3. Mose 1
1
Aunwiesungen fa daut Brauntopfa
1De Har roopt Moses un räd met am von en daut Vesaumlungszelt un säd: 2Räd met de Israeliten un saj to an: Wäa von junt däm Harn een Opfa brinjen well, dee saul daut vom Vee, von Rinda von Schop ooda von Kosen nämen. 3Well hee een Brauntopfa brinjen von Vee, dan saul daut een menlichet fälalooset Tia sennen. Ver däm Engank von daut Vesaumlungszelt saul hee daut brinjen, om daut hee doaderch ver däm Harn aunjenäm woat. #3Mo 17,4 4Un hee saul siene Haunt opp dän Kopp von daut Opfatia lajen; dan nemt de Har sien Opfa aun un vejeft am siene Schult. 5Dan saul hee daut Rint ver däm Harn schlachten, un de Priesta, Aaron siene Säns, sellen daut Bloot fa däm Harn runtom aun dän Aultoa spretzen, waut ver de Däa von daut Vesaumlungszelt steit. 6Un hee saul daut Opfatia aufladren un daut en Stekja vedeelen. #3Mo 7,8 7Un de Priesta, Aaron siene Säns, sellen opp dän Aultoa een Fia moaken un doa Holt bowen trajchtlajen 8un de Stekja met däm Kopp un daut Fat toop jeordnet opp daut Holt lajen, waut opp daut Fia opp däm Aultoa licht. 9Daut Enjeweide un de Been saul hee met Wota rein wauschen, un de Priesta saul daut aula opp dän Aultoa vebrennen. Daut es een Brauntopfa, een Fiaopfa to een scheenet Jeroch fa dän Harn. #1Mo 8,21; 2Mo 29,18
10Well hee von Schop ooda Kosen een Brauntopfa brinjen, dan saul daut uk een menlichet Tia sennen, waut onen Fäla es. 11Un hee saul daut aun de nuadne Sied vom Aultoa ver däm Harn, schlachten. Un de Priesta, Aaron siene Säns, sellen daut Bloot runtom aun dän Aultoa spretzen. 12Un hee saul daut en Stekja deelen, un de Priesta saul dee met däm Kopp un daut Fat toop opp daut Holt bowa daut Fia trajchtlajen, waut opp däm Aultoa es. 13Daut Enjeweide un de Been saul hee met Wota rein wauschen, un de Priesta saul daut aula opp dän Aultoa opfren un daut en Ruak oppgonen loten. Daut es een Brauntopfa, een Fiaopfa to een scheenet Jeroch fa dän Harn.
14Well hee däm Harn von Väajel een Brauntopfa brinjen, dan saul hee daut von Turtelduwen ooda aundre Duwen brinjen. 15Un de Priesta saul dee nom Aultoa brinjen un dee daut Jenekj aufbräakjen un dee aun de Waunt vom Aultoa utbleeden loten un en daut Fia opp dän Aultoa vebrennen. 16De gaunza Kropp saul loosjeräten un opp dän Auschklompen jeschmäten woaren, waut aun de oostne Sied Aultoa es. 17De Flichten saul hee enrieten, oba nich aufbräakjen. Un soo saul de Priesta daut opp daut Holt bowa daut Fia opp dän Aultoa en Ruak oppgonen loten. Daut es een Brauntopfa, een Fiaopfa to een scheenet Jeroch fa dän Harn.
Currently Selected:
3. Mose 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.