2. Kjennichs 25
25
De latsta Kjennich: Zedekia
1Un en Zedekia sien 9. Joa aus Kjennich, aum 10. Dach von de 10. Moonat kjeem de babelonischa Kjennich Nebukadnezar met siene gaunze Armee no Jerusalem un sad sikj runtom de Staut un bemieejd sikj de Staut met sien Jereetschoft un Väahaben entonämen. #(1 un 2) Jer 34,1 2Un see bleewen doa bat en Zedekia sien alwdet Joa aus Kjennich. 3Dan aum 9. Dach von de 4. Moonat kjeem doa soone groote Hungaschnoot en de Staut, daut de Lied von oppem Launt nich mea to äten hauden. 4Un de Mia rom de Staut wort derchjebroaken. Un de Kjennich un de gaunze Armee randen enne Nacht wajch derch daut Puat tweschen de twee Mieren, dee aun dän Wajch es, dee nom Kjennich sien Goaden jeit. De Chaldäa hauden sikj runtom de Staut jeloagat. Un de Kjennich muak sikj oppem Wajch no däm Jordan Tol. 5Oba de babelonische Armee juach däm Kjennich hinjaraun, un see holden am en de Jäajent von Jericho en. Un aul de Soldoten, dee met am wieren, veleeten am un randen wajch. 6De babelonische Soldoten neemen däm Kjennich faust un brochten am no äaren Kjennich en Ribla. Dee spruak daut Uadeel äwa am ut. 7See brochten Zedekia siene twee Junges om, ver am. Dan stuaken see am siene Uagen ut un bungen am faust en Kjäden un neemen am no Babel. #2Sam 12,10
8Aum 7. Dach von de 5. Moonat en Nebukadnezar sien 19. Joa aus Kjennich von Babel, kjeem Nebusaradan, de väaschta von däm Kjennich siene Wajchta, no Jerusalem, aus de Kommandaunt von de babelonische Armee. 9Un hee vebrend däm Harn sien Hus un däm Kjennich sien Hus un aule Hiesa en Jerusalem. Hee vebrend aule groote Jebieda en Jerusalem met Fia. 10Un de gaunze babelonische Armee, waut met däm väaschten von däm Kjennich siene Wajchta doa wieren, reeten de Mia dol waut rom Jerusalem wia. 11Un Nebusaradan neem de äwaje Lied von en de Staut faust, un dee waut sikj däm babelonischen Kjennich hanjejäft hauden, un de äwaje von daut Volkj, un veschlapt dee uk. 12Oba de Kommandaunt leet waut von de oamste Menschen en daut Launt bliewen, daut see kunnen de Wiengoades un daut Akalaunt beoabeiden. 13Un de Chaldäa vebruaken aul daut Brons, met waut de Past en däm Harn sien Hus, un de Deschen un de groote Komm, woone see daut Mäa nanden, jemoakt wieren, un neemen daut no Babel. #Jer 27,19-22 14See neemen uk aul de Gropes, Scheflen, Jereetschoft toom de Laumpen besorjen, Läpels un aundre bronsne Dinja, dee biem opfren jebrukt worden, 15un de Fiabehelta un Kommen. De väaschta von däm Kjennich siene Wajchta neem aul de goldne Sachen un aul de selwane Sachen. 16Hee neem de beid groote Past, daut Mäa un daut Jestal doatoo, waut Salomo fa däm Harn sien Hus jemoakt haud. Daut Brons von aul de Dinja wia soo väl, daut et nich to wäajen wia. #1Kjen 7,15.23.27 17De twee groote Past wieren jieda 9 Meeta huach un hauden doabowa noch jieda een bronsnet Koppstekj, daut aundathaulw Meeta huach wia.
18De väaschta von däm Kjennich siene Wajchta neem dän väaschten Priesta, Seraja, un dän tweeden Priesta, Zefanja un de dree Wajchta, dee bie daut Puat oppausten. 19Un en de Staut neem hee däm, dee Kommandaunt äwa de Soldoten wia, un fief Mana von däm Kjennich sien Rot, dee noch en de Staut wieren. Hee neem uk dän Schriewa von däm väaschten von dee, dee en daut Launt de Soldoten opproopt, un 60 Mana von daut Volkj em Launt. 20Aul dise neem Nebusaradan, de väaschta von däm Kjennich siene Wajchta, un brocht dee no Ribla no däm babelonischen Kjennich. 21Un de babelonischa Kjennich schluach dee aula doot en Ribla en de Hamat Jäajent. Daut es woo Juda ut sien Launt rutjeschlapt wort. #2Kjen 23,33
De Gowernia Gedalja
(Jer 40,7-9; 41,1-3; 43,5-7)
22Un de babelonischa Kjennich Nebukadnezar stald Gedalja, Ahikam sien Sän un Schafan sien Grootsän aun, äwa dee waut noch von daut Volkj jebläwen wieren. 23Aus aul de väaschte von de Soldoten, dee noch opp daut Launt runtom wieren, un äare Mana hieeden, daut de babelonischa Kjennich haud Gedalja aunjestalt aus Leida, kjeemen see no Mizpa toom met am räden. Doa wieren Jischmael, Netanja sien Sän, Johanan, Kareach sien Sän, Seraja, Tanhumet sien Sän, von Netofa, un Jaasanja, däm sien Voda von Maacha kjeem, un äare Mana. 24Un Gedalja vespruak dise Grupp: Habt nich Angst fa de Chaldäa äare aunjestalde Mana. Blieft opp daut Launt un schekjt junt to däm Kjennich von Babel. Dan woat aules goot gonen.
25Oba dan en de säwende Moonat kjeem Jischmael, Netanja sien Sän un Elischama sien Grootsän, dee von de Kjennichs Famielje wieren, un tieen aundre Mana met an, no Mizpa un schluagen Gedalja un de Mana von Juda un de Chaldäa, dee met am wieren, doot. 26Dan trock daut gaunze Volkj, kjliene un groote, un aule väaschte von de Soldoten no Ägipten, wiels see sikj fa de Chaldäa enjsten. #5Mo 28,68
Noch Hopninj
(Jer 52,31-34)
27Dan en daut Joa aus Ewil Merodach Kjennich en Babel wort, leet hee Jojachin, dee Kjennich von Juda jewast wia, utem Jefenkjnis. Hee wort aum 27. Dach, en de 12. Moonat, en daut 37. Joa, daut hee faust jenomen wia, rutjeloten. #2Kjen 24,15 28Un de babelonischa Kjennich räd frintlich met am, un jeef am eene Städ, dee hecha wia aus de aundre Kjennichs, dee met am en Babel faustjenomen wieren. 29Un Jojachin brukt nich mea de Kjleeda von eenen faustjenomnen, un hee eet aule Dach aun däm Kjennich sien Desch. 30Un hee kjrieech jieda Dach eene bestemde Somm, waut hee toom läwen brukt. Hee kjrieech daut soo lang aus hee läwd.
Currently Selected:
2. Kjennichs 25: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.