1 Tesalonicenses 2
2
Da lo'onataxanaxac so Pablo co'ollaq hueta'a ye nỹecpi ye Tesalónica
1Qami' ỹaqaỹañicpi maye qaua'amaqchiñiitac So Cristo, qami' qauaỹaañita co'ollaxa de'era iviraxac da qoñiita. Damaye saishet da saqca ca naigui. 2Nataqa'en qauaỹaañi da co'ollaq huaña ye nỹecpi ye Filipos, nache qomi' qaisheueeta'ape qataq saishet da qomi' qaiyacna'ape. Qalaxaye na'aictaxa da souaqaigui da lta'araic lqalaic, qalaxaye Ñim Lo'onatac 'Enauacna qomi' ỹanema da lta'araic qara'añaxac da sa'axataq da no'on na'axaỹaxac. 3Qataq da sa'axataqtac damaye, nache ỹataqta 'eesa da qara'aqtaxanaxac, qataq da shenaqtapeguec ỹataqta ỹaỹamaqchiguiñi. Saishet da sauoqtaique da satenataxanaqtac. 4Nachaqrata da Ñim Lo'onatac 'Enauacna qomi' ỹaỹamaxareete', nache qomi' ipataxaleguete da sa'axataq da no'on na'axaỹaxac, qaq nachera dam so'otaqtac. Saishet da sauoqtaique da qomi' ỹaỹamaxareete' ca choche shiỹaxaua, nachaqñita Ñim Lo'onatac 'Enauacna, cha'aye nacheñi Ñi imeteetac 'enauac da qarvilỹaxac qataq da qarhuennataxac. 5Cha'aye qami' qauaỹaañita da qomi' saishet da choche ño'onaxata'q naua qartaxaỹaxaco da sauoqtaique da qomi' qauaỹamaxayiñiite', qataq saishet da qami' satenachetaqta'ape da sauoqtaique da ñeqataq aca qo'omi. Qaq Ñim Lo'onatac 'Enauacna ỹaỹaten da ỹataqta 'eesa de'era. 6Ỹauano' da sauoqtaique da qami', huo'otaq ca lỹa shiỹaxaua da qomi' ỹamata'aque da qomi' 'amaqtaqaiqa. 7Qaq cha'aye souaxat da qomi' lamaxa'she So Cristo, nache qomi' seshetaqtaxa da qami' shenaqapegalo da qomi' qautauañi', qalaxaye saishet da so'otaq damaye. Nachaqrata da co'ollaq qami' souaqta'agueta, nache ỹataqta huo'o da qarsoxosoxonaxac da qoñiita, shenaqta'am da lauotaxanaqtaic aca nate'e maye ntela'a qataq ỹaqchet ca llalec. 8Ỹataqta lta'araic da qarauotaxanaqtaic da qoñiita. Qataq sauoqtaique da saishet da nachaqrata da qami' sa'aqtaxanaxama da no'on na'axaỹaxac maye chegoqo'ot Ñim Lo'onatac 'Enauacna, maye nataqa'en qomi' lhuotte' da sanaq da qanachaalataxac souaxat da qoñiita. 9Qami' qarqaỹarolqa, aỹem sepeta'a da qami' qantooñita'ac da qapa'atta qaro'onataxanaxac da yaqto' ñauegaq ca qarhuenec. Cha'aye naxa da sa'axataqtac da no'on na'axaỹaxac maye chegoqo'ot Ñim Lo'onatac 'Enauacna, nache nataqa'en so'onataxanaqtac ye na'a'q qataq ye pe yaqto' saishet da huo'o ca qomi' ime'egueta da qomi' itauaategueque ca qarhuenec.
10Qami' huo'o da qarpi'iỹaxaqui Ñim Lo'onatac 'Enauacna qataq qomi' co'ollaq qami' souaqta'agueta, qalaq ỹataqta no'on da qarataxac. Qaq Ñimaye ỹataqta ỹaỹateeta da 'eesa de'era, nataqa'en qami'. Ỹoqo'oye qaica ca ishet da huo'o ca qomi' ỹasaxaleguete ca qarasouaxashet. 11Nataqa'en qauaỹaañite' qomi' co'ollaq qami' souaqta'agueta, qalaq se'enaxataqteguem ca yo'oqchigui nta'a da huo'o ca ỹo'otec ca llalec. Qami' sa'añaqchetaqta'ape, qataq qami' sanaxama da qaramaicỹaxaqui. 12Nataqa'en she'eguelaxataqtalec da qami' shenaqtegalo da ỹataqta qoquiitelec da lataxac nam quetague' Ñim Lo'onatac 'Enauacna, nam iỹaxanapi Ñimaye da yaqto' nhuanaua'a da lo'onataxanaxac qataq da la'añaxac.
13Qaq nachera da huo'omshe sanaqtacot da qana'achecỹaxac Ñim Lo'onatac 'Enauacna, cha'aye co'ollaq qana'axaỹaxañiỹa da la'aqtac Ñimaye maye qami' sa'aqtaxanaxama, nache qaua'amaqchiñi da ỹataqta 'eesa la'aqtac Ñim Lo'onatac 'Enauacna, qaq saishet qanqa'eñi da la'aqtac ca choche shiỹaxaua. Qaq damaye ỹataqta 'eesa la'aqtac Ñimaye ỹoqo'oye nam ỹa'amaqten damaye, nache ishet da naralaxat da nachaalataxac. 14Qami' qarqaỹa't, co'ollaq qami' icaata'ape da saq qami' ỹalemaxa't na maiche qarhuo'oi le'ecpi. Qaq de'era qami' qaỹo'oteque, nache 'eeta'am dam qaỹo'otec na quetague' Ñim Lo'onatac 'Enauacna maye netaña ye 'alhua Judea, nam ỹa'amaqteetac So Cristo Jesús. Namayepi nataqa'en qalota da ncanaguec. Qaq de'era ncanaguec chegaqaigui na maiche lauo' le'ecpi judiopi. 15Ne'ena judiopi nachena na ỹalauat co'ollaxa So Qarataxala' Jesús, 'eeta'am so hua'au lta'alpi co'ollaq ỹalauat so lalamaxat la'aqtaxanaxanecpi Ñim Lo'onatac 'Enauacna. Qataq nachena na qomi' ỹamaqrauec co'olloxocheye. Namayepi ỹataqta sa ỹaỹamaxaren nam 'eetapeguecpi Ñim Lo'onatac 'Enauacna, nachaqrata da ỹataqta dataỹa'aguet Ñimaye. 16Qaq ỹoqo'oye naxa da sauoqtaique da sa'aqtaxanaxam na saq judiopi, da yaqto' ivirauga nataqa'en da qanca'alaxatec, qaq namayepi qomi' sa ỹashenema da shenaqtapeguec. Qaq de'era 'eetec namayepi maiche nquigaxattauec da lasouaxashet. Qaq ỹoqo'oye nagui namayepi talec qome da saqca ca 'ena'am nhuaxanaguec maye chegoqo'ot Ñim Lo'onatac 'Enauacna.
So Pablo nshetaique da qaltaq namaqtega so Tesalónica le'ecpi
17Qami' qarqaỹa't, se'eso na'a'q co'ollaq qami' sachegoxosoqtegueta qaq co'ollaq qaỹata'ague da sa qami' ñauanaxato qalaq, nache 'eetai' da qami' seuennaqtegalo souaxat da qarauoche da qoñiita. Huaña, nache ỹataqta huo'o da qaryaxa da qaltaq qami' ñauanaxato. 18Ỹoqo'oye huo'o so na'a'q sauoqtaique da qami' ñamaxasoqtegalo, qataq aỹem mashe saqalota da temaq qami' ñeqo'onalo. Qalaxaye so pa'aguenataxanaxaic ỹataqta aỹem nqanaxat. 19Huo'o da qaryaxa da qami' ñauanaxato, cha'aye So Qarataxala' qom ñe'eguelaq, nache qomi' iỹaxanoto qome da sanaxaua'a da qaro'onataxanaxac, nache qomi' qome huo'o da qana'amqaanaxac, qataq da qantonaxac souaxat da qaro'onataxanaxac da qoñiita. 20Aja', nache qami' maye qauo'oche da qana'amqaanaxac qataq da qantonaxac.
Currently Selected:
1 Tesalonicenses 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.