Johanes 13
13
Jesus wauscht siene Jinja de Feet
1Daut wia jrod ver däm Passafast. Jesus wist, daut siene Tiet jekomen wia, dise Welt to veloten un trigj nom Voda to gonen. Hee wia de sienje en dise Welt emma goot jewast. Un soo goot wia hee an uk bat aun sienem Enj. #Joh 7,30; 17,1 2Daut wia biem Owentkost äten. De beesa Fient haud däm Judas Iskariot, Simon sien Sän, daut aul en daut Hoat jejäft, Jesus to veroden. #Luk 22,3 3Un Jesus wist, daut de Voda am aules en de Henj jejäft haud, un daut hee von Gott jekomen wia un wada no Gott jinkj. #Joh 3,35; 16,28 4Dan stunt hee vom äten opp, läd siene Kjleeda tosied un bunk sikj een Haunduak om. 5Hee goot Wota en eene Komm, un funk aun, de Jinja de Feet to wauschen, un drieejd dee met däm Haunduak, daut hee sikj omjebungen haud. 6Aus hee bat Simon Petrus kjeem, säd dee to am: Har, wauschst du mie de Feet? 7Jesus säd to am: Waut ekj nu doo, vesteist du nu noch nich. Du woascht daut oba nohäa vestonen. 8Petrus säd to am: Du saust mie niemols de Feet wauschen! Jesus säd to am: Wan ekj die nich wausch, hast du kjeen Poat aun mie. 9Dan säd Simon Petrus to am: Har, nich bloos de Feet, oba uk de Henj un dän Kopp! 10Jesus säd to am: Wäa jewoschen es, däm brukt sest nuscht aus de Feet #13,10 Eenje oole Schreften sajen Wäa jewoschen es brukt sikj nich aufspeelen. jewoschen woaren, wiels hee es gaunz rein. Un jie sent rein, oba nich aula. #Joh 15,3 11Hee wist, wäa am veroden wudd. Doawäajen säd hee, see wieren nich aula rein.
12Aus hee an ieescht de Feet jewoschen haud, neem hee sikj wada siene Kjleeda om un sad sikj dol un säd noch eemol to an: Weet jie, waut ekj junt jedonen hab? 13Jie nanen mie Har un Liera, un daut saj jie rajcht, wiels daut es, waut ekj sie. #Mat 23,8.10 14Un wan ekj, jun Har un Liera, junt de Feet jewoschen hab, dan sell jie junt uk unjarenaunda de Feet wauschen. #Luk 22,27 15Ekj hab junt een Biespel jejäft, daut jie uk soo doonen, aus ekj junt jedonen hab. #Flp 2,5; 1Pet 2,21 16Ekj saj junt gaunz opp iernst: Een Kjnajcht es nich jrata aus sien Har, un dee doa jeschekjt es, es nich jrata aus dee, dee am jeschekjt haft. #Mat 10,24 17Wan jie dit nu weeten, dan sent jie seelich, wan jie daut uk doonen. #Mat 7,24
18Ekj räd nich von junt aula. Ekj weet, wäm ekj utjewält hab. Oba daut mott soo romkomen aus de Schreft sajcht: “Soogoa mien gooda Frint, en däm ekj vetruen haud, dee mien Broot eet, klunjt opp mie met de Feet.” #Psa 41,10 19Ekj saj junt daut nu, ea daut passieet, daut jie, wan daut ieescht passieet, jleewen daut ekj dit sie. 20Ekj saj junt de Woarheit: Dee wäa dän oppnemt, dän ekj schekj, dee nemt mie opp. Un wäa mie oppnemt, nemt dän opp, dee mie jeschekjt haft. #Mat 10,40
Jesus sajcht, wäa am veroden woat
(Mat 26,20-25; Mrk 14,17-21; Luk 22,21-23)
21Aus Jesus dit jesajcht haud, wia hee em Jeist bedrekjt un säd: Ekj saj junt de Woarheit: Eena von junt woat mie veroden. #Joh 12,27 22Dan kjikjten de Jinja sikj unjarenaunda aun un wundaden, von wäm hee räd. 23Eena von an, dee Jinja, dän Jesus goot wia, wia daut dichste bie Jesus. #Joh 19,26; 20,2; 21,20 24Däm plinkjt Simon Petrus too, hee sull am froagen, wäm hee meend. 25Hee länd sikj trigj aun Jesus naun un fruach am: Har, wäa es daut? 26Jesus säd: Daut es dee, däm ekj daut enjedukte Biet Broot jäw. Un hee dukt een Biet en, un jeef daut Judas, däm Simon Iskariot sienen Sän. 27Un aus Judas daut Biet Broot neem, fua de Soton en am nenn. Dan säd Jesus to am: Waut du doonen west, daut doo boolt! 28Oba doa aum Desch wist kjeena, wuarom Jesus daut to am säd. 29Wiels Judas de Jelttausch haud, dochten eenje, daut Jesus to am säd, hee sull gonen un kjeepen, waut see toom Fast brukten, ooda daut hee waut fa de oame jäwen sull. 30Sooboolt aus Judas daut Broot jenomen haud, jinkj hee rut. Un daut wia Nacht.
Daut niee Jeboot
31Aus Judas ieescht wajch wia, säd Jesus: Nu es de Menschensän veharlicht, un Gott es derch am veharlicht. #Joh 12,23.28 32Wan Gott derch am veharlicht worden es, dan woat Gott am uk en sikj veharlichen, un woat am fuaz veharlichen. #Joh 17,1-5 33Leewe Kjinja, ekj sie aul mau een kortet stootje bie junt. Jie woaren no mie sieekjen. Un soo aus ekj to de Juden säd, saj ekj uk to junt: Wua ekj hango, kjenn jie nich hankomen. #Joh 8,21
34Ekj jäw junt een nieet Jeboot, jie sellen junt unjarenaunda goot sennen, krakjt soo aus ekj junt goot jewast sie. June Leew fa eenaunda saul jrod soo groot sennen, aus miene Leew fa junt. #Joh 15,12-13.17 35Wan jie Leew unjarenaunda haben, woat aulemaun seenen, daut jie miene Jinja sent.
Jesus un Petrus
(Mat 26,31-35; Mrk 14,27-31; Luk 22,31-34)
36Dan fruach Simon Petrus am: Har, wua jeist du han? Jesus säd to am: Wua ekj hango, kjenn jie mie nu nich hinjaraun komen. Oba nohäa woa jie doa uk hankomen. #Joh 21,18-19 37Petrus säd to am: Har, wuarom kaun ekj nu nich met die metkomen? Ekj sie reed, mien Läwen fa die to loten. 38Jesus säd to am: Wurscht du dien Läwen fa mie jäwen? Ekj saj die de Woarheit: Ea de Hon kjreien woat, woascht du daut dree mol vesträden haben, daut du mie kjanst.
Currently Selected:
Johanes 13: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.