Colosenses 4
4
1Qaq qami' 'aco'pi, ỹataqta qauo'oche ca ỹaỹamaqchiguiñi, qataq ỹataqta qaupagaqñiichigui da nsheetenaguec ca qarlataqui. Qami' qauennachiỹa'a da nataqa'en huo'o ñi qana'aco'oi maye neta'ague da piguem, Ñimaye nacheñi Ñi Jesucristo maye Nataxala'.
2Qami' ỹataqta qoquiito'ot qome da qanqouagaxaunaxaqui. Qanloitec, qataq qaỹa'añiitacot da qana'achecỹaxaqui Ñim Lo'onatac 'Enauacna. 3Qataq nataqa'en qomi' qanqouagaxauñiitaleguete, qauỹaxañiitacot Ñim Lo'onatac 'Enauacna da yaqto' qomi' huesochiyiñi da sa'axataq da na'aqtaxanaxac qataq da saqcha'a maye 'eetapeguec So Cristo. Dam sa'axattac nagui qataq da huo'omshe aỹem qaicoñettai'. 4Qaq qanqouagaxauñiitac qome, yaqto' aỹem ỹataqta ishet da sa'axattegue ca lataxac de'era na'aqtac, cha'aye damaye nachera da ỹo'onataxanaxac.
5Qataq ỹataqta qanaỹaanaxanaqchiñi da qautaqaitague' nam saxanaxa da da'amqaanataxan. Ỹataqta qauqopitaxañiỹa'ape naua na'axa'te, da huo'o ca qardaqa'ai. 6Naua qartaxaỹaxacolli' ỹataqta qaỹaỹamaxareete' qataq ỹataqta qanqopitalo. Ñi 'oonolec da qoñiita iuen da ỹaỹaten da ỹaỹamaqchiguiñi ca lasataxac da ỹasateguet ca 'oonolec namayepi.
Da pa'atec nquinaxanaxac
7Qaq ñim qanauochaxaua qarqaỹa Tíquico maye ỹataqta qarpe'et qataq qaro'onataxanaxaua da so'onataxanaqot So Qarataxala', ñimaye qami' ỹa'axatema ca qara'axaỹaxaqui da sheeta. Ñimaye nache 'eetai' naxa da aỹem itauaatac da so'onataxanaqtacot So Qarataxala'. 8Qaq ỹoqo'oye qami' samaxalo ñimaye, da yaqto' qami' ỹa'axatema da 'eetec da shenaqta, qataq da yaqto' qami' ỹa'añaqche't. 9Qaq ñimaye nnaictague' qome ñi Onésimo ñim qanauochaxaua qarqaỹa qataq qarpe'et. Ñimaye maiche qami' chegoqtoiguilo co'ollaxa. Qaq ñimaye qami' da'aqtaxanema qome 'enauac nam hueta'a ne'ena souaqta'a.
10Qaq ñim Aristarco maye ñecoñetaxaua, ñimaye qami' ỹamaxalo da lquinaxanaxac, qataq ñi Marcos ñim la'ac lqaỹa ca Bernabé. Qaq mashe qami' seqattegueleguete da qami' namaqtegalo ñimaye, nache saishet da sa qauloiguet. 11Nataqa'en qami' ỹamaxalo da lquinaxanaxac so Jesús, da le'enaxat lỹa Justo. Nam 'amqaanataxanaxaicpi judiopi, qalaq nachaqnauate' naamaye da aỹem itauaata'ape da ỹo'onataxanaxac da sa'axattac da lo'onataxanaxac Ñim Lo'onatac 'Enauacna qataq nachaqnauate' aỹem ỹa'añaqchetta'ape. 12Nataqa'en qami' ỹamaxalo da lquinaxanaxac ñi Epafras. Ñimaye nataqa'en lamaxashec So Jesucristo, qaq ñimaye maiche qami' chegoqtoiguilo co'ollaxa. Qaq ñimaye nache 'eetai' naxa da qami' nqouagaxaueetaleguete da yaqto' qaica ca da, qataq da yaqto' ỹataqta qanañañiỹot Ñim Lo'onatac 'Enauacna qataq da qauo'oche cam 'eetapeguec Ñimaye. 13Cha'aye aỹem ỹataqta sauaachigui da ñi Epafras ỹataqta qalota da lhuogoxo, souaxat da qoñiita, nataqa'en nam netaña ye nỹecpi ye Laodicea qataq ye Hierápolis. 14Nataqa'en ñim qarauotaxat qarqaỹa Lucas maye natannaxanaq qami' ỹamaxalo da lquinaxanaxac, qataq ñi Demas.
15Qataq qaỹa'añim qome da iquinaxanaxac ca qarqaỹañicpi maye netaña ye nỹecpi ye Laodicea. Qataq qaỹa'añim nataqa'en da iquinaxanaxac aca Ninfas qataq caua 'amqaanataxanaxaiqa maye laponqa' ye lma' acamaye naxa da ỹo'oxore'n Ñim Lo'onatac 'Enauacna. 16Qaq qom ime da qautaxaỹaxañi ana'ana ỹere, nache qauamaqaỹa qome na 'amqaanataxanaxaicpi maye netaña ye nỹecpi ye Laodicea, da yaqto' nataqa'en itaxaỹaxan. Qataq nataqa'en qautaxaỹaxañi qome aca ỹere maye samaxa yemaye. 17Nataqa'en qoñiỹapega qome ca Arquipo, qoñiita': «Ỹataqta 'auaỹamaxatchiguiñi qome da 'aro'onataxanaxac maye 'am ipataxalec So Qarataxala'.»
18Qaq aỹem Pablo maiche semapegue' da shiyiñi de'era, 'eeta': «Nataqa'en qauennachiỹa'a da aỹem qaicoñettai'. Ỹataqta huo'o da lyaxa da iquiyaqteỹaxac da Ñim Lo'onatac 'Enauacna qami' ỹaaleguete ca lta'araic lqouagaxanaqtaic.» Aja', nache 'eetec.
Currently Selected:
Colosenses 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.