Rechta 21
21
De Staum Benjamin doaf nich utstoawen
1De Mana von Israel hauden en Mizpa jeschwuaren un jesajcht: Kjeena von ons doaf siene Dochta eenen Maun ut Benjamin to Fru jäwen! #Rech 20,1 2Un de Israeliten kjeemen no daut Heilichtum en Betel un schrieejen dän gaunzen Dach ver Gott. See hielden sea, un säden: #Rech 20,18.23.26 3Har, du Gott en Israel, wuarom es daut en Israel passieet, daut Israel vondoag een Staum weinja jeworden es?
4Aum näakjsten Morjen muak daut Volkj sikj tiedich opp un bud dort eenen Aultoa un opfad Gott Brauntopfa un Dankopfa. 5Dan wort jefroacht; Es von de Stam en Israel irjentwäa nich jekomen, aus to de Vesaumlunk ver däm Harn oppjeroopt wort? Wiels see hauden jeschwuaren: Wäa nich nom Harn no Mizpa kjemt, mott stoawen! 6Un de Israeliten deed daut leet om äaren Broodastaum Benjamin, un see säden: Vondoag es een gaunza Staum ut Israel utjerot. 7Woo wudd wie an halpen kjennen, daut de äwajebläwne Benjaminita to Frues komen? Wiels wie haben bie däm Harn jeschwuaren, daut wie an kjeene von onse Dajchta to Frues jäwen! 8Un see fruagen: Es veleicht eena ut de Stam von Israel nich to de Vesaumlunk ver däm Harn jekomen? Un werkjlich, ut de Staut Jabesch en Gilead wia kjeena no daut Loaga to de Vesaumlunk jekomen. 9See talden daut Volkj, un stalden faust, daut doa kjeen Birja ut Jabesch en Gilead wia.
10Dan schekjt de Vesaumlunk von Israel doa 12.000 Kjrieja han met däm Oppdrach: Got han un schlot de Birja von Jabesch en Gilead met Frues un Kjinja toop met Schwieed doot! 11Un daut es, waut jie doonen sellen: Aun aule Mana, un aun aule Frues, waut eenen Maun jehaut haben, sell jie dän Baun derchfieren! #(11 un 12) 4Mo 31,17-18 12Un see fungen mank de Birja von Jabesch en Gilead 400 Mejales, dee onbefriet wieren un kjeenen Maun aunjehieeden. Dee brochten see no daut Loaga en Silo, waut em Launt Kanaan licht. 13Dan schekjten de vesaumelde Israeliten Bootschofta han un vehaundelden met de Benjaminita, waut opp dän Rimmon Steen wieren, un vespruaken an Fräd. #Rech 20,47 14Soo kjeemen de Benjaminita to jane Tiet trigj. Un see jeewen an de Mejales, dee see bie de Bestrofunk von Jabesch en Gilead veschoont hauden. Oba daut wieren noch nich jenuach fa an.
Frues ut Silo fa de Mana von Benjamin
15De Israeliten wieren truarich, wiels de Har eenen Staum ut äare Medd rutjeräten haud. 16Un de Leida vom Volkj säden: Woo sell wie de äwajebläwne Benjaminita Frues veschaufen? Wiels en gaunz Benjamin es kjeene Fru aum Läwen jebläwen. 17Un de äwaläwende von Benjamin motten doch äa Oafgoot hoolen, om daut nich een Staum von Israel utstoaft. 18Oba wie kjennen an onse Dajchta nich to Frues jäwen, wiels de Israeliten jeschwuaren un jesajcht haben: Veflucht es dee, dee eenen Maun ut Benjamin eene Fru jeft! 19Un see säden: Kjikjt, jieda Joa woat en Silo däm Harn to Ieren een Fast jefieet. Silo lach nom Nuaden von Betel, un nom Oosten von de Gaus, waut von Betel no Sichem jeit, un nom Sieden han von Lebona. #Jos 18,1 20Un see säden to de Benjaminita: Got un lajcht junt en de Wiengoades oppe Lua, 21un wan jie dan seenen, daut de Mejales von Silo toom Fastdaunz komen, dan moaracht ut de Wiengoades rut un jriept junt jieda eene Fru un nämt dee met no Hus nom Staum Benjamin. #2Mo 21,16; 5Mo 24,7 22Wan oba äare Vodasch ooda äare Breeda komen un sikj bie ons doaräwa bekloagen, dan woa wie to an sajen: Erboarmt junt äwa ons, wie haben nich fa eenen jiedren eene Fru jefungen en däm Kaumf; un jie haben an dee uk nich jejäft, soo daut jie aun nuscht schuldich sent. 23De Mana von Benjamin befoljden dän Rot, un jreepen sikj jieda eene von de daunzende Mejales un neemen sikj dee to Fru. Dan jinjen see trigj no äa Oafgoot, buden de Städa wada opp un wonden doabennen. 24Uk de Israeliten jinjen utenaunda, een jiedra no sienen Staum un no siene Volkjsgrupp, no daut Oafgoot, waut an wia toojedeelt worden. 25To dee Tiet wia kjeen Kjennich en Israel; un een jiedra deed, waut hee fa rajcht hilt. #Rech 17,6
Currently Selected:
Rechta 21: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.