San Lucas 1
1
1-3Amico Teófilo, in pilabi Jesuca cuenta polarichinayoe. Casale casaleri yaca cacachi quiraminla chiquilabe cuenta manquilaquee. Yala casalele nechi Jesús niyan quinanunca miralarato, jun fiquica chiquilabe polarilaquee. Junni duque tsachila yalachi fiquica meráto, seque, tuca pila chutechi tilatinue Jesús chiquilachite jera niyan quinanunca. Junni lanan Jesús niyanhica jonunca casalele nechi jera tuca miica joto, jera cuenta pepolarino munarayoe. Casalele nechi jeraicari seque chuteno muquee. Nunan respetainun amico joe. 4Jesucrístoca paca cuentaca numa miinae. Junni aman lachi pilaca quirato, jun cuentaca jera tsarasica tuino podeichunae.
Mumunmin Juan naino joe tinunca
5Casale casaleri Herodes tinun miya Judea tobi mantamin josa, israelita patele manca jominue Zacarías mumun. Abías tinun bolonbi patele jominue. Ya unilachi sona Elisabet mumun jominue. Elisabechi familialanan Aaronchi alicala joto, patelela pejominlanue. 6Zacaríabe Elisabebe Diosichi cale sen jominlanue. Diosichi mantaca jera meráto nenaminlanue. 7Elisabet mantimini na quitumin jotonan, sinuca jominue. Zacaríanan unica jominue.
8Junni Zacaríachi bolon patelela ti quino jonatiya quinaminlanue Diosichi cale. 9Patelelachi mite jeralelachi mumunca pilaquidobi chuteto, mancachi mumunca quiratuminnan camin jominlanue mo Diosichi yabi wino jonunca miichun. Junni Zacaríachi mumun chutecaca calaquinan, yari junbi wito, insienso lucuca nin ponaminue. 10Ya insiensoca nin ponasari, jerale tsachila urachinan mérato Diosibe rocainaminlanue. 11Aman jun quiranari pansile nechi Miya Diosichi anjeli quirainue. Jun insienso nin ponanunle tsa nan tala wiruranue. 12Zacarías ya anjelica wepanato quirato, jeletinue. 13Anjeli mantimini itsantinue:
—Zacarías, wepanatude! tinue. Nu rocainanunca Diosi meraca joe tinue. Junca meránan, nuchi sona Elisabet na quichunae. Junni ya náca Juan mumun polaquina! 14Ya naieque layan tsachila son tilatichunae tinue. Nunan duque peson tichunae tinue. 15Jun naoca Diosi fe mantá tan tsachi joe tichunae tinue. Bino, nin warente cuchituchunae tinue. Ya nainunle nechi Diosichi Tenca yaca jera caya jochunae tinue. 16Duque israelítalaca Miya Diosibe mancayaisa carichunae tinue. 17Matu to Elías cuwenta Diosichi mantaca petachunae yape apalanan, nalalanan parejo seque mantenca calaquisa. Tsachilaca payichunae yape merátuchi timinlari manmeralaquisa. Junsi tenca tanla paca fiquica manmerása carichunae. Tsachilaca micarichunae tinue yape seque mannenalarasa, Miya jano joeque.
18Junni anjeli Zacaríabe tsantica josa, Zacarías itsanque panhanue:
—Meráde! La unica joyoe. Lachi sonanan sinuca joe tinue. ¿Junto niyaito miicaichunan? tinue na quirano jonunca.
19Junni anjeli itsantinue:
—Gabriel joyoe. Diosichi cale wiruramin joyoe tinue. Diosi laca erecae yape in sen fiquica nube cuenta polarisa. 20Junni nu meráde! La na quichunae tica jonan, nuchi sonari na quino ma fenan na quichunae. Junni la tsanticaca nuri quereituto, patumin ichunae ya náca mumun pono fecári.
21Junni Zacaríabe anjelibe tsanque cuenta quilaquinasa tsachilari urachi méraminlanue. Diosichi ya urachi Zacaríaca mérato, wepananaminlanue ¿Niyaito tsancari piyanhinan? tito. 22Junni Zacarías manlotobi, pano podeitunue. Junto tedechi molde quito quirawonan, miilainue Diosichi yabi yachi quirajanueque.
23Junni Zacarías Diosichi yabi jera quino jonunca quito manjinue. 24Aman junni nanni inale Zacaríachi sona Elisabet na winue. Na witobi, mante pe fecári tsaito chuminue. Junsi 25itsantinue:
—Miya Diosi chiqueca laquirato quirato, seque quee tinue. Na quitumin joyoeque luraminca piyarie tinue na quisa carito.
Jesús naino jonunca
26Sota pe poleto, Gabriel tinun anjeli manpatanue. Diosi ereca jun manpatanue Galilea toca. Nasaret puebloca jato, 27junto unila iton sonachica janue Maríachica. Ya Maríari unilabe cayaino jotonan, cacayaica itominue. Ya unilari José mumun jominue. Matu to miya Davichi alica jominue. 28Junni aman ya anjeliri Maríachica jato itsantinue:
—Nube saludainayoe tinue. Miya Diosi nube rato, nuca duque laquirae tinue. Diosi nuca duque pansi josa carichunae tinue. Uyan sonalaca fécari pansi josa carichunae tinue.
29Junni María ya anjelica quirato, yachi fiquica meráto, duque wepananue. Ya ti quichun tsanque saludainanque tenca cato wepananue. 30Junni anjeli itsantinue:
—María, jeleratude! tinue. Diosi nuca laquirae tinue. 31Meráde! tinue. Nu na wito, unila na quichunae tinue. Ya náca Jesús mumun pona! tinue. 32Ya na uwaitobi, duque mantá tan tsachi uwaichunae. Ya náca jamochi chumin Diosichi Nao tinun jochunae tinue. Miya Diosi yachi mantá cuwachunae matu to miya Davichi cuwenta. David yachi matu tata joto, israelítalaca mantamin jominue. 33Junni nuchi nao jun tsanquenan israelítalaca mantamin jochunae tinue. Numatotiya mantato chuchunae tinue.
34Maríari jun fiquica meráto, unila itoyoe tinue. ¿Junni niyaito na queichunan? tinue. 35Junni anjeli manpato itsantinue:
—Diosichi Tenca nuchica jachunae tinue. Diosi fécari mantá tan joto, nuca poyochi cuwenta dochunae tinue. Junnan ya sen náca Diosichi Nao tinun jochunae tinue. 36Meráde! Nuchi familia Elisabenan, sinuca jotonan na pun joe tinue. Na quitumin joe latica josanan, sota pe na pun joe tinue. 37Diosi jera ticatiya quino podeimin joe tinue.
38Junni Maríari anjelichi fiquica jera meráto, itsantinue:
—Junni tsan jonari, se joe tinue. Miya Diosi panunca meraniquimin joanae tinue. Nu tsantica fiqui se loniisa tenjae tinue.
Tsantinunsi anjeli manjinue.
Maríari Elisabeca quirabi jinunca
39Junnasa María du minu wewe jito, Elisabet chunun puebloca jinue Judea tobi. 40Junni Zacaríachica jito, tamochi wito, Elisabebe saludainue. 41Junni aman Elisaberi Maríachi fiquica meránan, nari Elisabechi pecolobi wecainue. Junni Elisaberi Diosichi Tencabe jera cayaica joto, 42sonba seque pato, itsantinue:
—Diosi nuca pansi josa carichunae tinue yape uyan sonalaca fe pansi josa. Nuchi naocanan pansi josa carichunae tinue. 43Nuchi na chiquechi Miya jochunae tinue. Junni chique duque son joyoe tinue nu quirabi jae tito. 44Junni nuchi saludoca meránunsi, chiquechi na wecaie tinue. Duque son tito pecolobinan wecaie tinue. 45Nu Miya Diosichi fiquica quereito, duque son jochunae tinue. Ya fiqui tsarasica jochunae tinue.
46Junni Elisabechi fiquica meráto, María itsantinue:
Chiquechi tencabi Miya Diosica tsaracari seque pánayoe tinue.
47Diosi chiqueca se larica joe tinue.
Junnan chiquechi tencabi yaca duque son joyoe tinue.
48Diosiberi mantaimin jotonan, epe sona joyoe tinue.
Tsan josanan Diosi chiqueca duque seque quirae tinue.
Junni meráde! Amanale nechi jeralela chiqueca pansi joe tilatichunae tinue.
49Diosi duque sonban joto, chiqueca tsaracari seque quee tinue.
Ya tsaracari sen patsa joe tinue.
50Yaca jeleraminlaca numatotiya laquirato polechunae tinue.
51Junni yari sonba quimin joe yape sonban Diosi joeque miilaisa.
Weyanlari tencabi duque sen joyoe tito, mantá tayoe timinla joe tinue.
Diosi mantimini yalaca jera arara sueremin joe tinue.
52Fécari mantá tan tsachilaca epe suwamin joe; epe tsachila jominlaca mantá tan suwamin joe tinue.
53Ano itonlachi sen ano cuwamin joe; oco tsachilachi natiya cuwatuminnan manheremin joe tinue.
54Diosi yachi israelita tsachilaca ayudaica joe.
Yalaca laquirano joyoeque mantenhito, ayudaica joe.
55Chiquilachi matu to tatalabe junca cuenta quito tsantica jominue.
Maríari tsanque cuenta quinue. 56Junto María Elisabebe peman pe tsansi pechuto manjinue.
Mumunmin Juan nainunca
57Junni Elisabet na quino ma fenan, unila na quinue. 58Familialabe quiranunlabe na quica jonunca miito, son tilatinue. Diosi ya sonaca duque laquirato na quirasa carinue tito yaca son tilatinue. 59Junni ochu mate ya nachi quidoca poreno jominue israelítalachi mite quito. Tsanque poresa caribi jito, jun matenan mumun pono jominue. Junni quirabi pejaminlari ya náca Zacarías mumun pontsan joe latinue yachi apa cuwentanan. 60Nachi ayan mantimini te tinue. Yaca Juan mumun polaquechinayoe tinue. 61Junni amicolari wepanato, itsanlatinue:
—¿Ti quichun ya náca Juan polaquichun? tilatinue. Nulachi familiala monantiya Juan mumun itolajoe latinue. 62Tsantito, nachi apaca quirato tedechi micuwalaquinue ya náca ti mumun pono jonunca miichun. 63Junni nachi apari pilaquido panhato, ya nari Juan mumun joeque chutenue. Junni jeralela junca quirato, wepanalainue.
64Junni aman nachi apa tsanque pila chutesi, manpano podeinue. Junto aman Diosica seque panue. 65Quirabi pejaca junla nachi apa manpano podeinunca quirato jeleilainue. Junni Judea tobi du minu jun cuentaca jeralete mera jominue. 66Ya cuentaca meráminla junca duque tenca canilaquinue. ¿Jun na niyanhichunancan? tito, duque tenca calaquinue. Junni ya náca Diosi laquirato ayudainaminue.
Mumunmin Juanchi apa itsanque Diosichi mantate panunca
67Junni nachi apa Zacaríari Diosichi Tencabe jera cayaito, Diosichi mantate pato, itsanque panue:
68Miya Diosica duque seque pantsan joe tinue.
Israelítala yachi tsachila jolajoyoe.
Junni chiquilachica jato, chiquilaca se larichunae tinue.
69Matu to miya David Diosibe mantaimin pejominue.
Junni yachi alica mancaca Diosi wentechunae tinue.
Yaca sonban se larimin suwachunae yape israelítalaca se larisa.
70Matu mate Diosichi mantate paminlaca cuenta quilaquinue tinue.
Diosichi sen tsachila joto, ya se lariminca itsanlatinue tinue:
71Chiquilaca se larichunae latinue tinue yape chiquilaca pa jominla pasuwalaquitusa.
72Aman Diosiri chiquilachi matu tatalabe paca joto, Ya fiquica mantenhino joyoe tica joe tinue.
Yalaca laquirato ayudaino joyoe tica joe tinue.
Jun tenchi amana mate jun fiquica mantenhito ya se lariminca erechunae tinue.
73Aman ya matu to paca fiquiri Abrahanbe paca jominue tinue.
Diosi Abrahanbe juraquito, tsarasi cuenta quito, itsantica jominue tinue:
74Chiquilaca se lariyanae tica jominue yape pa jominla chiquilaca pasuwalaquitusa.
Se lariyanae tica jominue yape chiquilari ya pa jominlaca jele tituto, Diosichi tenchi titiya quino podeilaisa.
75Tsanquinan, chiquilari Diosica meráto, yabe seque penenano podeilaiichunae tica jominue tinue.
Junni Diosi tsanqueyanae tica joto, amana mate tsanquichunae tinue.
76Junni nachi apa jeralelabe tsantitobi, aman nabeman itsantinue:
Nuca jamochi chuminchi mantate pamin joeque palaquichunae tinue.
Nu Miyaca caquenan jito, yachi tenchiri tsachilaca manseisa carichunae tinue.
77Nu Diosichi tsachilaca micarinato, in fiquica micarichunae tinue.
Chiquilaca se larichunaeque micarichunae tinue; jutsaca piyarintsan joeque micarichunae tinue.
78Junni Diosi chiquilaca duque laquirato, chiquilachi jutsaca piyarichunae tinue.
Chiquilaca laquirato, chiquilachite jamochi nechi tsechunae.
79Aman chiquila jutsa quiminla joto, nemente cuwenta jolajoyoe tinue.
Junni Diosi chiquilachi tencabi tseisa carichunae yape yachi minubi nenalarasa.
Jun minubi nenaminlari wepanatuto pansi nenalarachunae tinue.
Ya nachi apa tsanque cuenta polarinue Diosichi mantate pato. 80Junni na uwainato, sonban tenca inue. Niyanlanantiya chutunun postote chuminue israelítalaca micaribi jano fecári.
Currently Selected:
San Lucas 1: cof
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.