Jer 1
1
Ch'i'n chik'b'ab'l
1Aye' tyol ex tb'inchb'en Jeremiy ja'lu, tk'wal Ilkyiy. Tzajni Jeremiy kyxol kyyajajil pale najlqe'toq toju' tnam Anatot, toju' tnej kytx'otx' tyajajil B'enjamin. 2Tzaj yolin Qman Dyos te Jeremiy tej ljo'ntoq oxlajoj (13) ab'q'i nkawin Josiy, tk'wal Amon, toj Juda. 3Ex tzaj yolin Qman Dyos te, toju' tq'ijlalil ntoq kawin Joakyim, tk'wal Josiy toj Juda, tzmax tjapun junlajoj (11) ab'q'i nkawin Sedekyiy nimaqkawil toj Juda, toj tjwe'yi'n xjaw teju' ab'q'i lu, tej kyxiq'i'n xjal aj Jerusalen toj juntl tnam.
Txokli Jeremiy tu'n Qman Dyos
4Tzaj yolin Qman Dyos weye' ex tma:
5Sk'o'ntla wu'ne' na'mxtoq tok iqa'n twi'ya tu'n ttxuya;
na'mxtoq titz'jiya, matxi'toq tz'el npa'na;
xima'ntltoq wu'ne' tu'n toka te nsanjelale' kyxol nimaqtnam. Chij.
6Ayintzunwe' xintzaq'we'ne':
¡Nman Dyos! ¡Tzmana' ku'xunqinwe' ex min nb'ent nyoline'! Nchije' te.
7Atzunte Qman Dyos tzaj tma'n:
Lalun tmaya qa tzma ku'xuna.
Kxe'lta ja matxa' nchq'o'na,
ex kxe'l tma'na knchaq'e' teya.
8Mix-a'loqe tu'n t-xob'a'ya,
kna' chin tenb'ilwe' tuk'i'la klolteya.
Ayine' Dyos Manb'aj nchin q'mante. Chij.
9Tzajtzun tnuqpi'n Qman Dyos tq'ob', okttzyu'n ntziye' ex tma weye':
10Che kb'el nq'o'ne' nyole' toj ttziya.
Kxe'l nq'o'ne' toklena ja'loxi'x
kyib'aj kawb'il ex nimaqtnam,
tu'n t-xb'oqinteya ex tu'n tik' t-xona,
tu'n tkub' ttx'u'yi'na ex tu'n tb'aj t-xitu'na,
ex ikx tu'n tjaw tb'incha'na ex tu'n tkux tawa'na. Chij.
11Tzaj yolin Qman Dyos weye' ex tma:
Jeremiy, ¿Titi' nxitka'yina? Chij.
Jun tq'ob' tze almendro nchije' te.
12Iku', ax tyola.
Qu'n chin xq'uqile' tib'aju' nyole'
tu'n tjapun. Chi Qman Dyos.
13Tzaj tma'ntl Qman Dyos weye' tkamaji'n:
¿Titi' inxi' tka'yi'na? Chij
Jun k'wil nxi'x loqlon,
xi' ttzaj qomtz'aj tzmax toj tb'a'nq'ob'kya'j. Nchije' te.
14Tzajtzun tma'n Qman Dyos weye':
Tzmax ktzajela'ju' taq'wixil toj tb'a'nq'ob'kya'j
kyib'aj kykyaqilju' najlqe' toju' tx'otx' lu.
15Axxi'x, ayine' Dyos Mab'aj
che tzajel ntxko'ne' kykyaqilju' kawb'il te toj tb'a'nq'ob'kya'j.
Che ulju' kynimaqkawil
che b'elkyq'o'n kyq'uqb'il te kawb'il
ttziku' Jerusalen,
twitz tkyaqilju' nintapi ti'jile
ex kywitz tkyaqil nimaqtnam toj Juda.
16A tz'e'ysb'il witzb'aju' knchaq'e'
kyi'ju' aj il lu machin kyej kykolb'ine',
makub' kytz'e'ysa'n sturak ex mache k'ulun
kye junxi'tl dyos aye'x e'kub' b'inchankye.
17Atzunta kuwsam tib'a;
kutxi'ya q'malte kye tkyaqilju' knchaq'e' teya.
Lalun xob'a kye, qu'n qatzun min
klu'lula wu'ne' kywitz.
18Texju' q'ij ja'lo kb'el nq'o'na
naku'j nintnam kuwsa'n,
naku'j tqan ja k'uxb'il,
naku'j nintapi q'anku'xb'il,
tu'ntzun tokwe'ya kywitz kykyaqil xjal toju' tx'otx' Juda:
kwitzju' kynimaqkawil, e'nejenel, e'pale ex kywitz kykyaqilju' xjal.
19Kjawil kyi'nkyib' ti'ja ex lay kub'ti'ja kyu'n
qu'n chin tenb'ilwe' tuk'i'la klolteya.
Ayine' Dyos Manb'aj nchin q'mante. Chi Qman Dyos.
Currently Selected:
Jer 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999