3 Juan 1
1
Da lquinaxanaxac so Juan
1Aỹem maye aỹem nataxala' qataq selotague' nam ỹa'amaqten So Jesús, samaxa ana ỹere ca ñauochaxaua ỹaqaỹa Gayo:
2'Am ỹauotaxat ỹaqaỹa, ñachoxoreetacot Ñim Lo'onatac 'Enauacna da yaqto' 'am ỹami' ca no'on 'icỹaxac, qataq seỹaxaatacot Ñimaye yaqto' saq na'aigue 'enauac nam 'auo'ottacpi qataq saqca cara da 'anachaalataxac.
Da no'on lataxac so Gayo
3Ỹataqta lta'araic da ñetonaxac co'ollaq huo'o na nvira aỹem nam 'amqaanataxanaxaicpi, nache aỹem da'aqtaxaatapeguem, da 'am qoqueto'ot da 'arpi'iỹaxac, dam 'eesa lataxac maye qomi' ỹapaxagueneque So Jesucristo. 4Qaica ca lỹa ỹo'ot da ñetonaxac da saỹaten da na ỹalaqpi, nache 'eetai' da ỹo'ottac dam 'eesa lataxac, maye qomi' ỹapaxagueneque Ñim Lo'onatac 'Enauacna.
5'Am ñauochaxaua ỹaqaỹa, ỹataqta ỹaỹamaqchiguiñi da 'arataxac, da 'autauaatac nam laỹepi maye nataqa'en ỹa'amaqteetac So Cristo, qataq ỹactec da 'onaxaic cha'aye 'auaconeguet nam ỹaqa'a ca chegaqa'ague. 6Cha'aye namayepi da'aqtaxaatapeguem 'enauac na 'amqaanataxanaxaicpi da lta'araic 'arauotaxanaqtaic. Qaq ỹoqo'oye aỹem 'anqouaguec qome da 'autaunec 'enauac namayepi ca iueetaique da yaqto' nache queto'ot da llecỹaxac. Qalaxaye ca 'artaunaxanaxac ỹataqta ỹaỹamaxareeta 'anqa'en Ñim Lo'onatac 'Enauacna. 7Namayepi chegoqchiguiña co'ollaq cheta'ague da ỹa'axat da na'aqtaguec So Jesucristo, qalaq saishet da ỹaconeguet ca ltaunaxanaxac nam saishet da ỹa'amaqten Ñim Lo'onatac 'Enauacna. 8Qaq ỹoqo'oye qomi' iuen da setauanaq de'era lo'onataxanaxac maye ỹacoolec da ỹo'ot, qataq seloxogue namayepi.
So Diótrefes qataq so Demetrio
9Aỹem sauo'o co'ollaxa aso ỹere da samaxa na ỹa'amaqten so Jesús, qalaxaye so Diótrefes saishet da ỹaconeguet da ỹamaxasoxonaxac, cha'aye somaye nqopita da nachaqsota da damaxasoxootac. 10Qaq ỹoqo'oye qom qami' ñamaqtegalo, nache ỹataqta shenapega camaye, cha'aye qauema naua ltaxaỹaxaco da qomi' detaqtegalo. Qataq saishet da nachaqrata damaye nataqa'en saishet da ỹaconeguet na quetague' So Cristo maye ỹaqa'a ca chegaqa'ague. Qaq da huo'o ñim huotaique da ỹaconeguet namayepi ca lma' qalaq saishet da ỹashenem, qataq ỹamaqauec da ca'ai naqa'en na 'amqaanataxanaxaicpi.
11'Am ñauochaxaua ỹaqaỹa Gayo, saishet da qoquegue da lataxac nam ỹo'ottac da qauem, chaqrata da qoquegue da no'on nataxac. Cha'aye cam ỹo'ot ca ỹaỹamaqchiguiñi, nache laỹepi nam llalaqpi Ñim Lo'onatac 'Enauacna. Qalaxaye nam ỹo'ottac da qauem, namayepi saishet da ỹauatton Ñimaye.
12'Enauac na shiỹaxauapi ỹataqta no'on da la'aqtaxanaxac da ỹa'axattac so Demetrio, qaq dam lataxac somaye nachera da ỹa'axat da 'eesa. Qaq qomi' nataqa'en saỹamaxarenaqta da lataxac somaye, qaq 'am 'auaỹateeta da saishet da satenataxanaqtac.
Da pa'atec nquinaxanaxac
13Qalota nam laỹepi maye huotaique da 'am sa'aqtaxanem, qalaxaye saishet da saỹamaxaren da sauota'a ana ỹere da 'am samaxa, 14cha'aye seuata'a qom huo'otaq saqaỹaloq da 'am ñauane', nache ỹataqta ñimaqa'a't da ña'aqtaxanaxa't.
15Qaq Ñim Lo'onatac 'Enauacna 'am ỹaalec ca 'anqouagaxa maye nachera da nlagaxayec.
Nam qanauochaxauapi maye soota'aguet 'am ỹamaxa da lquinaxanaxac. Qaq aỹem sequiitac ñi 'oonolec nam ñauochaxauapi maye qoueta'aguet.
Currently Selected:
3 Juan 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.