Hesekiel 1
1
Gott kjemt no Hesekiel
1Lot mie junt emol von eene besondre Erfoarunk vetalen, dee mie passieed aus ekj en Babel mank de veschlapte Juden wia. Ekj weet noch, daut wia aum 5. Dach von de 4. Moonat en daut 30. Joa. Ekj stunt doa aum Kebar Riefa, un met eemol muak de Himmel sikj op, un Gott wees mie eene Openboarunk. #Hes 1,3; 3,23; 10,15.20.22; 43,3 2Dit wia daut fefte Joa daut de Kjennich Jojachin faustjenomen wia. Dan aum feften Dach von de Moonat #2Kjen 24,15 3wort mie kloa, waut de Har to sajen haud. Ekj sie Hesekiel, Busi sien Sän. Dort en Babel wist ekj met eemol, daut däm Harn siene Haunt äwa mie wia. #Hes 3,22-23; 8,1; 33,22; 37,1; 40,1
4Aus ekj doa soo oppkjikjt, sach ekj eenen stoakjen Wint vom Nuaden oppkomen. Doa wia eene groote Wolkj. En de Medd leet daut no rootheetet Iesa, un een grootet Fia, woont wiet runtom dacht. #(4-28) Opb 4,2-8 5Un doa en de Medd sach ekj vea läwendje, ekj weet nich krakjt waut, oba dee leet daut no Menschen. 6Doch haud jieda eent von dee vea Jesechta un vea Flichten. 7Äare Been stunden jlikj, un dee äare Feet leeten no de Heefta von een Kaulf. De Feet blenkjaden aus jeräwnet Koppa. 8Unja äare Flichten hauden dee Henj, soo aus Menschen. Dee hauden äare Jesechta un äare Flichten aun vea Sieden. 9Äare Flichten schieeden toop, un wan see jinjen, brukten see sikj nich dreien, wiels see jinjen emma en de Rechtunk von eent von de Jesechta. 10Jieda eena von dee vea haud von väaren daut Jesecht von eenen Mensch, von de rajchte Sied daut Jesecht von eenen Leiw, von de linkje Sied daut Jesecht von eenen Oss, un von hinjen daut Jesecht von eenen Odla. 11Äare Flichten strakjten enne Hecht. Twee schieeden emma aun de Flichten von däm näakjsten, un met twee bedakjten see äa Kjarpa. 12Dee jinjen emma en de Rechtunk von eent von äare Jesechta, emma doahan wua de Jeist an leid. Krakjt eendoont wua see hanjinjen, see brukten sikj nich doahan dreien. 13Un enne Medd tweschen de vea, leet daut no jlieejendet Gloot, un no Fiastakja, waut han un häa tweschen de vea fuaren. Daut wia een dachet Fia, un daut blizt emma von en daut Fia. 14Un de vea flizten han un häa aus de Blitz.
15Un aus ekj soo no de vea kjikjt, sach ekj, daut biesied jieda eent von dee wia een Raut, woont de Ieed aunschieed. 16De vea Räda leeten un schauften aula krakjt äwareen. Dee leet daut no kostboara Steen, un dreiden aus een Raut en daut aundre. 17Dee kunnen no aule vea Sieden kjikjen, un brukten sikj biem gonen nich omdreien. 18Un runtom aun de Kaunt von jieda eent von de vea Räda wieren Uagen. Daut wia sondaboa un furchtboa. 19Un wan de vea sikj rieeden, dan jinjen de Räda emma met an met, un wan de vea sikj enne Hecht hoowen, dan hoowen de Räda sikj uk enne Hecht. 20Emma soo aus de Jeist an leid, soo jinjen de vea, un de Räda met an met, krakjt soo aus de Jeist an leid, wiels de Jeist von de vea wia uk en de Räda. 21Wan dee wuahan jinjen, dan jinjen dise uk doahan; wan dee stelhilden, dan hilden dise uk stell; un wan dee sikj enne Hecht hoowen, dan hoowen dise sikj uk enne Hecht. De Räda deeden emma krakjt soo aus de vea, wiels de Jeist von de vea wia uk en de Räda.
22Oba dan noch, bowa de Kjap von de vea, wia waut, soo aus een groota blanka Bän, soo aus een Kristal. Daut leet furchtboa äwa äare Kjap. 23Unja disen Bän haud jieda eena von dee twee Flichten utjestrakjt, eena nom aundren opptoo, un twee Flichten met dee see sikj dän Kjarpa bedakjten. 24Un wan see wuahan jinjen, dan kunn ekj äare Flichten hieren. Daut hieed sikj no daut ruzhen von een grootet Wota, no de Stemm von däm, dee aule Macht haft, no een Jetees aus en een Soldotenloaga. Oba wan see stelhilden, dan leeten see äare Flichten rauf. 25Un von bowa dän Bän, dee äwa an wia, hieed ekj eene Stemm aus see stelhilden un äare Flichten raufhenjen leeten.
26Bowa dän Bän äwa de vea wia, waut no een Troon leet, oba von Safier jeschnäden; un opp daut waut no een Troon leet, saut wäa, ekj saj daut soo goot aus ekj kaun, dee eene Form von een Mensch haud. #2Mo 24,10; Jes 6,1; Opb 4,2-3 27Un von daut waut no siene Hoft leet, von doa nopp, sach ekj, waut no jlieejendet Iesa leet, soo heet aus Fia. Un von daut, waut no siene Hoft leet un rauf, leet daut no Fia. Daut wia runtom däm sea dach.
28Daut jlenzt doa runtom am aus een Räajenboagen enne Wolkjen, wan daut räajent. Soo leet daut, waut soo harlich lat aus de Har. Un aus ekj daut sach, foll ekj dol, plaut opp mien Jesecht, un ekj hieed wäm räden. #Hes 3,23; 8,4; 9,3; 10,4.18; 11,23; 43,4; 44,4
Currently Selected:
Hesekiel 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.