Kloagleeda 5
5
Mucht de Har ons halpen
1Vejat nich woo ons daut jeit, Har,
Kjikj doch waut fa eene Schaund opp ons jekomen es.
2Waut ons Oafgoot wia,
haben framde en äare Macht;
onse Hiesa jehieren de Utlenda.
3Wie haben nich mea onse Vodasch;
onse Mitta sent Wätfrues.
4Wie motten fa ons Drinkjeswota betolen,
un ons Holt mott wie ons kjeepen.
5Wie woaren em Jenekj jeschowen,
un derwen nich noloten wan wie meed sent.
6Wie musten ons Ägipten hanjäwen,
un to Assur, daut wie to äten hauden.
7Onse vestorwne Elren deeden
en äare Tiet waut orrajcht wia,
un nu mott wie dee äare Strof uthoolen. #2Mo 20,5; Jer 31,29
8Daut sent Sklowen, dee ons nu väasajen,
un von dee äare Macht kaun ons kjeena friemoaken.
9Wie sent en Doodesjefoa, wan wie onse Arnt holen,
wäajen de Baunden von enne Wiltnis.
10Wäajen dise schlemme Hungaschnoot
es onse Hut gaunz veschrieecht.
11Met onse Frues en Zion,
un de Mejales en de Städa en Juda,
es Schaund jedräwen worden.
12Onse Leida haben see jehongen,
un de Leidasch haben see nich jeieet. #2Kjen 25,19-21
13Junge Mana musten dän Molsteen dreien,
un junge Junges Holt droagen bat see stolpaden.
14De leidende Mana jäwen nich mea Rot,
un de junge Mana spälen nich mea Instrumenten.
15Doa es kjeene Freid mea em Läwen,
un wua wie daunzten, trua wie nu.
16Doa es nuscht waut ons schmock moakt aus Volkj.
Daut es schlemm met ons wäajen onse Sind. #Jer 13,18
17Wäajen dit sent wie ennalich nich koasch,
wäajen dise Sachen vejeit ons daut Uagenlicht.
18Daut es wäajen däm Zion Boajch,
dee nu soo vestimmelt licht,
daut de Fas doa romranen.
19Oba du, Har, blifst opp emma de Kjennich;
dien Troon blift opp aule Tieden.
20Wuarom hast du ons gaunz vejäten?
Wuarom bliew wie läweslank onen die?
21 Har, brinj ons doch wada trigj no die,
daut wie kjennen oppjerecht sennen.
Moak ons Läwen wada soo aus ieeschtemma. #Psa 126,1-6
22Ooda hast du ons bat opp daut latste veschmäten,
un haft dien Oaja kjeen Enj?
Currently Selected:
Kloagleeda 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.