Jer 25
25
Tzulju' ajq'oj toj tb'a'nq'ob'kya'j
1Tzaj tma'n Qman Dyos tyol te Jeremiy ti'j tkyaqilju' tnam Juda toj tkyaji'n ab'q'i nkawin Joakyin tk'wal Josiy toj Juda. Atoq tnejel ab'q'iju' nkawin Nab'ukodonosor toj B'ab'ilon 2Xitma'n Jeremiy, ju' t-sanjelal Dyos, tyol Dyos te tkyaqilju' tnam Juda ex kyeju' najlqe' toj Jerusalen. Tma: 3Mab'ent junaq oxe' (23) ab'q'i ntzaj tma'n Qman Dyos tyol weye', tzajx toj oxlajoj (13) ab'q'i nkawin Josiy tk'wal Amon toj Juda ex tzmax ja'lo, ex matxi' txi' nyoli'ne' kyeye' kukxju', aye'tzunkye' min nchinx kyb'i'ne'. 4Expe' b'a'npunxi' maj matxi' che tzaj tchq'o'n Qman Dyos tmajenju' sanjelal, mixti'x nche'x kyb'i'ne', expe' mixti'x kyajb'ile' tu'n tkub' kyb'i'ne' ex tu'n t-xikynima'ne'. 5Matxi' b'ajx kyma'n kyeye' ikjalu: Kyq'onkje' kychwinqlale' myab'a'n ex kyb'inchb'aje' taq'wix, che anq'iltzuntze' kukxju' toju' tx'otx' tzaj tq'o'n Qman Dyos kyeye' ex kye ojtxi' kychmane'. 6Lalun che'xe' kywitz txqantl Dyos, lalun che k'ulune' kye ex lan che jaw kynima'ne'. Lalun tz'ok kyq'o'ne' ttx'u'jil Qman Dyos tu'n witzleb'i'n b'incha'nqe' kyu'nxe', laytzun tzaj tq'o'n jun taq'wixtz kyib'aje', chechij. 7Atzu'n ja'lo chi Qman Dyos kjalu: Mixti'x nchin tzajkyb'i'nkye', in okkyq'o'ne' ntx'u'jile' tu'n kyk'ulu'ne' kye kywitzleb'e' b'incha'n kyu'nxe', axtzunte ktzajel tz'aqju' kyib'aje', chij.
8Qu'mtzun ntma'n Qman Dyos nimtipumal ikjalu: Mixnati'x ntzaj kyb'i'ne' woqxenb'ile', 9Che tzajel ntxko'ne' kykyaqilju' tnam toj tb'a'nq'ob'kya'j exju' nmajine' Nab'ukodonosor, nimaqkawil aj B'ab'ilon, tu'n kytzaj ex tu'n kyq'ojin ti'ju' tnam lu, kyi'j kykyaqilju' najlqe' toj ex kyi'j kykyaqilju' nimaqtnam ti'jile. Majx che b'ajel nxitu'ne'. Majx che kjel naq kyik'lentl ex xob'ajilx. 10Knb'incha'ye' tu'n lalun b'itzanjtztl b'itz te ninq'ij ex tzalajb'il, ex b'itz te mjeb'le'n, ex lay b'injtztl kyq'ojq'ojel ab'j cheb'l, ex lay che k'antl kantil. 11Kjel xitj tkyaqilju' tnam lu ex naq tik'lentl kjel. Che tenb'el oxnaq lajoj (70) ab'q'iju' nimaqtnam lu tjaq' tkawb'il nimaqkawil aj B'ab'ilon. 12Ajtzun tjapu'n oxnaq lajoj (70) ab'q'i, kb'el ntz'e'ysa'ne' twitzju' nimaqkawil aj B'ab'ilon tuk'i'lxi' ttanam tu'n tpaju' kyil, ex majx kjel nxitu'ne' tejumajx. Ayine' Dyos Manb'aj nchin yolin. 13Tkyaqilju' oje nmaye' ex tku'x toju' u'j lu, ktzajel nq'o'ne' tib'aju' tnam lu, tkyaqilju' matxi' tnam Jeremiy kyi'j kykyaqilju' nimaqtnam. 14Ex ikxkye, nimaqtnam ex nimaqkawil nim kyipumal che kawilkye. Iktzu'n k'okyela' t-xel kye tu'n tpaju' kyb'inchb'aj, chi Dyos.
Tz'e'ysb'il kywitz nimaqtnam
15A saj tma'n Qman Dyos weye': Ka'yintza k'wab'l lu nojni tu'n ta'lju' nq'oje. Q'inxa ex q'onxa te kyk'wa' kykyaqil nimaqtnam jaxa' nchq'o'na. 16Ajt-xikyk'wa'n che okelten xab'el ex k'okyel toj kywi' tu'n tpaju' q'oj ktzajel nchq'o'ne' kyi'j.
17Elntzyu'ne' k'wab'l te Qman Dyos ex xinq'o'ne' te kyk'wa' kykyaqil nimaqtnam janxa' tchq'o'ne' Qman Dyos. 18Xinq'o'ne' te kyk'wa' aj Jerusalen ex kye nimaqtnam toj Juda, ex kye nimaqkawil ex nejenel, tu'n tkub'kyi'j ex tu'n kykyaj xitjniqe'tl, xob'ajil qe'xtl te yek'b'ilteju' qanb'en myab'a'n kse'n ta'qe' ja'lo. 19Ikx xinq'o'ne' te tk'wa' paraon, nimaqkawil toj Ejipt, ex kyeju' nche kawin tuk'i'l ex te tkyaqilju' ttanam, 20ex kye chukchaq xjal ate' atzu', kye kykyaqil nimaqkawil toj tx'otx' Us ex toj kytx'otx' pilistey: aye' Askalon, Kasa, Ekron exju' kyajni te Asdod, 21kye Edom, Moab' ex Amon, 22kye kykyaqil nimaqkawil kyoju' tx'otx' toj ninnjab' Mediteraney, 23kyeju' tnej tyajajil Dedan, Tema ex B'us, ex kyeju' tnam nche json kywi' ttx'u'k kyplaj, 24kye kykyaqil nimaqkawil aj Arab'ya, kye kykyaqil kynimaqkawil chukchaq xjal najlqe' toj chq'ajlaj, 25kye kkyaqil nimaqkawil kye Simri, Elam ex Medya: 26kye kykyaqil nimaqkawil toj tb'a'nq'ob'kya'j, nqaku' mujqa najchaq kyxol. Aye' kykyaqil kawb'il twitz tx'otx'. Yajxi'tzuntl tu'n txitk'wa'n nimaqkawil aj B'ab'ilon.
27Tzajtzun tma'n Qman Dyos weye': Q'manxa kye qa ayine' Dyos Manb'aj nimwipumale', inchaq'u'ne' kye tu'n txi' kyk'wa'n tzmax ajxi'x kytx'ujti tu'n, ajkyxab' ex ajkykub' tz'aq tu'n lalun che jawe'tl tu'nju' q'oj ktzajel nq'o'ne' kyi'j. 28Qatzun min kyajb'il tu'n txi' kytzyu'n ex tu'n kyk'wante, q'manxa kye: A xtma Qman Dyos nimtipumal kyjalu: Tililxti'j tu'n txi' kyk'wa'ne'. 29Ktzyetelwe' ntz'e'ysante twitzju' nintnam xjansa'n weye'. ¿Ma laytzun tz'e'yset kywitze'? Ilti'j ktz'e'ysetelkye' kywitz, qu'n ktzajel nchq'one' q'oj kyi'j kykyaqilju' najlqe' twitzu' tx'otx'. Ayine' Dyos Manb'aj nimwipumale' nchin yolin.
30Jeremiy, q'manxa tqanil tkyaqilju' ti'xti' lu. Q'manxa kjalu:
Nxi'x tinun toj twi' Qman Dyos nyolintz
tzmax jawl, toju' najb'il xjan janajla'.
Inẍch'intz kyi'ju' trit
kse'n nwulin kyi'ju' pch'ul ub'a,
kyi'j kykyaqilju' najlqe' twitzu' tx'otx'.
31In pon tq'ojq'ojel tzmax janpona' b'aju' tx'otx',
qu'n ktzyetel ttxolil kawb'il tu'n Dyos kyi'ju' nimaqtnam,
che ttxka' kykyaqilju' ch'i'ntoj kyq'ij tu'n kyok toj xjel,
tu'n kyxitq'o'n b'inchal myab'a'n toj kamik.
Aku' Qman Dyos nyolin, chiku'ya, chi Dyos.
32Intma'n Qman Dyos nimtipumal kjalu:
Tzulte' taq'wixil
ti'j jun nintnam ex k'ik'el ti'j juntl nintnam,
ktzajel jun q'ankyaq kuwxi'x
tzmax ttxa'n tx'otx', chij.
33Aye' che kyimel tu'n Qman Dyos toju' q'ij lu,
che kjel woqonje tzajx jun ttxa'n tx'otx' ex ponx jun plajtl.
Mix-a'lo'te k'oq'el kyi'j
mix-a'lo'x kawil q'inkye tu'n kyku'x mqu'n,
che kjel tolonje naku'j tz'is.
34¡Che ẍch'inqe'ye' k'ik'lal, che ẍch'inqe'ye' tu'n k'ixk'oj!
¡E'ẍaqlul rit, kyxtolim kyib'e' twitz tx'otx'!
Matxi' tzulkanun tu'n kyb'yet xjal
che kb'el b'yo'ne' kse'nqe' rit q'u'sqe'.
35Lay b'ent kyoqu' k'ik'lel
lay b'ent kyjolpaju' ẍaqlulkye rit.
36Nche ẍch'inju' k'ik'lel,
nche ẍch'inju' ẍaqlulkye rit,
qu'n matxi' kub' t-xitu'n Qman Dyos kywab'lu' rit.
37Tzaj ttx'u'jil Qman Dyos ex kub't-xitu'n tb'anil kykojb'il.
38Etz kse'n jun b'alun toj tja
ex kyej xitju' kytanam,
tzaj ttx'u'jil Qman Dyos
ex tzaj tq'o'n jun q'oj kuwxi'x.
Currently Selected:
Jer 25: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999