Jer 4
4
Txokb'il tu'n tanjtzti'j kyanmi
1Intma'n Qman Dyos:
Israel, qama tanjsa tib'a,
nk'etze' tu'n tanjtza' ti'ja.
qama che kyej tq'o'na twitzleb'a
ex min sel tpa'ntltib'a wi'je',
2b'a'ntzun ttzaj tna'ntza nb'iye' ajtmante jun tyola
tib'aj ax, tnik'alilti'j ex ttxolilti'j.
Te ky'i'wb'il ex ninb'il,
k'okyela'we' nb'i kye nimaqtnam, chi Qman Dyos.
3Intma'n Qman Dyos kye xjal aj Juda ex aj Jerusalen:
Che awanqe'ye' toju' tx'otx' mixti' tawal;
lalun che awantle' kyxol ch'i'x.
4E'aj Juda ex aj Jerusalen,
kyq'onk kyechele' ex tz'elx kynik'e' qa ayine' Dyos Manb'aj,
kyq'onku'ye' techal nyole' kyejni b'entti'j toj kyanmiye';
qatzun min ktzajel ntx'u'jile' kse'n q'aq'
tu'n tpaju' kyb'inchb'aje' myab'a'n,
ex mix-a'lo'xte' kb'antel tyupinte, chi Dyos.
Xob'sanjtz Juda tu'n kypon txqantl tnam toj
5Kymanxju'ye' lu toj Jerusalen ex Juda,
kyẍch'inxe' tuk'i'l tq'ojq'ojel chun toj tkyaqilju' tx'otx',
kyẍch'inxe' kuw:
¡Qo'qe'ye'! ¡Qb'uyim qib'!
¡Kyoju' nimaqtnam kuwsa'nqe'! chechiku'ye'.
6Kyiq'i'nktze' t-sut tnam tu'me'l Syon;
¡kyjyom kyewb'ile', ojqelqe'xe'!
qu'n ktzajel wiq'i'ne' jun ninyajb'il ex xitb'il
tu'me'l tb'a'nq'ob'kya'j.
7Matxi' tz'etzju' b'alun toj tjul,
lu ljo'n ttzaju' xitulkye nimaqtnam;
matxi' tz'etz toju' tx'otx' xitulteju' ttx'otx'a,
tu'n kykyaj t-xitu'n ninttanama ex tu'n kykub'naj xjal toj.
8Qu'mtzun kyq'onk kyi'je' te b'is,
che oq'e' ex che jiq'chane' tu'n k'ixk'oj,
qu'n atix nim ttx'u'jil Qman Dyos qi'j, chiku'ya kye. Chij.
9Ayine' Dyos Manb'aj nchin qmante:
Ajtponju' q'ij lu,
che lu'lulju' nimaqkawil e'nejenel tu'n kyxob'il,
ktzajel tchi kyi'ju' pale
majx che kjel sak'puju' sanjelal, chi Qman Dyos.
10Nmatzuntze': ¡Nman Dyos,
ma'xi'x chanyola kyeju' xjal aj Jerusalen!
Tzaj ttziya'na nak'b'il kye,
atzu'n ja'lo tok kchil kyqul, nchije' te.
11Ajtponju' kmuj lu,
kxel q'met teju' tnam Jerusalen:
Inul jumin jun kyq'iq' ntanton ti'ju' ntaname'
intzaj toj chq'ajlaj.
Mya kyq'iq'
tu'n t-xq'iq'it triy;
12kuwte' kyq'iq' ktzajel nq'o'ne'
qu'n ktzajel nq'o'ne'
tz'e'ysb'il kywitz ja'lo, chi Dyos.
Txolinjtzkyi'j aj Israel kyu'n ajq'oj Kytxolikyib' ajq'oj kyi'ju' aj Israel
13Kyk'ayinxe', xi'kytzaj tenenen ajq'oj naku'j muj,
naku'j kyq'iq' jb'alqe' kykarwaj te q'oj,
ojqelxi'x kyelju' kychej kyekywitz q'anjel.
¡Qab'anx qwitz, matxi' qob'o'lj!
14Jerusalen, ẍtilsama tanmiya teju' taq'wixil
tu'ntzun tkleta.
¿Ma kukxtzun kximalju'ya ti'ju' taq'wix?
15Tzmajx Dan ex kywi'witz te Eprayin
nche tzaja' taq'wix tqanil;
16Kymanxe' kyeju' nimaqtnam ex te Jerusalen
ljo'n kytzaj ajq'oj, tzajniqe'x toj jun tx'otx' najchaq
inxi'x che ẍch'in tu'n kyq'ojin
kyi'ju' nimaqtnam toj Juda,
17k'okyil kytxoli'n kyib' ti'j Juda, naku'j xq'uqil kojb'ilqe',
qu'n jaw ti'ntb'i Juda wi'je'.
Ayine' Dyos Manb'aj nchin q'mante.
18Tu'n tpaju' tb'inchb'aja myab'a'n
saja' lu tib'aja;
atzun xtkanb'aya tu'n tila
majx nku'x ẍb'o'nti'j tk'u'ja tu'n, Chi Dyos.
Exch'yon ttanam Jeremiy ti'jtk'u'j
19¡Inxi'x ku'x ẍb'o'n ti'nk'u'je'!
¡Inxi'x tuk'jne wanmiye' tu'n k'ixk'oj!
¡Inxi'x t'uẍjne wanmiye', lay njup ntziye'!
Matxi' txinb'i'ne' tq'ojq'ojel chun,
inxi'x che ẍch'in xjal tu'n kyq'ojin.
20Ljo'nxi'x tul tqanil te xitb'il;
tkyaqilju' tx'otx' naq tik'lenxtl.
Naqx myanim xitu'nqe'tlju' nxmuje'
ikxqe' npache' xb'alunqe'.
21¿Ma kukx k'okyel nka'yi'n kb'ander ajq'oju'ye' yob'a'nktz jawl
ex ma kukx kxe'l nb'i'ne' tq'ojq'ojel chun?
22Xnakte' ntaname', min neltnik' weye'
K'walqe' mixti'x kynab'l, min nche ximan.
Majxpetzun b'a'nqe' tu'n kyb'inchan taq'wix,
atzu'n tu'n kyb'inchante b'a'n mixti' b'a'n kyu'n. Chi Qman Dyos.
Xitka'yi'n Jeremiy xitb'il tzul
23Wile' tx'otx', chq'ajlajtltoq ex mixti' ttx'o'lajil:
xinka'yine' kya'j ex mixtoqti'te spik'un twitz.
24Exi' nka'yi'ne' witz intoq che lu'lun;
tkyaqilju' kywi'witz tzaj tchewal kyi'j.
25Xinka'yine' mixti'tltoq jun xjal,
ex matxitoq che'x oq kykyaqilju' pich'.
26Eb'ajx nka'yi'ne' awal naq chq'ajlajtl,
kykyaqilju' nimaqtnam naqtoq kyik'lentl.
Tu'n ttx'u'jil Qman Dyos kuwxi'x
xb'aja' tkyaqil ja'lu.
27Tzaj tma'n Qman Dyos:
Tkyaqilju' tx'otx' kb'ajel yajti,
ex lay kub' nnajsa'ne' tejumajx.
28Kb'el noju' tx'otx' tu'n b'is
ex kb'el qloljixju' kya'j tu'n b'is.
Matxi' chin yoline' ex lay tz'anjtz ti'jnk'u'je';
matxi' kub' nxima'ne', ilti'j kjapumel wu'ne'.
29Kykyaqil xjal ljo'n kyex oq;
nche ewan kyxol nimaq k'ul
ex xi' kyjax kywi' nimaq pik,
tu'n tq'ojq'ojel kywi' xjal te q'oj ti'j chej exqe' smajil.
Kykyaqilju' nimaqtnam matxi' che kyej kolb'i'n
mix-a'lo' juntl xjal najli kyoj.
30Atzunta nintnam, xitjnitla,
¿titiqu'n noka' tq'o'n t-xb'aluna tb'anil?
¿titiqu'n nche oka' tq'o'na q'anpwaq te tachb'ila?
¿titiqu'n nche oka' tuk't-sa'na q'eq kyi'j twitza?
Mixti'x tajb'en nb'aj tb'inchla'n tib'a tb'anilxi'x,
matxina' tz'el ik'u'na kyu'n ichan nche laqj ti'ja
ex kyajb'il tu'n tkub'yo'na kyu'n.
31Inxinb'i'ne' tq'ojq'ojel wi'j toj k'ixk'oj,
kse'n jun qya toktwitz k'ixk'oj tu'n tnejel tal;
tq'ojq'ojel twi' Syon,
in oq', nche'x tnuqpi'n tq'ob' ex intma'n:
¡Layqinxwite'! ¡Chin b'el kyb'yo'ne' b'yolxjal!, chij.
Currently Selected:
Jer 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999