Johanes 21
21
Jesus bejäajent säwen Jinja aum See Tiberias
1Nohäa leet Jesus sikj noch eemol von siene Jinja seenen aum See Tiberias. Un dit es woo hee daut deed: 2Doa wieren Simon Petrus, Tomas de Zwillinkj, Natanael von Kana en Galiläa, Zebedäus siene Säns un noch twee aundre Jinja. #Joh 1,45 3Simon Petrus säd to an: Ekj go feschen. See säden to am: Dan kom wie uk met. See jinjen fuaz rut, stieejen en de Lomm un fuaren loos. Oba dee Nacht kjrieejen see nuscht. 4Tiedich zemorjes stunt Jesus aun de Wotakaunt, oba de Jinja wisten nich, daut daut Jesus wia. #Luk 24,16; Joh 20,14 5Jesus säd to an: Kjinja, hab jie nuscht to äten? See säden: Nä. #Luk 24,41 6Hee säd to an: Schmiet jun Nat aun de rajchte Sied von de Lomm rut, dan woa jie waut kjrieen. See schmeeten daut rut, un dan hauden see soo väl Fesch, daut see daut nich rut kjrieejen. #Luk 5,4-7 7Dan säd de Jinja, dän Jesus goot wia, to Petrus: Daut es de Har! Aus Simon Petrus hieed, daut daut de Har wia, trock hee sikj de Kjleeda äwa, wiels hee wia noaktich, un schmeet sikj em Wota nenn. #Joh 13,23 8De aundre Jinja kjeemen met de Lomm hinjaraun un schlapten daut Nat voll Fesch. See wieren soo bie 100 Meeta #21,8 Griechisch 200 Peichen ooda Ellen vom Launt. 9Aus see aun Launt stieejen, sagen see Fesch opp eenem Kolenfia, un uk Broot. 10Jesus säd to an: Brinjt uk noch von dee Fesch, dee jie jrod jefescht haben! 11Simon Petrus stieech nenn un schlapt daut Nat met 153 groote Fesch aun Launt. Un met aul dee Fesch doabennen reet daut Nat nich twei. 12Jesus säd to an: Nu komt Freestikj äten! Kjeena von de Jinja woagd sikj, am to froagen, wäa hee wia. See wisten, daut daut de Har wia. 13Jesus kjeem, neem daut Broot un jeef an daut, un jrod soo uk de Fesch. #Joh 6,11 14Dit wia nu daut dredde mol, daut Jesus sikj siene Jinja openboad, no däm daut hee vom Doot oppjestonen wia.
Jesus un Petrus
15Aus see ieescht jejäten hauden, säd Jesus to Simon Petrus: Simon Jona, es diene Leew to mie jrata, aus de aundre äare? Hee säd: Jo, Har, du weetst, daut ekj die goot sie. Jesus säd: Dan weid miene Lama! #Joh 1,42 16Hee säd noch eemol to am: Simon Jona, best du mie goot? Hee säd to am: Jo, Har, du weetst, daut ekj die goot sie. Jesus säd to am: Weid miene Schop! #1Pet 5,2.4 17Dan säd Jesus daut dredde mol to am: Simon Jona, best du mie goot? Petrus wort gaunz truarich, daut Jesus am toom dredden mol fruach, auf hee am goot wia. Hee säd to am: Har, du weetst om aules om, un du weetst, daut ekj die goot sie. Jesus säd to am: Weid miene Schop! #Joh 13,38; 16,30
18Ekj saj die de Woarheit: Aus du jinja wieescht, bungst du die selfst diene Kjleeda om, un jinjst han wua du han wust. Oba wan du ella woascht, woascht du de Henj utstrakjen, un die woat een aundra daut Gort aunholen un die wua hannämen, wua du nich han west. 19Dit säd hee, om auntodieden, derch waut fa eenen Doot hee Gott veharlichen wudd. Aus Jesus dit jesajcht haud, säd hee to am: Komm un folj mie no! #Joh 13,36
Petrus un de aundra Jinja
20Dan dreid Petrus sikj om un sach dän Jinja metkomen, dän Jesus goot wia, un dee sikj biem Owentkost äten aun Jesus siene Brost jelänt haud un jesajcht haud: Har, wäa es daut, dee die veroden woat? #Joh 13,23.25 21Aus Petrus dän sach, säd hee to Jesus: Har, waut saul met disem woaren? 22Jesus säd to am: Wan ekj daut soo well, daut hee bliewen saul bat ekj kom, waut jeit die daut aun? Komm du met mie met! 23Dan jinkj een Jeräd manke Breeda, daut dis Jinja nich stoawen wudd. Oba Jesus haud nich jesajcht, daut dee nich stoawen wudd, oba: Wan ekj daut soo well, daut dee bliewen saul bat ekj kom, waut jeit die daut aun.
Latste Wieed
24Dit es de Jinja, dee dit bezeijen deit un dee dit jeschräwen haft, un wie weeten, daut sien Zeichnis woa es. #Joh 15,27 25Doa sent noch väl aundre Sachen, dee Jesus jedonen haft. Ekj näm aun, wan dee aula eent nom aundren wudden oppjeschräwen woaren, de Welt wudd nich Rum fa aul dee Bieekja haben. #Psa 106,2; Joh 20,30
Currently Selected:
Johanes 21: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.