ye 'alhua Galaad. 20Qaq nam Israel le'ecpi maye qaỹauec co'ollaxa, qalaq ỹacona da nalec ye na'alhua na cananeopi, nache ivitta'a ye Sarepta. Qaq nam noxonecpi maye lma' co'ollaxa ye Jerusalén maye hueta'a ye Sefarad, namayepi ỹacona qome ye huaqta'a't nỹecpi ye Néguev. 21Qaq nam dauegaxanpi qalaq tasheguema qome añi qasoxonaxa Sión, da yaqto' nmit nam shiỹaxauapi maye nalec aye qasoxonaxapi maye na'alhua so Esaú. Qaq huaña, nache de'era no'onataxanaxac, ilo'ogue qome Ñim Nataxala'.
Currently Selected:
Abdías 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.