Habakuk 3
3
1Dit es een Jebäd vom Profeet Habakuk, en däm Stiel von een Trualeet.
2 Har, ekj hab jehieet, waut von die jesajcht woat,
un ekj hab Forcht fa diene Wäaj.
Oba en dise Tiet, wies ons dee noch wada,
un en dise Tiet, lot ons dee noch wada weeten.
Wan du uk sea veläajen best, denkj wada aun Jnod.
3Gott kjemt von Teman, un de Heilja von de Paran Boaj.
Hee woat em gaunzen Himmel jeloft;
doa woat oppe gaunze Welt goodet von am jesajcht. #5Mo 33,2
4Hee dacht aus eene Laump,
daut strolt von siene Henj;
un en dise wia siene Macht vestoaken.
5Ver am gonen Krankheiten,
un hinja am en siene Spoaren
komen Schwierichkjeiten.
6Hee stunt opp, un de Ieed scheddad;
hee kjikjt, un de Velkja schudaden sikj.
De elste Boaj worden veschmatat,
un wua daut noch emma wia boajopp jewast,
doa buach sikj daut rauf.
Hee deed soo aus hee lang trigj jedonen haud. #Psa 104,32
7Ekj sach de Zelten en Kuschan wieren en Trubbel,
un de Woninjen en Midian zettaden.
8 Har, wieescht du vestalt äwa de Riefasch?
Wieescht du oajalich äwa de Läachten,
ooda vedrislich met daut Mäa,
aus du met diene Pieed un Woages kjeemst,
met dee du de äwahaunt neemst?
9Du trokst dienen Boagen rut,
un lädsd de Feilen aum Baunt.
Du reetst daut Launt opp met Riefasch.
10De Boaj sagen die un dee enjsten sikj.
Daut poascht met Räajen,
un daut deepe Mäa breld
un hoof siene Walen huach opp. #Psa 77,17
11De Sonn un de Mon stunden stell opp äare Städen,
aus diene Feilen vebie blitzen
un dien Schwieet an veblenden deed. #Jos 10,13
12Em Oaja jinjst du derch daut Launt
un vetraumpelsd de Velkja.
13Du kjeemst äwadäl om dien Volkj to halpen,
du wust dienen Jesaulwden raden.
Du woascht daut Dak von de gottloose äa Hus twei schlonen,
daut von bowen bat unjen aules to seenen woat sennen. Sela. #Psa 18,8.16
14Dee waut ieescht soo bosich aus een Wint aunkjeem,
om aules to vedoawen,
un aus wan hee de oame met Freid
un onverhofs veschlinjen wudd,
kjrieech nu dien Spies derch sien Kopp.
15Du traumpelsd met diene Pieed derch daut Mäa
un rieezhd daut groote Wota opp.
16Wan ekj dit hia, flautat mie aules,
un miene Leppen zinjren von de Norecht.
Miene Been sent aus vefult, un miene Kjneeen flautren.
Ekj woa stell wachten bat dän Dach
wan daut vedoawen daut Volkj traft,
waut ons aunjript.
17Wan de Fiejenboom uk nich jreen woat,
un de Wienranken nuscht väabrinjen,
wan de Oliewenbeem kjeene Frucht droagen,
un daut Flekj kjeene Arnt brinjt,
wan de Schop von de Häad woaren veräten woaren,
un daut Veehock onen Vee es,
18doawäajen woa ekj mie to däm Harn freien,
un mie opp Gott veloten,
dee mie raden deit. #Jes 61,10
19De Har, dee aules kaun,
dee moakt miene Feet soo aus Ree Feet,
daut ekj äwa irjent eenen Boajch gonen kaun.
Fa däm Jesankleida, un met siene Instrumenten. #Psa 18,34
Currently Selected:
Habakuk 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.