1. Timotäus 1
1
Gruss
1Paulus, Christus Jesus sien Apostel, aunjestalt von Gott, ons Heilant, un von Christus Jesus, dee onse Hopninj es. #Kol 1,27 2No Timotäus, dee derch dän Christengloowen mien rajchta Sän jeworden es: Ekj wensch junt Jnod, Metleet un Fräd von Gott däm Voda un von onsen Harn Christus Jesus. #Apost 16,1-2; Tit 1,4
Woarnunk fa faulsche Lieren un de Oppgowen von Timotäus
3Du saust en Efesus bliewen, soo aus ekj die säd aus ekj opp däm Wajch no Mazedonien wia, wiels doa sent eenje Menschen met eene vedreide Lia oppjekomen, un dee saust du woarnen, opptohieren faulschet to lieren. #Apost 20,1 4See sellen äare windje Jeschichten un lange Listen von Jeschlajchtsrejista auntsied lajen, wiels dee veuasoaken bloos mea nuzloose Froagen, wuaderch de Gloowen aun Gott nich jebätat woat. #1Tim 4,7 5Aules waut wie lieren es doatoo, daut doa Leew ut een reinet Hoat, een goodet Jewessen un eenen stoakjen Gloowen es. #Mat 22,37-40; Reema 13,10; Gal 5,6 6Von daut jrod sent eenje aufjekomen un brinjen äare Tiet too met Striedarieen un Räden, wua nuscht goodet doarhinja es. #1Tim 6,4.20 7See muchten jieren Lierasch sennen, dee daut Jesaz lieren. See weeten oba selfst nich, von waut see räden.
8Wie weeten, daut daut Jesaz goot es, wan daut rajcht jebrukt woat. #Reema 7,12 9Wie motten vestonen, daut daut Jesaz nich fa de jerajchte jejäft es, oba fa de jesazloose un Vebräakjasch, fa de gottloose un Sinda, fa de onheilje un orreine, fa Merdasch, dee Voda un Mutta ombrinjen, #(9-11) 1Kor 6,9-11 10fa de Huara un soone, dee met äa ieejnet Jeschlajcht Schaund driewen, fa Kjinjastäla, fa Lieeja, fa dee, dee een faulschet Zeichnis jäwen, un fa aules, waut sest noch jäajen Gott siene heilje Lia 11un daut wundavolle Evangelium es, waut de seelja Gott mie aunvetrut haft.
Dank fa Gott siene Jnod
12Ekj dank onsen Harn Christus Jesus, dee mie de Krauft jejäft haft, miene Oabeit to doonen. Ekj dank am uk doafäa, daut hee mie wieet jeacht un aunjestalt haft, am to deenen. #(12-16) Apost 9,15; 1Kor 15,9-10; Gal 1,13-16 13Wan ekj verhäa uk een rietenda Vefolja un Lastra wia, Gott oba haud Metleet met mie, wiels ekj wist nich waut ekj deed, wiels ekj dan noch nich aun Jesus jleewd. 14Oba de Har haft mie siene Jnod rikjlich tookomen loten, un uk dän Gloowen un de Leew jeschonken, soo aus hee ons daut en Christus Jesus jeft. 15Daut es eene Woarheit, dee voll auntonämen un to jleewen es, daut Christus Jesus en dise Welt jekomen es, de Sinda seelich to moaken, von dee ekj de oajchsta sie. #Luk 19,10 16Oba Gott haud jrod doawäajen Metleet met mie, daut et aun mie sull to seenen sennen, woo groot Jesus Christus siene Jedult met dän jratsten Sinda es, daut aundre doaraun seenen kjennen, daut see uk kjennen seelich woaren. 17Dän eewjen Kjennich, dee eewich läft, dee nich to seenen es, dän eensjen Gott, däm traft en aule Eewichkjeit aule Iea un aule Harlichkjeit! Amen.
18Timotäus, mien Sän, dit es waut ekj die to sajen hab: Kjamf dän Kaumf fa dän Harn, soo goot aus de Profeeten säden daut du wurscht. #1Tim 4,14; 6,12; Jud 1,3 19Hool dän Gloowen, un hool dien Jewessen rein. Doa sent eenje, dee met äaren Gloowen sent to Grunt jegonen, wiels see jäajen äa Jewessen haundelden. #1Tim 3,9; 6,10 20Hiemenäus un Alexanda sent von dee, dee ekj dän Soton äwajäft hab, daut see lieren met äa Jelasta opptohieren. #1Kor 5,5; 2Tim 2,17
Currently Selected:
1. Timotäus 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.