Hechos 27
27
So Pablo qaỹamaxague da Roma
1Qaq co'ollaq mashe qanasachigui da qomi' qaỹamaxaregue da Italia. Nache so Pablo qataq so laỹepi ncoñeteguishecpi qaỹamaxaguet so huataxanaq lta'a le'enaxat Julio, som ilotague' so huataxanaqpi maye qaỹamata'ac nalleppi so nta'a Augusto. 2Nache qomi' qaỹauegueraxaama ye ñegaxasom le'enaxat da Adramitio. Nache huaña qaq senotaxaua'a aso notaxaqui maye quiguingui na 'etaxat, asomaye huenoxonec da taigue da 'alhua Asia. Qaq qomi' hueta'agueta nataqa'en so Aristarco maye lma' ye nỹecpi ye Tesalónica maye huaigui ye 'alhua Macedonia. 3Qaq so lỹa na'a'q, nache seviraxa ye ñegaxasom le'enaxat da Sidón. Qaq yemaye nache huaña da so Julio ỹataqta ỹaỹamaxatta so Pablo, nache ỹasheetem somaye da yaqto' namaqtega na nauochaxauapi maye lma' ye Sidón, qataq ỹasheeta da somayepi ishet da itauan so Pablo. 4Qaq can sachegoxosoqchiguiña ye Sidón, nache sataqteguet so la'at. Qaq ỹoqo'oye qolaqto'ot na loigue añi ỹaqa'ata 'alhua le'enaxat da Chipre da yaqto' npaxatta'aguet so la'at. 5Ime, nache qolaqto'ot na loigue aso auaxai, ỹoqo'oye ñelegaqtot ye 'alhua Cilicia qataq ye Panfilia, nache seviraqta'a ye nỹecpi le'enaxat da Mira maye huaigui ye 'alhua Licia.
6Qaq huaña yemaye, nache so huataxanaq lta'a Julio, ỹanata aso notaxaqui maye quiguingui na 'etaxat lashe ye Alejandría, asomaye taỹa'ague da Italia. Qaq nachaso aso qomi' inotaxanaxaneua'alo, nache qaltaq qolaq. 7Qaq ỹataqta huo'oi soua na'axa'te da qolaqta, choche ñeqochenaqtapigui', qataq ỹataqta huo'o da qanqallegotaxac, choche seviraqta'a ye ñegaxasom maye naña ye Gnido. Qaq cha'aye ñaq huo'o so la'at sataqta'aguet, nache saqteuga ye naloteuga añi ỹaqa'ata 'alhua le'enaxat da Salmón, nache choche ñeconnaqteua'a añi ỹaqa'ata 'alhua maye le'enaxat da Creta. 8Qaq ỹataqta huo'o da qanqallegotaxac co'ollaq qolaqto'ot so loigue, choche seviraqta'a ye le'enaxat 'Onaxaic Ñegaxasom. Yemaye nache saqaỹapeque ye nỹecpi ye Lasea maye nataqa'en nalec añi ỹaqa'ata 'alhua le'enaxat da Creta.
9Qaq mashe huo'o da lchec da qolaqto'ot da qolaqtangui na 'etaxat, cha'aye mashe nvi' so no'omaxa qataq mashe qaỹoqteguelo soua na'axa'te, qaq ỹoqo'oye so Pablo ỹauo'o so lqataxac da ỹami' 'enauac na netangui aso notaxaqui 'eeta':
10–Qami' ỹalleppi, aỹem sela'a de'era qoyecỹaxac da ỹataqta huo'o da lchec. Ishet qome da huo'otaq deqat ana qannotaxaqui qataq na lla'ac, qataq ivira'alo qomi' ishet qome da seqataq.
11Qalaxaye so huataxanaq lta'a saishet da ỹalaxaguet so Pablo, nda'a't da ỹapagaqnauec dam la'aqtac som lalamaqte aso notaxaqui qataq som lo'o asomaye. 12Cha'aye yi'iye ñegaxasom saishet da 'onaxaic da qanayeeta'a da ivita ye no'omaxa, cha'aye yemaye ỹataqta llec naua la'a'che. Qaq ỹoqo'oye 'enauac da nhuennataxac da qanqo'ona ye lỹa ñegaxasom maye naña ye Fenicia, da yaqto' nache qanayeua'a yemaye se'eso no'omaxa. Yi'iye Fenice nache nalec añi ỹaqa'ata 'alhua le'enaxat da Creta, qaq yemaye ishet da qotateuga da avit qataq da taguiñi.
So la'at lta'araic maye huangui aso auaxai
13Qanache lapaxauo so la'at nte, qalaxaye saq chaxaguet. Nache somayepi ipi'itaxano' da mashe ishet da qaltaq jec. Nache qaltaq jec, qanayecto'ot na loigue añi ỹaqa'ata 'alhua le'enaxat da Creta. 14Qalaxaye co'ollaq qaỹata'ague, nache lapaxauo so la'at lta'araic quenaquiaxaic, nache ỹataqta iuaxanot aso notaxaqui. 15Nache ỹataqta ivira'a da ỹache. Qaq cha'aye saishet da ñaloxoguet so la'at, nache sa'axasoqta'a da qomi' ỹache'. 16Nache choche qomi' iviraxattra'ague da laỹe añi ỹaqauga 'alhuole le'enaxat da Cauda. Nache huaña, qaq saqallegueme da chaxaguet so la'at, cha'aye npaxata'aguet añimaye. Huaña, nache ỹataqta ñeqallegotaqtague' aso secoñeraqtauo qarllocta da sepenaqangui aso qannotaxaqui. 17Qaq can ime da sepenaqasheguem asomaye, nache somayepi ỹacona so nañec, nache qoỹaxachigui na lasot aso notaxaqui, da yaqto' ỹa'añaxatta'a't. Qaq can ime, nache ỹataqta huo'o da ncolanaxa da huo'otaq qotaalec aso lapona na delec, le'enaxat da Sirte. Qaq ỹoqo'oye qanqaayiñi soua la'at lo'ol, nache qoỹaxaneueegue aso notaxaqui da ỹaỹoxonaqchet so la'at. 18Qaq so lỹa na'a'q, cha'aye ñaq queta som la'at qataq nquiguec da ỹataqta lta'araic, nache somayepi ỹasaxauec na lla'ac aso notaxaqui, qaỹasaxangui aso auaxai. 19Qaq can mashe ivi' soua tres na'axa'te, nache sasaxasoqtangui na 'etaxat na maiche logoxoshetpi aso notaxaqui. 20Qaq mashe qaỹoqteguelo soua na'axa'te da saishet da ñauanaxai' aso nala' qataq ana huaqaañipi, qataq souaxat so la'at da ỹataqta ỹaguec da lta'araic maye qomi' ỹaỹoxonaqchetta'ape, nache mashe imeuo 'enauac da qanaquitaxac da ñeca'alaxauec.
21Qaq mashe qaỹoqtegue da saishet da sequia'aq, nache so Pablo nachaangui na laiñi, nache huo'o so la'aqtac da talec 'enauac da shenaqta, 'eeta':
–Qami' ỹalleppi, 'onaxaictoxo' co'ollaxa da aỹem qaualaqaiguet da sa qolaqa'ai ye Creta, da yaqto' saishet da ñeque'etaxanaxagui de'era, qataq da huo'o na deqatpi. 22Qalaxaye nagui qami' shenapegalo da qana'añaxache qome saishet da qauaquicoitac, cha'aye saishet da huo'o ca 'oonolec da qoñiita da ileu, nachaqanata ana qannotaxaqui da deqat. 23Shecpe aỹem nachaxana so chegaqasheguem lamaxashec Ñim Lo'onatac 'Enauacna maye sooto'ot qataq so'onataxaatacot. 24Qaq somaye aỹem 'eetega, 'eeta': «Saishet qome da 'añe'etac, 'am Pablo, cha'aye 'am 'anachaateua'a qome ñi nta'a maye neta'ague da Roma. Qaq souaxat da qoneta, nache Ñim Lo'onatac 'Enauacna nca'alaxateeguesop qome da l-leuaxa 'enauac nam 'anqotta'ai'pi ana notaxaqui.» 25Qaq ỹoqo'oye qami' ỹalleppi, qana'añaxache qome, cha'aye aỹem ỹataqta huo'o da ipi'iỹaxac Ñim Lo'onatac 'Enauacna, qataq ỹataqta 'eesa ñaqa'en da ipacchigui dam 'enapec so lamaxashec piguem le'ec. 26Qalaxaye qomi' saỹoxonaqalec qome aca ỹaqa'ata 'alhuole.
27Nache huo'o so 'oonolec pe co'ollaq mashe ivi't naua catorce na'axa'te da qolaqta, qaq ñaq souaqtangui aso auaxai le'enaxat Adriático, choche qomi' ỹaỹoxonaqchetta'ape so la'at. Qaq co'ollaq mashe laiñi so pe, nache so lo'opi aso notaxaqui noma da mashe saqaỹapeque ca 'alhua. 28Nache qanaloqten ye lshecchiguiñi na 'etaxat, nache mashe ivi' treinta y seis metros. Qaq can qaltaq qanaloqten, nache mashe ivi' veintisiete metros. 29Nache ỹataqta huo'o da ncolanaxa da huo'otaq aso notaxaqui huo'o ca ỹe'egueneguet na coma'. Huaña, nache qaỹasaxayiñi soua cuatro lca'ache maye nca'attrauo da yaqto' nllañi aso notaxaqui. Nache somayepi ỹataqta huo'o da lcolanaxa, nache qaỹayeeta'a da yo'oxoñi qataq qaiỹaxaatacot Ñim Lo'onatac 'Enauacna. 30Huaña, nache som ltauapi so lo'o aso notaxaqui, somayepi huotaique da no'otauec. Qaq ỹoqo'oye somayepi nache huotaique da ỹasaxangui so 'etaxat aso l-llocta, qaq choche datenataxangui da huotaique da ỹasaxayiñi cam nllerañi aso notaxaqui na hua'auta. 31Qalaxaye so Pablo icoyeguen som huataxanaq lta'a qataq so nalleppi, 'eeta':
–Ne'enapi da huo'otaq huenoteeguesop ana notaxaqui, nache qami' saishet qome da qarca'alliiuec.
32Nache so huataxanaqpi icheguec so lquet aso nllocta, nache tangui qanqa'en so 'etaxat.
33Qaq so mashe qaỹata'aguet so na'a'q, nache so Pablo 'eetega 'enauac so laỹepi da yaqto' deque'e, 'eeta':
–Nagui mashe ivi' naua catorce na'axa'te da qami' saishet da qauo'oche qataq da qauqui'i souaxat dam ỹataqta lta'araic qarhuogoqoi dam souaqaigui. 34Qaq ỹoqo'oye nagui qami' ñachoxonnoiguilo da no'on da qauqui'i. Cha'aye iuen da huo'o ca qara'añaxaqui, cha'aye qaica ca ileu souaxat de'era souaqaigui.
35Qaq co'ollaq 'enapec de'era so Pablo, nache ỹacona aso nauole, nache ỹaatacot da na'achec Ñim Lo'onatac 'Enauacna, ỹauaachigui 'enauac somayepi. Ime, nache ncolaxaañi aso nauole, nache deque'e. 36Ime, nache 'enauac somayepi huo'o da la'añaxac, nache nataqa'en deque'e. 37Qaq ye lcata 'enauac qomi' maye sonaqtangui aso notaxaqui, seviraq doscientos setenta y seis. 38Qaq can ime 'enauac da qarquia'axac, nache na trigo qaỹasaxangui aso auaxai, cha'aye qaỹauotaique da sa desalli aso notaxaqui.
Iyiiñi aso qannotaxaqui
39Qaq can mashe yo'oxoñi, nache som lo'opi aso notaxaqui ỹataqta nhuala'a so 'alhua. Qalaxaye qailota'ata so ltogaxasom. Nache qaỹauotaique da huo'otaq ishet da iviraua'a qanqa'en aso notaxaqui. 40Nache qaicheguere'c soua lque'ete maye nlletrañi aso notaxaqui, nache qaỹalatrangui aso auaxai, qataq qaisore'c soua lque'ete soua nlloctaxanaqa'ate soua ishet da ỹashaxaatreguiñi aso notaxaqui, qataq qaỹaviguisheguem aso la'at lo'o maye hua'auta, qaq so la'at nache ỹamaq aso notaxaqui. Nache asomaye ishet da nqocheeta so loigue. 41Qalaxaye qotaalec som huaña da huo'oi soua dos la'auaxaco. Huaña, nache aso notaxaqui ỹe'egueelec aso delec, nache nam lqaic ỹataqta llapchiguiñi, nache saishet da deraỹapigui'. Nache na nca'ataxaatac aso notaxaqui ỹataqta colaqtac, souaxat da la'añaxac ana lapaxa na 'etaxat. 42Nache so alleppi huotaique da ỹalauat na ncoñeteguishecpi da yaqto' saishet da huo'o ca daloxonec da no'otauec. 43Qalaxaye som lta'a so huataxanaqpi huotaique da nca'alaxatec so Pablo, nache saishet da ỹashenem somayepi da dalaataxan; chaqrata da ỹan da la'aqtac da ca ỹaỹaten da laloxonaxac, nache ishet da hua'auta'ata so 'alhua da daloxoota. 44Qaq na laỹepi qalaq ishet da nca'attauo, daloxoolec na qo'oipaq laỹepi, huo'otaq na laỹepi aso notaxaqui. Qaq 'era da 'eeteque qomi' da seviraqa'ata so loigue 'enauac ñeca'alaxauec.
Currently Selected:
Hechos 27: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.