Proverbios 16
16
1Ca ỹale lapaxañi na huotaique da ỹo'otpi,
qalaxaye Ñim Nataxala' nacheñi ñi ỹan ca pa'atec la'aqtac.
2Ca ỹale 'eeta'am naqa'en da 'onaxaic 'enauac na ỹo'ottacpi,
qalaxaye Ñim Nataxala', nacheñi ñi nmit na nhuennataxacpi.
3'Aupa'axano'ot Ñim Nataxala'
'enauac na 'anshetaique da 'auo'ot,
yaqto' ca 'alapaxañi da 'auo'ot, qalaq ipacchigui.
4'Enauac na lo'onatacpi Ñim Nataxala',
huo'o da maiche lataxac naqa'en,
nataqa'en ỹo'ot ca qauemaic da yaqto' taỹa'a
ca na'a'q maye huetoigui ca nhuaxanaguecna.
5Ñim Nataxala' saisheteguet na ño'oxonnaxaicpi,
ỹoqo'oye taỹa'a naqa'en da ỹauo'o ca nhuaxanaguec.
6Da qaỹapalaxat ca nasouaxashet
qalaq qaỹauota'a da nauotaxanaqtaic
qataq da 'eesa lataxac.
Qataq da huo'o naq 'enec qanqa'en Ñim Nataxala',
nache ỹo'ot da qanayeca'ai na qauem.
7Ñim Nataxala' da ỹaỹamaxareeta da no'on lataxac ca ỹale,
nache ivira'a na mpa'aguenaxauapi camaye
ishet da nmane' naqa'en.
8Na'aictoxo' da saq 'amaqtaq ca naueguec,
qalaxaye maiche na'añaqtegueshec,
qaq saq 'ena'am ca qalota naueguec maye
chegaqaigui ca sa lataxac.
9Ca shiỹaxaua lapaxañi ca huotaique da llecỹaxac,
qalaxaye Ñim Nataxala' nacheñi ñim ỹo'otegue da lqauaxac.
10Ca nta'a da detaqa qalaq 'eeta'am
da nacheñi Ñim Lo'onatac 'Enauacna,
ỹoqo'oye da huo'o ca ỹo'ot lataxac
qalaq sa depe'enaxan.
11Aca nalochiguiñi naloqnaxanaqte,
qataq naloqnaxanaxaqui,
acamaye lalamaqte Ñim Nataxala',
cha'aye 'enauac ana naloqnaxanaqtepi
maiche lo'onata Ñimaye.
12Na nta'alpi qalaq sa ỹaỹamaxaren na qauem qaỹo'otpi,
cha'aye da lo'onataxanaxac da nta'a
na'attalec da nalochiguiñi lataxac.
13Na nta'alpi ỹaỹamaxareeta ca no'o'n naua la'aqtaqa,
qataq 'eesora naua la'aqtaqa.
14Da lalemataic ca nta'a ỹa'axata'a da nleuaxa,
qalaxaye naua la'aqtaqa ca ỹaanaxanaxaic
ishet da nmanaqchet camaye.
15Da lamaicỹaxac ca nta'a chegaqaigui da nca'alaxa,
qaq da lqouagaxanaqtaic qalaq 'eeta'am na lo'oc
maye chegaqaigui ca auot.
16Ỹoqta ỹactec da 'onaxaic da qaỹaconeguet
da naỹaanec, qaq saq 'ena'am ca oro,
qataq da nauattonaxanaxac, napacalec na lcat plata.
17Da llecỹaxac ca no'on da lataxac,
qalaq qaỹoqtaique naqa'en na qauem,
qaq ca ntela'a da maiche no'on lataxac
qalaq maiche ntel-la't.
18Da 'amqaanaxac,
nca'atalec da nlaguiñi naqa'en ca qaỹo'ot,
qataq da ime da pagaqaanaxac
nache qataq anac da que'eenaxac.
19Ỹataqta ỹactec da 'onaxaic da sa na'amaqten ca ỹale,
da ỹalectaigui na choxoraqpi, qaq saq 'ena'am
da qanhuanaua'a na lhuotaxanaxatpi
na na'amqaanaxaicpi.
20Ca ỹaỹaten da ilo'ogue ca lo'onataxanaxac
qalaq camaye ỹataqta nquictasheguem,
qataq ỹataqta machiguiñi ca pi'iỹa'a Ñim Nataxala'.
21Ca ỹaanaxanaxaiqa naua lhuennataxaco
qalaq camaye qaỹamata'ac da ỹaanataxanaxaic,
qaq naua na'aqtaqa soxoraiqa, qalaq nquigaxatec na qaỹaỹaten.
22Da nauattonaxanaxac chegaqaigui da lca'alaxa ca hueto'ot damaye,
qaq da nhuaxanaguec ca qaica ca ỹaỹaanapec
qalaq chegaqaigui da maiche no'oopashaxac.
23Ca naỹaanaxanaqchen da deuennataxaatac
camaye ỹaỹateeta ca nasaxauec la'aqtac,
qataq naua la'aqtaqa saishet da qaiqoleguetai'salo.
24Naua 'onaxaiqa na'aqtaqa
'eeta'ama na te'esaq lli'i da lamaic,
naamaye ỹo'ot da lamaic da achaalataxac,
qataq ỹo'ot da la'añaxac da no'ocỹaxac.
25Huo'o ca nqa'aic maye 'eeta'am da ỹashectec,
qalaxaye ca loga't camaye huetaña da nleuaxa.
26Da lamanaxanaqtaic ca 'onataxanaxaic
nachera da ỹa'añaqchet da do'onataxan,
qataq na lqouaxa maye nanomtapeeguet
nachera na ỹamaq camaye.
27Ca qauemaic nmitta'ai na qauem,
qataq naua la'aqtaqa 'eeta'ama na le'eraxa ca norec.
28Ca qauem da lataxac qalaq ỹo'ot da loquiaxac,
qaq ca na'aqtaqa lo'o' qalaq ỹo'ot da pa'aguenaxac.
29Ca sancherapec ỹatenachet ca lỹa,
qataq ỹashaxaneuga ca nqa'aic qauem.
30Ca naquiaxaalec ana la'aite qache lhuennataxa da ỹo'ot ca qauem,
qataq ca inaigui na alac qache mashe ime da ỹo'ot ca qauem.
31Ana napagaxai nachana ana ỹo'oxoren da nqueroxo,
qataq anamaye 'itchiguiñi da laueque ca
ỹaỹamaqchiguiñi da lataxac.
32Ỹataqta huo'o da naigui da nhualaxavic
qaq saq 'ena'am da na'añaxac,
qataq huo'o da naigui da maiche nllapec ñi 'oonolec,
qaq saq 'ena'am da noxonec ca huaqta'a't nỹecpi.
33Ca ỹale maiche ỹo'ot ca nalletaxac
da yaqto' huo'o ca na'achecỹaxac,
qalaxaye Ñim Nataxala' nacheñi ñi ỹan ca pa'atec la'aqtac.
Currently Selected:
Proverbios 16: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.