Salmos 148
148
Da llo'oxonnataxanaxac nam lo'onatacpi Ñim Nataxala'
1¡Qaỹo'oxoren qome Ñim Nataxala'!
¡Qavio'oxoyiñi qome Ñim Nataxala', qami' maye qoviito'ot na piguem!
¡Qavio'oxoyiñi qome da qoviita'a na qaỹoqotcheguemec!
2¡Qavio'oxoreñi 'enauac qami' maye qami' lamaxashecpi Ñimaye!
¡Qavio'oxoyiñi 'enauac qami' maye qami' nalleppi Ñimaye!
3¡'Am nala', qataq 'am ca'agoxoic, qavio'oxoyiñi qome Ñimaye!
¡Qami' huaqaañipi maye qami' 'ettaiguipi, qavio'oxoyiñi qome Ñimaye!
4¡'Am piguem maye 'am qaỹoqotcheguemec, 'avio'oxoren qome Ñimaye,
qataq 'am 'etaxat maye qouetalec nam piguem!
5Qavio'oxoyiñi qome da le'enaxat Ñim Nataxala',
cha'aye Ñimaye co'ollaq ỹan da la'aqtac, nache yo'oq 'enauacna,
6Ñimaye ỹa'ayiñi 'enauac namayepi qaq nache sa deraỹai' naqa'en,
qataq lapaxañi da lqataxac maye saishet da qanaralaxat.
7Qavio'oxoyiñi qome Ñim Nataxala', qami' maye qoviitalec ana 'alhua,
qami' lta'araicpi shiguiỹacpi maye qoviitangui ana auaxai,
qataq 'am qaỹoqchiguingui auaxai.
8Qataq na nqashelgaxa, lache, aloñi qataq na sheue,
qataq na lta'araic la'at maye ỹalaxaguet da namaxasaguec.
9Ana qasoxonaxapi, ana lcomaraxalatepi,
ana qo'oipaqpi maye huo'o ana ala qataq 'enauac ana cedropi.
10Na shiguiỹacpi huauec qataq na ishet da nlo,
na maỹopi, qataq na hualectapigui'pi.
11Qataq na nta'alpi maye netalec ana 'alhua,
'enauac na ỹotta'a't shiỹaxauapi, qataq nam nataxala'pi
qataq na nta'alpi ana'ana 'alhua.
12Na nsoxoppi qataq na qa'ampi,
ỹa'axaiquipi qataq na ñaqpiolec.
13Qavio'oxoyiñi qome da le'enaxat Ñim Nataxala',
cha'aye nacherata da le'enaxat Ñimaye da Nataỹaña 'Enauacna,
da llo'oxoyec imattalec na piguem qataq ana 'alhua.
14Ñimaye ỹanem co'ollaxa da la'añaxac na lalamaxat nhuo' le'ecpi.
Qaq ñaq ỹo'oxoren qome 'enauac na pe'etegapi Ñimaye,
na Israel le'ecpi maye sa iỹotaique Ñimaye.
¡Qaỹo'oxoren qome Ñim Nataxala'!
Currently Selected:
Salmos 148: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.