2. Mose 40
40
Daut Zelt woat oppjestalt
1De Har säd to Moses: 2Aun däm 1. Dach von de 1. Moonat en jun 2. Joa, saust du de Heilje Woninj, daut Vesaumlungszelt, opprechten. 3Stal de Kjist met de Jebooten doa nenn un henj de Gardien doafäa. 4Stal dän Desch ver de Gardien un waut doatoo jehieet. Stal dän Laumpenhoola opp un sat de Laumpen doa nopp. 5Stal dän goldnen Ruakopfa Aultoa ver de Gardien ver de Kjist met de Jebooten, un henj de Gardien em Engank von de Heilje Woninj. 6Stal däm Brauntopfa Aultoa ver däm Engank von de Heilje Woninj, daut Vesaumlungszelt. 7Stal uk de Wauschkomm met Wota opp. Dee saul tweschen daut Vesaumlungszelt un dän Aultoa sennen. 8Stal uk dän Hoff opp runtom, uk met de Enganksgardien. 9Dan nemm waut Saulweelj un saulw de Heilje Woninj en, un uk aules waut doabennen es, un wei daut en met aules waut doatoo jehieet, soo daut et heilich es. 10Saulw besonda dän Brauntopfa Aultoa met sien Toobehia, un wei däm Aultoa daut dee gaunz heilich es. 11Saulw de Wauschkomm un sien Foot un wei däm en. 12Brinj Aaron un siene Säns ver däm Engank von daut Vesaumlungszelt un wausch dee doa met Wota. 13Kjleed Aaron en de jeweide Kjleeda, un saulw am en, un wei am en toom Priesta Deenst. 14Brinj siene Säns un kjleed an met de Mauntels fa an, 15un saulw an en, jrod soo aus äaren Voda, daut see em Priesta Deenst deenen woaren. Dit Ensaulwen es de Aunfank von een Priestatum daut opp emma bestonen saul.
16Moses deed aules krakjt soo, aus am daut jesajcht wia. 17De gaunze Heilje Woninj wort aun däm 1. Dach von de 1. Moonat von daut 2. Joa oppjestalt. 18Moses stald de Heilje Woninj opp. Hee sad de Feet opp un stald de Stendasch opp met de Dwäastangen un Past. 19Dan spreed hee daut Zelt äwa de Heilje Woninj, un bedakjt daut met de groote Dakjen, soo aus de Har jesajcht haud.
20Hee neem de Bundeskjist un läd dän Bewies, de Steentoflen met de Jebooten, doa nenn, sad daut Veseenungsdakjsel doa nopp, un brocht de Droagstangen en de Rinj, aun de Sied von de Kjist. 21Soo druach hee de Kjist en de Heilje Woninj nenn, un honk de Gardien doafäa, un sad de Kjist met de Jebooten oppoat, soo aus de Har jesajcht haud. 22Hee sad dän Desch em Vesaumlungszelt nenn aun de nuadne Sied ver de Gardien, 23un stald de Brood en Rieejen oppem Desch ver däm Harn, soo aus de Har am jesajcht haud. 24Dän Laumpenhoola stald hee aun de siedne Sied vom Vesaumlungszelt, jäajenäwa vom Desch, 25un sad de Laumpen en däm Laumpenhoola ver däm Harn, soo aus de Har daut jesajcht haud. 26Hee sad dän goldnen Aultoa em Vesaumlungszelt ver de Gardien, 27un hee brend doa dän scheenrikjenden Weiruak bowen, soo aus de Har jesajcht haud.
28Hee honk de Enganksgardien opp fa de Heilje Woninj 29un stald däm Brauntopfa Aultoa ver däm Engank von de Heilje Woninj, daut Vesaumlungszelt. Hee opfad een Brauntopfa un een Ätesopfa, soo aus de Har jesajcht haud. 30Hee stald de Wauschkomm tweschen daut Vesaumlungszelt un däm Aultoa. Hee goot Wota en de Wauschkomm nenn toom wauschen. 31Moses un Aaron un Aaron siene Säns woschen sikj doabennen de Henj un de Feet, 32wan see em Vesaumlungszelt nengonen wullen, ooda wan see nom Aultoa jinjen. De Har haud Moses dit soo väajesajcht.
Däm Harn siene Wolkj trakjt en de Woninj
33Dan stald Moses dän Hoff opp rom de Heilje Woninj un dän Aultoa un honk de Enganksgardien em Engank. Soo muak Moses daut aula foadich.
34Doamet sad sikj de Wolkj äwa daut Vesaumlungszelt, un de heilje Woninj wort von bennen aulawäajen soo harlich aus de Har selfst es. #Hes 43,1-9 35Moses kunn nich emol em Vesaumlungszelt nengonen wäajen de Wolkj. De Heilje Woninj wia von bennen aulawäajen soo harlich aus de Har selfst es. #4Mo 7,89 36Opp äare Reisen, muaken de Israeliten sikj emma reed toom wiedatrakjen, wan sikj de Wolkj hoof, #2Mo 13,21; 4Mo 9,15-23; 10,34-36; 1Kjen 8,10-11; Jes 4,5 37oba soo lang, aus de Wolkj sikj nich aunhoof, bleewen see wua see wieren, bat sikj de Wolkj opphoof. 38De Wolkj vom Harn bleef äwa de Heilje Woninj soo lang aus daut dach wia, un enne Nacht wia Fia enne Wolkj. En aul äare Reisen kunnen de Israeliten dit emma en äare Medd seenen.
Currently Selected:
2. Mose 40: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.