Jer 26
26
Xob'sanjtz Jeremiy tu'n tkub' b'yo'n
1Tzaj yolin Qman Dyos te Jeremiy, tej ttzyet tkawin Joakyim tk'wal Josiy toj Juda, 2tma ikjalu: We'ku'ya tpenju' ja te k'u'lb'il, ex q'manxa tkyaqilju' xinma'ne' teya tu'n txitma'na kye xjal nche tzaj kyoju' nimaqtnam toj Juda tu'n kyul k'ulul toju' njaye'. Q'manxa tkyaqil kye. 3Qaj kxel b'i'na kyu'n ex tu'n tkyaj kyq'o'nju' taq'wix, tu'ntzun lalun kub' ntz'e'ysa'ntle' kywitz tu'n tpaju' kyb'inchb'aj myab'a'n, kse'n xima'n wu'ne'. 4Q'manxa kye ikjalu: Qa min ẍinkukyb'i'ne' ex min xkyb'inchaye' xnaq'tzb'il b'ajx nq'o'ne' kyeye', 5exqa min xxikyb'i'ne' oqxenb'il kyu'n nmajine' sanjelal matxi' che'x nchq'o'nxi'ye' kyxole' ex min nche'x kyb'i'ne', 6kb'incha'tzuntze' tiju' ja te k'u'lb'il lu kse'n nb'inchaye' ti'j Silo. K'okyel nq'o'ne' nintnam lu te yek'b'il qani'n taq'wixil kye kykyaqil nimaqtnam twitz tx'otx', chiku'ya kye, chi Dyos.
7Kyb'i pale, e'sanjelal ex tkyaqilju' tnam tej tb'ajx tma'n Jeremiy yol lu toj tja Dyos. 8Tetzunj tb'aj tma'nju' tchaq' Qman Dyos te, tzyet kyu'n pale e'sanjelal exqe' xjal, ex xikyma'n te: Kkyimela. 9¿Tiqu'n ntma'na'ya toj tb'i Qman Dyos qa kjelju' tja Dyos lu kse'n Silo, qa kb'el xitu'n nintnam lu exqa mix-a'lo'tl kjel najal toj?, chechij te. Ex tkyaqilju' tnam eb'jo'k tilj ti'j Jeremiy toj tja Dyos.
10Tetzunj kyb'inte nejenel toj Juda ti'toqju' nb'aj, eb'je'tz toju' tja nimaqkawb'il, eb'ajx toj tja Dyos, e'kub' qe twitz Ak'a'j Tjpel. 11Xi'tzun kyma'n pale ex sanjelal kye nejenel ex kye tnam xjal ikjalu: Ati tu'n tkub' b'yetju' xjal lu, qu'n makyb'iye' tu'nku' kyẍkyine' mayolin myab'a'n ti'ju' nintnam lu, chechij.
12Xi'tzun tma'n Jeremiy kyeju' nejenel ex kye tnam xjal ikjalu: Ate Qman Dyos saj chq'onweye' tu'n nyoline' toj tb'i, tu'n txinma'ne' tkyaqilju' xkyb'iye' ti'ju' tja Dyos lu ex ti'ju' nintnam lu. 13Kyka'yinxe' kychwinqlale' ex kyb'inchame' b'a'n, che b'ine' te Qman Dyos, laytzun tzaj tq'o'n taq'wixil xb'aj q'met kyeye'. 14Luqinwe' ntin toj kyq'ob'e', kyb'inchame' titi' kyajb'ile' wi'je'. 15Naq o'kx kyb'inku'ye' b'a'nxi'x: qama chin kub' kyb'yo'ne', atitzun kyiltze' kyuk'ilxi' najlqe' toju' nintnam lu tib'aj jun xjal mixti' til; qu'n axxi'x ate Qman Dyos saj chq'onweye' q'malte chik'lixi'x tkyaqilju' ti'xti' lu, chi Jeremiy.
16Xi'tzun kyma'n nejenel ex tnam xjal kyeju' pale ex sanjelal ikjalu: Mixti' tilju' xjal lu tu'n tkub' b'yet; mana' yolin qe toj tb'i Qman Dyos, chechij.
17E'okten jte' tijwnaq q'malte kye tnam xjal ate'toq atzu' ikjalu: 18Tej ntoq kawin Esekyiy, nimaqkawil toj Juda, yolin Mikyey aj Moreset toj tb'i Qman Dyos kye tkyaqilju' tnam Juda, ma ikjalu:
Chi Qman Dyos nimtipumal ikjalu:
Kjelte' Syon naku'j kojb'entl,
naq tik'lentlte' Jerusalen kjel ch'uqe
ex knojel toj twi' tja Dyos tu'n tz'is, chij.
19¿Ma kub'tzun b'yo'n Mikyey tu'n nimaqkawil Esekyiy ex kyu'n tkyaqilju' tnam aj Juda? Tzajpena' t-xob'il ti'ju' nimaqkawil ex xitqani'n te tu'n ttzaj q'aq'an tk'u'j kyi'j. Mixtzunti'tl tzaj tq'o'n Qman Dyos toq'wix kyib'aj ju' matxitoq tzaj tma'n kye. ¿Ma oktzun k'okyex qq'o'nqeqib' tjaq' jun b'yojxjali'n kuwxi'x?, chechij.
20Ex ikxju' Uriy t-sanjelal Dyos, tk'wal Semayiy ajkyiryat-jearim, yolin toj tb'i Qman Dyos ti'ju' nintnam lu ex ti'ju' tx'otx', kse'nxte Jeremiy. 21Kyb'i ninaqkawil Joakyim exqe' nche kawin tuk'i'l ex tnejenel aju' tma Uriy, tajb'iltoqtzu'n nimaqkawil tu'n tkub' b'yo'n. Tetzunj tb'inte Uriy, xob' ex xi' oq Ejipt. 22Xitchq'o'n nimaqkawil Joakyim Elnatan tk'wal Akb'or kyuk'i'l jte'tl xjal toj Ejipt, 23tzaj kyiq'i'n Uriy tzmax Ejipt ex xikyq'o'n toj tq'ob' nimaqkawil Joakyim, tchaq'tzuntz tu'n tkub' b'yo'n ex tu'n tku'x xon toj jun jul.
24Yolin Aykam tk'wal Sapan b'a'n ti'j Jeremiy, tu'ntzunju' min xiq'o'ntl Jeremiy toj kyq'ob' xjal tu'n tkub' kyb'yo'n.
Currently Selected:
Jer 26: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999