Dn 1
1
Tqanil ti'j Danyel
1Toj toxi'n ab'q'i ttzyetlen tkawin Joakyim, nimaqkawil toj Juda, pon Nab'ukodonosor nimaqkawil aj B'ab'ilon toju' nintnam Jerusalen ex eb'aj ttxoli'n t-xjal te q'oj ti'jile. 2Atzunte Qman Dyos xitq'o'n Joakyim nimaqkawil aj Juda toj tq'ob' Nab'ukodonosor, ex tnimalju' ti'xti' nche ajb'en toj tja Qman Dyos. Exi' tiq'i'n Nab'ukodonosor xjal toj B'ab'ilon, ex eb'jo'kx tq'o'n ti'xti' xjanqe' toju' k'uwenj toj kyjaju' tdyos; 3-4expe' xitma'n te Aspenas nejenel kye nche ajb'en toj tja nimaqkawb'il tu'n kyjaw t-sk'o'n jte' ku'xun kyxol tk'wal nimaqkawil aj Israel ex kyk'wal aj Israel nimaq kyoklen, tb'anil che ka'yin, mixti' kytzakajil, xnaq'tza'nqe' ex ati kynab'l, ati kyojtzqib'l ex k'atzqe', exqa b'a'nqe' tu'n kyajb'en toj tja nimaqkawil. Tu'n kyxnaq'tzet ti'ju' kyol aj kaldey ex kyi'ju' kyuj. 5Tchaq'ju' nimaqkawil Nab'ukodonosor tu'n txi' q'o'n kywaju' ku'xun lu tkyaqil q'ij kse'nxju' twa ex tk'wa', ex tu'n kyb'aj xnaq'tza'n oxe' ab'q'i, tu'ntzun kykyajten ajb'el te nimaqkawil ajtjapun kyu'n.
Ten Danyel kyuk'i'l tamiw toj tja Nimaqkawil
6Kyxoltzunju' ku'xun lu ate'toq Danyel, Ananiy, Misael, ex Asariy, tnej tyajajil aj Judaqe', 7el ch'exb'e'n kyb'i tu'nju' nejenel kye ajb'el toj tja nimaqkawil: ate Danyel okq'o'n tb'i, B'eltzasar; atzu'n Ananiy, Sadrak; atzu'n Asariy, Ab'ed-neko. 8Kub' tq'o'n Danyel toj tanmi tu'n lay txi twanju' twa nimaqkawil ex tk'wa' tu'ntzun lay kub' ttxa'ju'n tchwinqlal, ex xitma'n teju' nejenel kye ajb'el toj tja nimaqkawil tu'n lalun tz'ok chq'o'n walte. 9B'a'n ela' Danyel toj twitzju' nejenel kye ajb'el toj tja nimaqkawil tu'n t-xtalb'il Qman Dyos, 10Xi'tzun tma'ntz te:
—Matxi' tmaju' nimaqkawil weye' titi' kxe'l kywane' ex kxel kyk'wa'ne'. Jaku' txinb'incha'ne' kse'n xtqaniya, naqtzun aju' nchin xob'e' te wajawe', qu'n jaku' chin kub' tb'yo'ne' tu'n kypaje' qa junxi'tl che ka'yine' kywitzju' txqantl, chij.
11Yolintzun Danyel tuk'i'lju' xq'uqilkye kyejni q'o'n tu'nju' nejenel kye ajb'el te nimaqkawil, xitma'n te:
12—Nchin kub'sane' teya tu'n tik' twitza kyi'ju' ajb'el lu teya: q'manxa tu'n ttzaj q'o'n cha'x chenaq' tk'i' itzaj te qwaye' ex a' te qk'wa'ye' toj lajoj q'ij. 13Ajtzun tjapunju' lajoj q'ij lu, qo' tka'yiktzuntza junx kyuk'i'lju' ku'xun nche wan ti'ju' twa nimaqkawil alkyeqe' b'a'nxi'x che ka'yin; b'inchamtzuntza qeye' aju' b'a'n toj twitza, chij.
14Kub'tzun toj twitzju' xq'uqilkye, laloj q'ij xitq'o'n kye tu'n tik'twitz kyi'j. 15Tb'ajlenxi'tzunju' lajoj q'ij, tb'anilxi'x toqpe' che ka'yin ex kuwqe'xi'xtoq kyekywitzju' ku'xun intoq che wan ti'ju' twa nimaqkawil. 16Intoqtzun xitiq'i'n xq'uqilkyeju' wab'j ex k'wab'j tja, ju' atitoq tu'n txitq'o'n kye, naq cha'x chenaq' tk'i' itzaj nxi' tq'o'n kye.
17Tzaj q'o'n kynab'lju' kyaje' ku'xun lu ex kyojtzqib'l tu'n Qman Dyos tu'n tkane chukchaq kyuj aj Kaldey ex tkyaqil ojtzqib'l toj kywitz. Intoq che tpju'n Danyel witzik' exqe' nche tzaj yek'u'n te. 18Tetzunj tjapunju' tq'ijlalil q'ma'ntl tu'n nimaqkawil tu'n kypon q'i'nju' ku'xun twitz, aju' nejenel kyeju' ajb'el toj tja nimaqkawil e'pon tiq'i'n twitz. 19Yolintzunju' nimaqkawil kyuk'i'lju' ku'xun, mixti'x okyal jun tu'n kse'nqe' Danyel, Ananiy, Misael ex Asariy kyxol kykyaqilju' ku'xun, qu'mtzun majx e'kyajten ajb'el te. 20Tojtzun tkyaqilju' ti'xti' ja nojqelana' nab'l ex ojtzqib'l, b'ajx q'o'n xjel kye, ex eltnik'ju' nimaqkawil qa atixi'xtoq kynab'l lajoj maj nimxi'xtl kywitzju' ajpkab' ex ajnab'lil toj tkyaqilju' tx'otx' ja nkawina'. 21Kyejtzun ten Danyel atzu' tzmaxi' tjapun tnejel ab'q'i tkawin Siro.
Currently Selected:
Dn 1: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999