Hesekiel 48
48
Woo daut Launt enjedeelt saul
1Dit sent de Nomes von de Stam. Von de nuadne Jrens, dee vom Mäa derch dän Hamat Stich no Hetlon un Hazar Enan jeit, opp de nuadne Jrens von Damaskus, tweschen Damaskus un Hamat, saul Dan een Poat haben; daut saul von de oostne Jrens bat de wastne rieekjen. #Hes 47,15-17 2Daut näakjste von Dan saul Asser een Poat haben; daut saul von de oostne Jrens bat de wastne rieekjen. 3Biesied Asser saul Naftali een Poat haben; daut saul von de oostne Jrens bat de wastne rieekjen. 4Biesied Naftali saul Manasse een Poat haben; daut saul von de oostne Jrens bat de wastne rieekjen. 5Biesied Manasse saul Efraim een Poat haben; daut saul von de oostne Jrens bat de wastne rieekjen. 6Biesied Efraim saul Ruben een Poat haben; daut saul von de oostne Jrens bat de wastne rieekjen. 7Biesied Ruben saul Juda een Poat haben; daut saul von de oostne Jrens bat de wastne rieekjen.
8Biesied Juda, von de oostne Jrens bat de wastne, saul een Poat tosied jesat woaren daut 25.000 Ellen breet es, un soo lank aus sest een Poat vom Oosten bat däm Wasten. Un doa enne Medd von daut Poat saul daut Heilichtum sennen. #(8-20) Hes 45,1-8 9Daut heilje Launt, daut jie besonda aufjäwen fa däm Harn, saul 25.000 Ellen bie 20.000 Ellen sennen. 10Dit Launt saul soo enjedeelt woaren: Een heiljet Poat fa de Priesta saul 25.000 Ellen aun de nuadne Sied un 10.000 Ellen aun de wastne un oostne Sieden, un 25.000 Ellen aun de siedne Sied sennen. Daut Heilichtum fa däm Harn saul doa enne Medd stonen. 11Dit heilje Poat es fa de enjesäajende Priesta, dee von Zadok aufstaumen, dee mie tru bleewen en äaren Deenst un nich met de Israeliten toop auffollen, soo aus de Leviten dee von mie auffollen. #Hes 40,46 12Dit es een besondret Poat biesied de Leviten äa Poat opp daut heilje Launt, un es daut heilichste Poat. 13Biesied de Priesta äa Poat sellen de Leviten een Poat haben daut 25.000 bie 10.000 Ellen mat. Dee saul eene volle 25.000 bie 10.000 Ellen mäten. 14Kjeen Poat von dit Launt saul vekoft ooda vetuscht woaren. Dit es daut baste Poat von daut Launt un doaf nich wiedajejäft woaren; daut es heilich fa däm Harn. 15Daut äwaje Poat, waut dan noch 5.000 bie 25.000 Ellen mat, es nich een jeweidet Poat. Daut saul fa de Staut sennen fa Woninjen un Weid. Enne Medd von daut saul de Staut stonen. 16De Staut saul 4.500 Ellen aun de nuadne un de siedne Sieden mäten un uk 4.500 Ellen aun de oostne un wastne Sieden. #Opb 21,16 17Un aun jieda Sied von de Staut saul eene Striep Weidstap sennen, 250 Ellen breet. 18Aun de oostne un wastne Sieden, soo wiet aus daut heilje Launt rieekjt, sent Flekja waut 10.000 Ellen mäten. De Oabeida enne Staut woaren to äten haben von daut waut dit Launt drajcht. 19De Oabeida von aule Stam en Israel en de Staut woaren daut beoabeiden. 20Daut gaunze, daut heilje Launt met daut waut to de Staut jehieet, jeft dan een veakaunt daut 25.000 Ellen aun jieda Sied mat. 21Daut waut dan noch aun beid Sieden von dit heilje Launt un daut Poat fa de Staut es, jehieet däm Volkjsleida. Aun de oostne Sied gaunz bat de oostne Jrens, un aun de wastne Sied bat aun de wastne Jrens, krakjt soo wiet aus de Stam äare Stekja sent, jehieet däm Volkjsleida. Daut heilje Launt met dän Tempel enne Medd, #(21 un 22) Hes 45,7 22un de Leviten äa Poat, un daut Poat fa de Staut es enne Medd von däm Leida sien Poat. Dit es daut Poat waut tweschen Juda sien Poat un Benjamin sien Poat es.
23Dan sent noch de Flekja fa de äwaje Stam. Benjamin saul een Poat haben; daut saul von de oostne Jrens bat de wastne rieekjen. 24Biesied Benjamin saul Simeon een Poat haben; daut saul von de oostne Jrens bat de wastne rieekjen. 25Biesied Simeon saul Isachar een Poat haben; daut saul von de oostne Jrens bat de wastne rieekjen. 26Biesied Isachar saul Sebulon een Poat haben; daut saul von de oostne Jrens bat de wastne rieekjen. 27Biesied Sebulon sien Poat saul Gad een Poat haben; daut saul von de oostne Jrens bat de wastne rieekjen. 28Biesied Gad sien Poat saul em Sieden de Jrens sennen, von Tamar bat dän bewessaden Plauz bie Kadesch un dan delenjd dän Ägiptischen Riefa no daut Meddelmäa. #Hes 47,19 29Dit es daut Launt woont jie junt mank de Stam von Israel endeelen sellen, daut et junt es, un dit sellen de Flekja fa jiedren sennen, sajcht Gott de Har.
De Puaten en Jerusalem un de niea Nomen
30Un dit sent de Puaten fa de Staut. De nuadne Sied von de Staut, dee 4.500 Ellen es, #(30-35) Opb 21,12-13 31saul dree Puaten haben. Daut ieeschte es daut Ruben Puat, daut tweede, daut Juda Puat, un daut dredde, daut Levi Puat. De Puaten aun de Staut sellen de Nomes von de Stam en Israel haben. 32Aun de oostne Sied, dee uk 4.500 Ellen es, sellen uk dree Puaten sennen. Daut ieeschte es daut Josef Puat, daut tweede es daut Benjamin Puat un daut dredde, daut Dan Puat. 33Aun de siedne Sied, dee uk 4.500 Ellen es, sellen uk dree Puaten sennen. Daut ieeschte es daut Simeon Puat, daut tweede, daut Isachar Puat, un daut dredde, daut Sebulon Puat. 34Un aun de wastne Sied, dee uk 4.500 Ellen es, sellen dree Puaten sennen. Daut ieeschte es daut Gad Puat, daut tweede, daut Asser Puat, un daut dredde, daut Naftali Puat. 35De Mot runtom de Staut saul 18.000 Ellen sennen; un de Staut saul wiedahans: “De Har es doa”, heeten. #Jes 60,14; Hes 43,7; Opb 21,3
Currently Selected:
Hesekiel 48: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.