Galata 2
2
De Leidasch en de ieeschte Jemeent aunerkjanen Paulus
1Vieetieen Joa lota reisd ekj wada no Jerusalem met Barnabas toop un neem Titus uk met. #(1-10) Apost 15,1-29; 4,36 2Dit mol jinkj ekj han, wiels Gott mie daut soo enjeef, un läd an mien Evangelium väa, daut ekj to de Velkja prädjen doo. Ekj unjahilt mie em priwauten met dee, dee en de Jemeent eenen gooden Nomen haben. Daut deed ekj doawäajen, daut see vestonen kunnen, waut ekj jeprädicht haud, daut see met mie stemmen kunnen, daut ekj nich vejäfs unja an jeoabeit haud ooda oabeiden doo. 3Un see velangden nich emol, daut Titus sull beschnäden woaren, dee doch een Griech es. #Apost 16,3; 1Kor 9,21 4Oba de faulsche Breeda, dee sikj jeheem nenjeschlikjt hauden onse Frieheit en Christus Jesus uttospionieren, un dee ons wada aum Jesaz vesklowen wullen, 5fa dee hab wie opp kjeenen Wajch nojejäft, daut de Woarheit em Evangelium fa junt stonen bliewen wudd. #Gal 3,1 6Un von dee, dee eenen gooden Nomen hauden, wort to miene Bootschoft nuscht toojesat. (Un wäa see sent, moakt bie mie kjeenen Unjascheet; wiels bie Gott sent wie aula eent.) 7Em Jäajendeel, aus dee sagen, daut mie daut aunvetrut wia, daut Evangelium mank dee to prädjen dee nich beschnäden wieren, jrod soo aus Petrus daut Evangelium aunvetrut wia fa dee, dee beschnäden sent, #Efs 3,1-2 8(wiels dee, dee derch Petrus wirkjt de beschnädne daut Evangelium to prädjen, wirkjt uk en mie, dee daut Evangelium to prädjen dee nich beschnäden sent) 9aus dee de Jnod sagen dee mie jejäft wia, jeewen Jakobus, Petrus un Johanes, dee aus goode Stendasch aunjeseenen worden, mie un Barnabas de rajchte Haunt onse Jemeenschoft met an to schluten, daut wie sullen no de Velkja gonen, un see no dee, dee beschnäden sent. #Joh 1,42 10Aules waut see noch to sajen hauden wia, daut wie aun de oame denkjen sullen, un daut hab ekj selfst noch emma jieren jedonen. #Apost 11,29-30; 2Kor 8,1—9,15
Paulus finjt daut needich Petrus trajchttowiesen
11Oba aus Petrus no Antiochia kjeem, hab ekj am ver aule trajchtjestalt, wiels hee sikj veschulcht haud. 12Wiels ea doa jewesse Mana kjeemen, dee von Jakobus jeschekjt wieren, eet hee met de Nichjuden toop, oba aus dee kjeemen, trock hee sikj trigj un hilt sikj oppoat, wiels hee fercht sikj fa de Juden, dee opp de Beschniedunk hilden. #Apost 11,2-3 13Un wiels hee soo deed, deeden de aundre Juden krakjt soo. Soogoa Barnabas heicheld met. 14Oba aus ekj sach, daut see nich fa de Woarheit em Evangelium enstunden, säd ekj to Petrus doa ver aulem: Wan du, aus een Jud, soo läwen deist aus de Velkja un nich aus een Jud, woo kaust du dan de Velkja bedwinjen soo to läwen aus Juden?
15Wie selfst, dee wie aus Juden jebuaren un nich Sinda von de Velkja sent, 16weeten daut een Mensch nich derch daut Jesaz hoolen jerajcht woat, oba derch dän Gloowen aun Jesus Christus. Wie haben selfst aun Christus Jesus jejleeft, om derch dän Gloowen aun Christus jerajchtfoadicht to woaren, wiels derch daut Jesaz hoolen kaun kjeen Mensch jerat woaren. #Reema 3,20.28; Efs 2,8
Jesaz un Jnod
17Wan wie, en däm daut wie onse Rajchtfoadjunk en Christus sieekjen, onse Sind enseenen, steit Christus dan fa de Sind en? Sea lang nich. 18Oba wan ekj daut wada oppbu, waut ekj doljebroaken hab, moak ekj mie selfst toom Sinda. 19Ekj sie derch daut Jesaz fa daut Jesaz jestorwen, daut ekj fa Gott läwen kaun. #Reema 7,6 20Ekj sie met Christus metjekjriezicht. Daut sie ieejentlich nich mea ekj dee doa läft, daut es Christus dee en mie läft. Daut Läwen daut ekj hia em Fleesch läw, läw ekj em Gloowen aun Gott sienen Sän, dee mie goot wia un sikj selfst fa mie hanjeef. #Joh 17,23; Gal 1,4 21Ekj stal Gott siene Jnod nich tosied, wiels wan wie derch daut Jesaz kunnen jerajcht woaren, dan wia doa kjeene Uasoak, daut Christus haud stoawen must.
Currently Selected:
Galata 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.