Jeremias 52
52
Ang Pagkapukan sa Jerusalem
(2 Hari 24:18–25:7)
1Sa pagkahimong hari ni Sedekias, 21 ang iyang panuigon ug naghari siya didto sa Jerusalem sulod sa 11 ka tuig. Ang iyang inahan mao si Hamutal nga anak ni Jeremias nga taga-Libna. 2Gibuhat ni Hari Sedekias ang daotan atubangan sa Ginoo sama sa gibuhat ni Hari Joakim. 3Misamot kangil-ad ang kahimtang sa Jerusalem ug sa tibuok Juda nga tungod niini nasuko ang Ginoo ug gipabihag niya ang katawhan sa Juda.
Unya mirebelde si Sedekias sa hari sa Babilonia. 4Busa#Ezeq. 24:2. sa ikanapulong adlaw sa ikanapulong bulan sa ikasiyam nga tuig#52:4 IKASIYAM NGA TUIG: mga 588 B.C. sa paghari ni Sedekias sa Juda, si Nabucodonosor nga hari sa Babilonia misulong sa Jerusalem uban sa tanan niyang kasundalohan. Ang iyang kasundalohan nagkampo gawas sa siyudad ug gilibotan nila kinig mga babag ug bantayanan. 5Gilibotan nila ang siyudad hangtod sa ika-11 nga tuig sa paghari ni Sedekias. 6Sa ikasiyam nga adlaw sa ikaupat nga bulan sa maong tuig sa dihang grabi na kaayo ang gutom ug wala nay makaon ang katawhan, 7milampos#Ezeq. 33:21. sa pagbuslot sa paril sa siyudad ang kasundalohan sa Israel. Silang tanan lakip ang hari miikyas panahon sa kagabhion bisag gilibotan sa kasundalohan sa Babilonia ang siyudad. Miikyas sila agi sa tanaman sa hari human sila moagi sa ganghaan nga nagdugtong sa duha ka paril ug mipaingon ngadto sa Walog sa Jordan. 8Apan gigukod si Hari Sedekias sa mga taga-Babilonia ug nadakpan nila siya duol sa Jerico samtang ang tanan niyang sundalo nagkatibulaag. 9Human siya hidakpi, gidala siya ngadto kang Hari Nabucodonosor nga didto sa lungsod sa Ribla nga sakop sa Hamat ug didto gihukman siya. 10Didto sa Ribla gipapatay sa hari sa Babilonia ang mga anak ni Sedekias diha gayod sa iyang atubangan. Gipapatay usab niya ang mga kadagkoan sa Juda. 11Unya#Ezeq. 12:13. gipalugit niya ang mga mata ni Sedekias ug gidala niya si Sedekias nga gikadenahan ngadto sa Babilonia. Didto gibilanggo siya hangtod sa iyang kamatayon.
Ang Pagkagun-ob sa Templo
(2 Hari 25:8-17)
12Unya sa ikanapulo nga adlaw sa ikalimang bulan sa ika-19 nga tuig#52:12 IKA-19 NGA TUIG: mga 587 B.C. sa paghari ni Nabucodonosor sa Babilonia, si Nebusaradan nga magtatambag sa hari ug pangulo sa iyang kasundalohan, miadto sa Jerusalem. 13Gisunog#1 Hari 9:8. niya ang Templo, ang palasyo sa hari ug ang mga balay sa mga kadagkoan sa Jerusalem. 14Gipanglumpag sa tanan niyang mga sundalo ang mga paril sa siyudad. 15Unya gibihag ni Nebusaradan ngadto sa Babilonia ang mga tawong timawa nga nahibilin sa siyudad lakip kadtong midangop sa hari sa Babilonia ug ang mga batid sa nagkalainlaing matang sa pamuhat. 16Apan gibilin niya sa Juda ang pipila nga pobre kaayo ug walay mga kabtangan ug gipatrabaho niya sila sa mga parasan ug kaumahan.
17Gipangguba#1 Hari 7:15-47. sa kasundalohan sa Babilonia ang mga bronsing haligi ug ang mga sangga sa tangke nga bronsi didto sa Templo lakip ang bronsing planggana nga sudlanag tubig ug ila kining gidala ngadto sa Babilonia. 18Gidala usab nila ang mga kulon, pala ug ang mga sudlanan sa abo sa halaran, ang mga galamiton alang sa pag-atiman sa mga suga, ang mga planggana nga sudlanan sa dugo sa mananap nga ihalad, ang mga sangga sa insensong sunogon ug ang uban pang mga bronsing kahimanan sa Templo. 19Gidala usab nila ang tanan nga hinimog bulawan ug plata: ang gagmayng mga planggana, mga sangga sa baga, ang mga planggana nga sudlanan sa dugo sa ihalad nga mga mananap, ang mga sudlanag abo, mga butanganag suga, mga sangga sa insenso ug ang mga sudlanan sa mga halad nga ilimnon. 20Ang mga butang nga bronsi nga hinimo ni Solomon alang sa Templo nga mao ang duha ka haligi, ang mga sukaranan, ang tangke ug ang 12 ka torong baka nga nagsangga niini dili mahimong timbangon tungod sa kabug-at. 21-22Parihas gayod ang duha ka haligi: tag walo ka metros ang gitas-on ug 5.3 ka metros ang kalingin. Haw-ang ang sulod niini ug 75 milimetro ang gibag-on sa bronsi. Sa tumoy sa matag haligi may ulo-ulo nga 2.2 ka metros ang gihabugon nga bronsi usab. Nalukop kini sa rehas nga gidayandayanag mga dinibuhong granada nga bronsi. 23Usa ka gatos ka granada ang diha sa matag haligi ug makita ang 96 niini kon tan-awon gikan sa ubos.
Gipamihag ang mga Judio ngadto sa Babilonia
(2 Hari 25:18-21, 27-30)
24Dugang pa niini, gibihag ni Nebusaradan si Seraias nga Pangulong Pari, si Sofonias nga luyoluyong pari ug ang laing tulo ka opisyal sa Templo. 25Gibihag usab niya ang pangulo sa kasundalohan sa siyudad, ang pito ka magtatambag sa hari ug ang pangabaga sa pangulo sa kasundalohan ug ang lain pang 60 ka tawo. 26Iya kini silang gidala ngadto sa hari sa Babilonia nga didto sa Ribla. 27Ug didto sa Ribla nga sakop sa Hamat, gihukman sila sa hari nga latigohon ug unya patyon.
Busa ang katawhan sa Juda gipamihag ngadto sa laing nasod. 28Sa ikapito nga tuig#52:28 IKAPITO NGA TUIG: mga 598 B.C. sa paghari ni Nabucodonosor, 3,023 ang gidaghanon sa mga tawo nga iyang gipamihag. 29Sa ika-18 nga tuig#52:29 IKA-18 NGA TUIG: mga 582 B.C. sa iyang paghari, 832 ka mga lumolupyo sa Jerusalem ang iyang gibihag 30ug sa ika-23 ka tuig sa iyang paghari, 745 ka tawo ang gibihag ni Nebusaradan. Mikabat ug 4,600 ka tawo ang tanan nga iyang gipamihag.
31Unya sa tuig nga si Ebilmerodac mao nay nahimong hari sa Babilonia, gikaluy-an niya si Joaquin nga hari sa Juda ug gibuhian. Nahitabo kini sa ika-25 nga adlaw sa ika-12 nga bulan sa ika-37 nga tuig#52:31 IKA-37 NGA TUIG: mga 560 B.C. sukad siya bihaga. 32Gihatagan ni Ebilmerodac si Joaquin ug dakong katungdanan kay sa ubang binihag nga mga hari didto sa Babilonia. 33Busa si Joaquin wala na pasul-oba sa bisti sa mga binilanggo ug didto na siya magkan-anan sa palasyo dungan sa hari hangtod nga namatay siya. 34Matag adlaw gihatagan siya sa iyang gikinahanglan hangtod sa iyang kamatayon.
Currently Selected:
Jeremias 52: RCPV
Highlight
Share
Copy
Want to have your highlights saved across all your devices? Sign up or sign in
© 1999 Philippine Bible Society