Jer 3
3
Matz'el kypa'n kyib' aj Israel ti'j Qman Dyos
1Chi Qman Dyos:
Qama kub' tpa'ntib' jun ichan tuk'i'l t-xu'jil
ex mamjeju' qya tuk'i'l juntl ichan,
lay kub' tmujb'a'ntl tib'ju' tnejel ichan tuk'i'l.
¡Mixyab'a'n tu'n tb'inchet ja'lu toju' tx'otx'!
Atzunta Israel,
matxi' tz'ajpajina kyuk'i'l txqan ichan,
¡tajb'iltzuntla tu'n tanjtzti'ja ja'lo nk'etze'!
Ayine' Dyos Manb'aj nchin q'mante.
2Ka'yinqe'xpe'ya witz spajlqe', ka'yinxa b'a'nxi'x:
¿jatzunja min sajpajina'ya?
Kub' qeya naku'j aj Arab'ya toj chq'ajlaj,
intoq che tayo'na ichan k'u'jla'nqe' tu'na ttzi b'e.
Makub' ttz'ilsa'na tx'otx' kyu'n ajpaji'n taq'wix nche tb'inchana.
3Qu'mtzun min ntzajtl jb'al toj jb'alil.
Majx nkub' tleb'a'n tib'a kse'n jun qya ajpajil;
¡inwtlo kub' tch'ixwe'n ch'i'na!
4Tzqeku' intoq tma'na weye':
Nman, wamiw toj nku'xumale',
5¿ma kukxtzun ktx'u'jilju'ya?
¿ma majxtzun kxe'l tq'o'na tq'oja toj tk'u'ja? Chija.
Intoqtzun tma'nju'ya lu,
ex intoq che tb'incha'na tkyaqil myab'a'n. Chi Qman Dyos.
Txokon Qman Dyos tu'n tanjtzti'j kyanmi aj Israel ex aj Juda
6Tzaj tma'n Qman Dyos weye' toj tq'ijlalil tkawin Josiy: ¿Matxi' tilju'ya xtb'incha pi's Israel? Xi' kywi' nimaq witz ex kyjaq' tze pujin, ex aq'wi ajpajil. 7Nchiwe' qatoq k'anjetzti'j nk'etze' tb'ajlenxi' tb'incha'n tkyaqilju' il lu; ex mixti' sanjtz ti'j. Oktka'yi'n pi's Juda ja'lu, ju' ttzik; 8ex til tej tel nsuchu'ne' pi's Israel ex kub' npa'nwib'e' tuk'i'l tu'n tpaju' ajpaji'n tb'incha. Atzu'n pi's Juda, ttzik Israel, mixti' xob' weye', xi'tlpe'te ex aq'wi ajpajil. 9Lwiyxi'x xitb'incha'nte, makub' ttz'ilsa'nju' tx'otx'. Mixti'x xitnima'n nyole', k'ulun kye ab'j ex kye tze. 10Tb'ajlenxipe' ja'lu, min anjtzti'ju' pi's Juda nk'etze' tu'n tkyaqil tk'u'j, inkub'pe' t-sb'u'ne'. Ayine' Dyos Manb'aj nchin q'mante. Chi Dyos weye'.
11Tzaj tma'n Qman Dyos weye': Nimxi'x tilju' pi's Juda kyetwitzju' pi's Israel. 12Kutxi'ya ex pakb'anxa toj tjawetzq'ij:
Lu xtma Qman Dyos:
¡Kutanjtz ti'ja nk'etze', pi's Israel!
Knk'ma'ya tuk'i'l tzalajb'il
lay ku'x ten ntx'u'jile' tink'u'je'
qu'n inlaqwe' nk'u'j.
Ayine' Dyos Manb'aj nchin q'mante.
13O'kx q'onk tila ti'ja.
mana' matz'oka pi's weye' ayine' Dyos tib'aja;
matz'ojqelana jyol junxi'tl tichana
kyjaq tze pujin kyxaq,
ex min exitb'i'na nchaq'b'ile'.
Ayine' Dyos Manb'aj nchin q'mante, chi Qman Dyos, chiku'ya.
14Ayinku'ye' Dyos Manb'aj nchin q'mante: Kutanjtz kyi'je' pi's nky'wa'l, qu'n ayine' kyajawe'. Kjawil nsk'o'ne' junjun xjal toj junjun tnam, atzun kakab' toj junjun k'loj kywitze'l kyib', che kxe'l wiq'i'ntzuntze' Syon. 15Che okyel nq'o'ne' kawil aye' nchin tzalaje' kyi'j, che kawil kyib'aje' tuk'i'l nab'l ex che ximal b'a'n. 16Ajtzun kychmete' toju' tx'otx', ex nim txqan kyk'wale', mix-a'lo'tlte kyolil ti'j tkaxilju' nyole' kyejni b'entti'j; mix-a'lo'te' ktzajel na'nte'; expe' lay tz'ajb'entl ex lay b'inchet juntel. Ayine' Dyos Manb'aj nchin q'mante. 17K'okyeltzun tb'i Jerusalen, te nkawb'ile' ayine' Dyos Manb'aj; kykyaqil nimaqtnam kyb'u'yi'kyib' atzu' tu'n kyniman weye', lay kub' kypi'sa'n jumajtlkyib' toju' taq'wix ati toj kyanmi.
18Ajtzun tponju' q'ij lu, ktmujb'a'tib' Juda tuk'i'l Israel, che anjetztzuntz junx toju' tx'otx' tjawetzq'ij tu'n kyul toju' tx'otx' xinq'o'ne' te kyetzb'ilju' ojtxi' kyyajilb'ene', chi Dyos.
Xi' Israel toj witzleb'i'n
19Israel, kub' nximane' tu'n tok nq'o'na te nk'wale'
ex tu'n txinq'o'ne' tx'otx'a npon kyk'u'j xjal ti'j,
aju' tx'otx' tb'anilxi'x toj tkyaqil twitz tx'otx'.
Nchinawe' qa chi okyel tq'o'na te tmana
exqa laytoq tz'el tpa'ntib'a, wi'je'.
20Atzunta ikyju'ya kse'n jun qya min njapun tyol te tchmil,
ikqe'tzunju'ye' min xjapun kyole' nwitze'.
Ayine' Dyos Manb'aj nchin q'mante, chi Dyos.
21Q'ojq'oj toj wi'yj kywi' witz:
¡aye' aj Israel nche oq' ex nche kub'san!
Mache eltxalpuj ti'ju' b'a'n b'e
matzik' nna'le' kyu'n, ayine' Dyos Manb'aj kyib'aj.
22Kutanjtz kyi'je' nk'etze', epi's k'wa'lb'aj,
kche nq'a'na'ye' teju' kypi'sile', chi Dyos.
Kytzaq'web'l aj Israel te Qman Dyos
Luqo'ye' maqo' ule' tk'etza,
qu'n aya Dyos Manb'aj Qdyose'.
23Mixti'te' tajb'en tu'n qxi' kywi' witz
mujqa tu'n qẍch'in;
o'kxtzu' nkleta'te tnam Israel
tk'etz Qman Dyos.
24Matxi' qo k'ulb'an tu'n elsal ch'xawil k'luj witzleb'i'n
atzun xkykanb'a ojtxi' qchmanju'
atxi'x k'wal qo'toq:
e'naj qrit, e'qwakyix, e'qk'wal ex qmyal.
25Qme'ssankutzun qib' tu'n qch'ixaw,
qoqe' pitzeku' tu'n qch'ixaw,
qu'n atxi'x k'wal qo'toq ex ja'lo,
matxi' qo b'inchan il twitz Qman Dyos,
ayo' exqe' ojtxi' qchman
min nqo b'in te, Chi Jeremiy.
Currently Selected:
Jer 3: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999