Zacarías 2
2
Da nauanaqchec co'ollaq qaila'a so naloqnaxanaxat
1Qaltaq huo'o so lỹa ỹauanaqchec, aỹem sela'a so ỹale nasoqta'a so naloqnaxanaxat da huo'o na qanaloqten. 2Nache senat somaye, sheeta': «¿Hua'ague ca 'aigue?» Nache somaye aỹem ỹasateguet, 'eeta': «Aỹem ñeqo'ona ye huaqta'a't nỹecpi ye Jerusalén da ñaloqten da yaqto' saỹaten ye lalogaxa qataq ye lcateueegue.» 3Ime, nache sela'a da jec so namaxashec piguem le'ec maye aỹem detaqtague', nache so lỹa namaxashec piguem le'ec natena'aguet somaye, 4nache 'enapega som namaxashec maye aỹem nallegoqtot, 'eeta': «'Auachegaqañi da 'aucaalec se'eso nsoqolec, maye ỹachetac so naloqnaxanaxat da huo'o na qanaloqten, nache 'aua'aqtaxanem, qoneta': ‹Na Jerusalén qaltaq ỹe'eguelaxa qome da qanayenaña, qaq ỹataqta qalota qome na hueta'a shiỹaxauapi qataq na na'atetpi, nache ivitta'a qome da qaica ca lpaqtaxat. 5Cha'aye Ñim Nataxala' 'eeta', da la'aqtac: Aỹem sheeta'am qome ca norec da ñepaxattaua'a ye huaqta'a't nỹecpi ye Jerusalén, qataq sachaxan da ỹo'oxoyec da huangui na laiñi yi'iye huaqta'a't nỹecpi.›»
Ñim Nataxala' nca'alaxatec so lalamaxat nhuo' le'ecpi
6Ñim Nataxala' 'eeta', da la'aqtac: «Nache Aỹem maye qami' so'oteque co'ollaxa da qaulaquiilec ana 'alhua. Qalaxaye nagui qami' shenapegalo: ¡Sa qanaỹaloxoñi qome da qoquiỹa'ai ne'ena 'alhua maye pa'aigue da sheu'! 7Qoquiỹa'ai na Babilonia nam qoviita'a da qami' ncoñetegui'she, qami' maye qarmaye co'ollaxa ye Sión.» 8Cha'aye Ñim Nataxala' maye Qaica ca Ỹaqalanapec, aỹem namaq da sa'axatem da na'aqtac maye dataỹa'aguet na ỹotta'a't shiỹaxauapi, maye qami' nhuotte' co'ollaxa, qaq damaye, 'eeta': «Camachaqca ca dataỹa'aguet na ỹalamaxat nhuo' le'ecpi, nache camaye 'eeta'am da ỹacootegueua'a aca ỹauotaqte ỹale. 9Qaq ỹoqo'oye aỹem selogui' qome que'eca shiỹaxauapi, qataq so'otec da, ca maiche lalamaxat l-latacpi nhuo' camayepi.»
Qaq 'era da 'eetec da ỹachaxan da llo'oxoyec Ñim Nataxala' maye Qaica ca Ỹaqalanapec, qaq nache huaña qome da qauaỹacheñi da nacheñi Ñimaye da aỹem namaq. 10Ñim Nataxala' 'eeta', da la'aqtac: «¡Qauo'onaxañeetai' qome, souaxat da qantonaxaqui, qami' maye qarmaye na Jerusalén, cha'aye Aỹem ñanac qome da qami' sootanguilo! 11Qaq qom nvi' que'eca na'a'q, nache qalota qome na ỹotta'a't shiỹaxauapi nam quegue Ñim Nataxala'. Nache Ñimaye 'enapec qome: ‹Ne'ena ỹotta'a't shiỹaxauapi nataqa'en ỹalamaxatpi. Qaq Aỹem nache qami' sootanguilo qome.›»
Qaq huaña qome, nache qauaỹacheñi da Ñim Nataxala' maye Qaica ca Ỹaqalanapec nacheñi ñi aỹem namaq. 12Qaq Ñim Nataxala' qaltaq ỹe'eguelaxa qome da lalamaxat na Judá, maye huetaigui nam qui'itta 'alhua, qataq ỹe'eguelaxalec nataqa'en da ỹa'axatec da ye Jerusalén nacheye ye lca'aguishec. 13¡Qaq 'enauac qome na shiỹaxauapi maye netalec ana 'alhua, ỹataqta ỹe'emaqtom qom dataỹot Ñim Nataxala', cha'aye Ñimaye qomi' naỹalo qome, chegoqchiguiña añi qui'itta lalamaqte atamnaxaqui!
Currently Selected:
Zacarías 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.