Hechos 28
28
So Pablo hueta'a añi ỹaqa'ata 'alhua le'enaxat da Malta
1Qaq co'ollaq mashe 'enauac da ñeca'alaxauec, nache saỹaanaq da le'enaxat yi'iye 'alhuolec, da Malta. 2Qaq nam lma' yemaye ỹataqta qomi' ilo'ogueta. Ỹoqo'oye qaỹalooñi so norec lta'araic, souaxat na latomaxa qataq so auot. Ime, nache qomi' 'enapegalo da 'enauac ñeqochenaxaua'a so norec, da yaqto' ñetonaq. 3Nache so Pablo laỹootega't na qo'oipaq ltoxoicpi, nache ỹasaqtangui so norec. Nache som na'araxanaq maye dataueeguesop na le'eraxa so norec, inaigui na lhuaq so Pablo. 4Nache nam lma' se'eso 'alhua co'ollaq ỹauaachigui se'eso na'araxanaq da netaua'a na lhuaq so Pablo, nache somayepi 'enapeco':
–De'era ỹale ỹoqta da laataxanaxaic, ỹoqo'oye na'aictaxa da ỹet na 'etaxat, qalaxaye dam nhuaxanaguec maye 'itchiguiñi saishet da ỹashenem da nca'altauec.
5Qalaxaye so Pablo ichegoxongui so norec se'eso na'araxanaq. 6Nache 'enauac somayepi iuatta'a da huo'otaq somaye nalauat na lhuaq, huo'otaq da nque'elaxatta da huañi da ileu. Qalaxaye co'ollaq mashe qaỹoqtegue da qaiuatta'a, nache co'ollaq qaila'a da qaica camachaqca, nache somayepi naralaxat da lhuennataxa. Nache qoỹeetega somaye da nachena na chegaqasheguem 'añaxaic maye ishet da qanatamnot.
7Qaq se'eso qanayeeta'a nache saqaỹapeque so na'alhua som ỹale maye 'amaqtaqaic, somaye le'enaxat da Publio. Nache somaye qomi' ỹaconegueta, nache ỹataqta qomi' huetapegueto se'esoua tres na'axa'te. 8Qaq somaye so lta'a sa no'on, huetalec ca lmala', huo'o na le'eraxa qataq iuet na lauel. Nache so Pablo jec da nqo'ona somaye. Qaq co'ollaq ime da natameeteguelec somaye, nache ỹashel-lec, nache no'oita naqa'en. 9Huaña, nache anac nataqa'en nam laỹepi sa no'on maye lma' aña'añi ỹaqa'ata 'alhua, nache so Pablo 'enauac no'oita naqa'en. 10Nache somayepi ỹataqta qalota da llo'oxonnataxanaxac da shenaqta. Qaq can ime, nache qaltaq qolaq, nache somayepi qomi' ỹanema 'enauac na qarhuenec de'era qoyecỹaxac.
So Pablo ivita ye Roma
11Qaq can mashe inoxoore'c soua tres ca'agoxoiqa da souaqta'a añi ỹaqa'ata 'alhua. Nache qaltaq senotaxaua'a aso notaxaqui maye quiguingui na 'etaxat maye nale'ena da hueta'a yemaye, iuatta'a da inoxonec so no'omaxa. Asa'aso notaxaqui, asomaye lashe ye Alejandría, asomaye huetangui na trigo, qaq na hua'auta nache huetaleguete soua ne'enaqtaqa maye lqui'i soua ỹo'oxoreeta'ape yemaye, le'enaxat da Cástor qataq so Pólux. 12Qaq can seviraxa ye ñegaxasom le'enaxat Siracusa, nache tres na'axa'te da souaqta'a. 13Qaq huaña yemaye, nache qolaqto'ot so loigue, choche seviraqta'a ye nỹecpi le'enaxat da Regio. Qaq so lỹa na'a'q, nache nashiiyisheguem so la'at nte. Qaq ỹoqo'oye so lỹa na'a'q nache cheta'ague da sevitaxa ye ñegaxasom le'enaxat da Pozzuoli. 14Nache huaña, qaq huo'oi soua ñatenaqaleguete qarqaỹa't, nache soomaye qomi' 'eetegalo da seviraxataqtre'c caua siete na'axa'te da souaqa'a yemaye. Qaq can ime, nache qaltaq qolaq da saxague da Roma. 15Qaq som qarqaỹañicpi maye netaña ye Roma mashe huo'o da la'axaỹaxac da shenaqta; nache somayepi qomi' huaqata'agueta. Huo'o na nqattauga ye ntaxaỹaqa' maye le'enaxat Apio, qataq yem le'enaxat tres mataqa'ate. Qaq can ilaigui somayepi so Pablo, nache ỹanot da na'achec Ñim Lo'onatac 'Enauacna, nache ỹataqta nomteguet da la'añaxac. 16Qaq can seviraxaua'a ye nỹecpi ye Roma, nache som huataxanaq lta'a ỹaneua'a na ncoñeteguishecpi som ilotague' aso ncoñetaxanaxaqui. Qalaxaye so Pablo ỹaqa'a ca netaña qanqa'en, qalaxaye qaỹauo'o so nhuataxaua.
So Pablo ỹa'axattac da no'on na'axaỹaxac hueta'a ye Roma
17Qaq can mashe ivi' tres na'axa'te da souaqta'a ye Roma, nache so Pablo damaxasoxoneuga nam lataxala'pi na judiopi maye netaña yemaye. Qaq can mashe laỹoota'a't somayepi, nache so Pablo 'enapega, 'eeta':
–Qami' ỹaqaỹañicpi, aỹem na'aictaxa co'ollaxa da qaica ca so'otec na qarhuo' judiopi, qataq qaica da ñepa'agueetega da lataxac som hua'au qarta'alpi, qalaxaye ñaqaiyeta namayepi aỹem icoñi' can huaña ye Jerusalén, nache aỹem ỹaneua'a na nta'alpi na Roma le'ecpi. 18Qaq can ime da aỹem qaichemaxattega, nache qaỹauotaique da aỹem qaỹachaxanec, cha'aye qaica ca qaỹanata ỹasouaxashet cam ishet da chegoqchigui da qaỹauo'o ca ñalaataguec. 19Qalaxaye nam judiopi sa ỹaỹamaxaren da aỹem qaisouec. Huaña, nache aỹem seỹaxaneua'a da aỹem nmit ñim nta'a maye naña na Roma, qaq na'aictaxa da aỹem qaica ca sasaxalec lasouaxashet na ihuo' le'ecpi. 20Qaq nachera da huo'omshe qami' seỹaxaneugalo, da yaqto' qami' ñauaneto, qataq qami' setaxaỹapegueto. Cha'aye nachera dam 'enauac qanaquitaxac qomi' Israel le'ecpi, da huo'omshe aỹem qaicoñetta'aque ne'enaua ique'ete.
21Nache qoỹeetego' somaye, qoỹeeta':
–Qomi' qaca aca qomi' nvitalo nere da chegaqa'ague da Judea da huo'otaq 'am qaỹa'axattac, qataq nam nvittac qarhuo' le'ecpi qaica da huo'otaq huo'o ca 'am ỹa'axattac da huo'o ca 'arasouaxashet. 22Qaq ỹoqo'oye qomi' sauoqtaique da 'am ña'axaỹaxanaxa ca 'eetec ca 'arhuennataxac. Cha'aye saỹaanaq da 'enauaque naua 'aleu' qanpa'agueetega de'era dalaxaic na'amqaanataxanaxac maye 'aua'axattac.
23Qaq ỹoqo'oye qaỹauo'o so naloqnec na'a'q. Qaq co'ollaq ivita se'eso na'a'q, nache ỹataqta qalota na shiỹaxauapi na nvita ca netaña so Pablo. Nache ỹachegoxottot se'eso nte'eta, choche ivitta'a so avit, da ỹa'axattapeguem somayepi da lo'onataxanaxac Ñim Lo'onatac 'Enauacna. Ỹataqta quetapegueua'a somayepi da ỹa'amaqten naqa'en So Jesús, nache ỹa'axattac nam namaxasoxonaxacpi maye chegoqo'ot so Moisés qataq nam la'aqtaxanaxac som la'aqtaxanaxanecpi Ñim Lo'onatac 'Enauacna. 24Nache huo'o na ỹa'amaqten da la'aqtaxanaxac so Pablo, qataq huo'o na saishet da ỹa'amaqten. 25Qaq cha'aye saishet da 'eeta'a't somayepi, nache huo'o na jec. Nache so Pablo 'enapeco':
«Ỹataqta tachigui da la'aqtaxanaxac So Saqcha'a Na'añaxac Qui'itta co'ollaq ỹachegoxotchigui so Isaías da 'enapega naqa'en so hua'au qarta'alpi, 'eeta':
26‹'Asoma, 'aua'aqtaxanem
qome ne'ena shiỹaxauapi, qoneta':
Qami' na'aictaxa da qaua'aqaitac,
qalaxaye saishet da qauaỹaañi cam qaỹa'axattac.
Qataq na'aictaxa da qanloitauec,
qalaxaye saishet da huo'o ca qauloỹa'a.
27Da qarquiyaqteỹaxaqui ỹataqta qaramchigui,
qataq saishet da qaua'aqai,
qataq sa nauaayiñi naua qara'ai'chilli'.
Ỹoqo'oye saishet da huo'o ca qauaỹaañi,
qataq saishet da huo'o ca qauloỹa'a,
qataq saishet da huo'o ca qaua'aqaỹa.
Qataq saishet da aỹem qavi'eguelaqaỹot,
da yaqto' Aỹem qami' ñatare'n.›
28-29Qaq da pa'atec la'aqtac so Pablo 'eeta': ¡Ỹataqta 'eesa da Ñim Lo'onatac 'Enauacna da huotaique da nca'alaxatec nam saishet da judiopi! ¡Cha'aye namayepi ỹataqta na'axaỹaxan!»#28.28 Cha'aye namayepi ỹataqta na'axaỹaxan: Huo'o co'ollaxa aso togoshe lerepi na griegopi da ỹalecneuo so na'aqtac hueta'a ye versículo 29: Qaq co'ollaq ime de'era la'aqtac so Pablo, nache so judiopi jec, qalaxaye maiche taỹa't da ncotatega't.
30Nache so Pablo ỹataqta iviraxattre'c soua dos vi'iye da hueta'a yemaye, netaigui so nỹec maye choche isheetetac. Nache ỹataqta ilo'oguet 'enauac nam natapegueua'a somaye da nauane'. 31Nache ỹataqta qaica ca ñe'etaique da ỹa'axattac da lo'onataxanaxac Ñim Lo'onatac 'Enauacna, qataq dapaxaguenataxaatapeguec So Qarataxala' Jesucristo maye Lca'aguishec Ñim Lo'onatac 'Enauacna. Ỹataqta qaica ca naxattac da la'aqtaxanaxac.
Currently Selected:
Hechos 28: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.