2 Juan 1
1
Da lquinaxanaxac so Juan
1Aỹem nataxala' qataq selotague' na 'amqaanataxanaxaicpi. Samaxa ana ỹere na qarqaỹañicpi maye lca'aguishecpi Ñim Lo'onatac 'Enauacna: Aỹem ỹataqta qami' sauoteque qalaxaye saishet da nachaỹemta, nataqa'en 'enauac nam ỹauatton da 'eesa lataxac, 2dam qomi' ỹaueegueta da qarauotaxanaqtaic.
3Seỹaxaato'ot Ñim Lo'onatac 'Enauacna maye Nta'a qataq So Llalec Jesucristo da ichoxoren 'enauac da qoñiita, qataq ỹataqta qami' ỹauoteque qataq qami' ỹanema ca l-lagaxayec. ¡Qataq qami' ỹo'oteque da qami' nlaqchiguilo da 'eesa lataxac qataq da nsoxoyec!
4Ỹataqta huo'o da lta'araic ñetonaxac, cha'aye aỹem huo'o na selalec da qoñiita da nateeteguet da 'eesa lataxac maye qomi' ỹamaxaleguete Ñim Lo'onatac 'Enauacna maye Nta'a. 5Qaq nagui qami' seỹaxanoto da ñi 'oonolec da shenaqta ỹataqta ỹauotec ca lỹa. Qaq de'era namaxasoxonaxac saishet da dalaxaic: cha'aye nacherata dam qomi' qoỹanema co'ollaq cheta'ague da sa'amaqtenaq So Cristo. 6Ca ỹoqta 'eesa da lauotaxanaqtaic, nache nataqa'en ỹalaxaguet na lamaxasoxonaxacpi Ñim Lo'onatac 'Enauacna. Qaq qami' ye nache 'eetai' da qauaỹachiñi yem chegoqchiguiña de'era, da Ñim Lo'onatac 'Enauacna qomi' ỹamaxaleguete da nache 'eetai' da sauotaxac na qaraỹepi.
¡Qarvichiỹa'aguet nam dapaxaguenataxaatacpi maye saq 'en!
7Ana'ana 'alhua qalota na ỹatenachettac na shiỹaxauapi, 'eetega da So Jesucristo saishet da anaỹa ana 'alhua da 'eeta'am cam ỹoqta 'eesa shiỹaxaua, maye huo'oi naua lapa'ache qataq naua lpi'ineqa. Qaq 'era dam la'aqtaxanaxac som npa'aguenaxaua So Cristo, som tenataxanaxaic. 8Qaq maxatchaxa qome qanchilỹañi yaqto' saishet da qauqataqchichi 'enauac nam no'on maye qami' so'otaxaque. Cha'aye da saishet da nache qoñiitec de'era, nache qami' saishet da qauacoñiiguet cam ỹataqta nalochiguiñi qansheetenaguiiqui maye chegoqo'ot Ñim Lo'onatac 'Enauacna.
9Da saishet da qoquiitegue nam qami' ỹapaxagueneque So Cristo, nache Ñim Lo'onatac 'Enauacna saishet da qami' hueta'agueta. Qalaxaye da qana'añaxacheetec dam qami' ỹapaxagueneque Ñimaye, nache Ñim Lo'onatac 'Enauacna maye Nta'a qataq So Llalec nache 'eetai' da qami' hueta'agueta. 10Qaq da huo'otaq huo'o ca qami' namaqtegalo da saishet da qami' ỹapaxagueneque de'era, nache camaye saishet da qauacoñiiguet da taua'a ca qarmaye, qataq saishet da qauquiñi. 11Cha'aye da qauquiñi camaye, nache 'eeta'am da qanhuañiỹaua'a cam qauem maye ỹo'ottac.
Da pa'atec nquinaxanaxac
12Qalota nam ỹa'aqtaxanaxacpi maye sauotaique da qami' sa'aqtaxanema, qalaxaye saishet da saỹamaxaren da sauota'a aca ỹere da qami' samaxalo. Seuata'a qom sañoxot da qami' ñamaqtegalo yaqto' ỹataqta qami' ñema'ato da qami' sa'aqtaxanema. Yaqto' da ñetonaxac ỹataqta nalochiguiñi.
13Na 'amqaanataxanaxaicpi maye salectaigui ne'ena soota'a ỹataqta nauochaxaua nam ỹa'amaqten So Jesús maye qaualliquiitaigui. Qaq namayepi qami' ỹamaxalo da lquinaxanaxac.
Currently Selected:
2 Juan 1: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.