Kloagleeda 2
2
Jerusalem es bestroft fa äare Sind
1Woo groff haft de Har sienen Oaja
loten opp de scheene Staut Zion komen?
De Staut, met dee sikj Israel soo väl meend,
es vom Himmel bat oppe Ieed jeschmäten.
En sienen Oaja haft hee nuscht oppjepaust,
no daut waut sien Footbenkjskje wia. #Psa 132,7-8
2Aul de feine Städen en Israel
haft de Har vedorwen un kjeene veschoont;
hee haft en sienen Oaja, Städa met Mieren
en mien Juda gaunz doljebroaken.
Hee haft daut Rikj un de aunjestalde
en Schaund to nuscht jebrocht.
3Hee haft aule Macht, dee Israel haud,
en sienen Oaja enne Grunt jebrocht;
hee haft sienen gooden Oarm trigjetrocken,
aus de Fient opp ons kjeem.
Hee haft en Juda romjeschermetzelt
aus een Fia, daut no aule Sieden frat.
4Soo aus een Fient trock hee sienen Boagen stiew;
un siene rajchte Haunt hilt hee soo aus een Jäajna.
Hee haft aul dee, dee en Zelten
en daut scheene Zion goot leeten, omjebrocht;
un haft sienen Oaja utjegoten
soo aus flaumendet Gloot utschett woat.
5De Har wia aus een Fient,
un haft Israel gaunz vedorwen.
Hee haft jieda Paulaust venicht,
jieda Staut met Mieren enne Grunt jebrocht.
Hee haft daut scheene Juda
soo jaumalich lieden moakt.
6Hee haft sien ieejnet Zelt
derchjeweet aus een Goaden;
hee haft sienen ieejnen Tempel veschoaft.
De Har haft de Heljedoag un Sabaten
en Zion loten vefaulen;
un en sienen grooten Oaja
haft hee Kjennich un Priesta veacht. #2Kjen 21,13
7De Har haft sikj von sienen Aultoa wajch jedreit,
un haft daut Heilichtum veschmäten.
Hee haft däm Fient loten dän Paulaust
en siene Macht nämen;
de framde schrieejen em Harn sienen Tempel,
soo aus wie aum Heljedach deeden.
8De Har haud sikj faust väajenomen,
de Mieren rom daut scheene Zion doltobräakjen;
hee trock dän Motbaunt stiew,
un hilt sikj nich trigj von venichten.
Hee leet de Mia, un waut sest Schutz jäwen sull,
stänen un unjagonen.
9De Puaten ligjen plaut oppe Ieed,
de Stangen toom de Däaren veschluten
sent vedorwen un halpen nuscht mea.
De Kjennich un aunjestalde sent
en een framdet Launt nenn veschlapt,
wua see daut Jesaz nich hoolen kjennen,
un de Profeeten kjeene Ensecht kjrieen
von däm Harn.
10Dee waut Leidasch en Zion wieren,
setten oppe Ieed un bliewen stell;
see besteewen sikj dän Kopp met Ieed,
un haben sikj Sakj äwajetrocken.
De Mejales von Jerusalem haben
äare Kjap bat oppe Ieed doljebekjt.
11Ekj hab mie schia de Uagen utjehielt,
von bennen ritt mie aules;
ekj weet meist nich wäa ekj sie,
wiels mien scheenet Volkj enne Grunt jebrocht es,
un Bäbes un Kjinja oppe Gaus veschmachten.
12Dee roopen no äare Mitta:
Waut kjenn wie äten? Waut kjenn wie drinkjen?
Oba see beschwiemen soo aus dee,
dee en äare Wunden oppe Gaussen ligjen,
un stoawen en äare Mitta äare Oarms
13Jerusalem, onse scheene Staut,
wäa kaun waut goodet von die sajen;
wäa es met die to vejlikjen?
Woo kaun ekj die treesten?
Zion wia eene schmocke Mejal,
oba wäa haft emol ea soo jeläden,
daut ekj ar doamet treesten kaun?
Waut die schot es soo groot aus daut Mäa,
woo kaun dan noch Rot doafäa sennen.
14Diene Profeeten haben die soont väajehoolen,
waut nich soo wia, un die noch veleid;
see haben die nich diene Sinden väajehoolen,
un diene Strof nich väajeboagen.
See haben jeprofezeit, waut nich soo wia,
un waut die dän orrajchten Wajch leid. #Jer 14,14-16; 23,16-22
15Dee, dee hia vebie komen, woaren de Henj klautschen
un sikj äwa daut scheene Jerusalem schudren un tieren.
Es dit de Staut von dee jesajcht wort,
daut dee de gaunz schmokste wia,
un to dee sikj aule Lenda freiden? #Psa 48,3; Hes 16,14
16Aul diene Fiend felt daut Mul op, wan see die seenen;
see schlonen äare Tänen toop un zischen:
Dee hab wie enne Grunt jebrocht!
Hia hab wie no jeluat;
un nu es daut bat doa.
Wie kjrieen daut selfst to seenen.
17De Har haft utjefieet, waut hee em Plon haud;
waut hee lang trigj jedreift haud, haft hee nu jedonen.
Onen Metjefeel haft hee vedorwen;
hee haft däm Fient de Macht äwa die jejäft;
hee haft däm Fient sikj freien loten äwa die.
18Jerusalem, roop lud no däm Harn!
Muchten de Tronen en Zion ranen
aus een Riefa, dee Dach un Nacht schält.
Jeff nich tweschenenn no,
un schoon diene Uagen nich.
19Sto opp un hiel enne Nacht;
go jieda Stund un saj däm Harn,
aules waut en dien Hoat es.
Strakj diene Henj ut no am,
un bäd om diene Kjinja äat haulwen,
dee opp jieda Gaussenakj
en Hungaschnoot lieden.
20Kjikj doch, Har,
un lot die daut groot woaren,
to wäm du dit jedonen hast.
Sullen Frues äare ieejne Kjinja äten,
dee see enne Oarms droagen?
Kaust du daut tooloten,
daut Priesta un Profeeten
em Harn sien Heilichtum
omjebrocht woaren? #5Mo 28,53-57; Jer 19,9
21De junge un de oole ligjen doot,
em Stoff oppe Gaussen;
Mejales un Junges sent vom Schwieet jestorwen.
Du hast dee en dien Oaja omjebrocht,
du hast dee onen Metlieden doljeschloagen.
22Du hast miene Fiend von runtom häa
toopjekroacht aus to een Fast,
soo daut kjeena wajchkjeem ooda äwableef,
aun dän Dach aus du dien Oaja utgootst.
Dee, dee ekj jedroacht un besorcht hab,
haft mien Fient omjebrocht.
Currently Selected:
Kloagleeda 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.