Dn 2
2
Twitzik'ju' nimaqkawil Nab'ukodonosor
1Tojtzunju' tkab' ab'q'i intoq kawinju' nimaqkawil Nab'ukodonosor ok txqan twitzik', tu'ntzun tpaj ja'lu inxi'xtoq ximan ex mixtoqti'x nwtan. 2Tchaq'tzun tu'n kyb'ajtzaju' ajpkab', ajnab'lil, ajk'a exqe' atixi'x kynab'l, tu'n t-xikychik'b'a'nju' twitzik'. Tetzunj kyb'ajpon twitzju' nimaqkawil, 3xitma'n kye:
—Makub' nwitzk'a'ne' jun nwitzik'e' ex inxi'x chin ximane' ti'j tu'n tkane toj nwitze', chij.
4Aye'tzu'n ati kynab'l xikyma'n teju' nimaqkawil toj aramey:
—¡Nimanjtzwita nimaqkawil tejumajx! Q'mantzju'ya twitzik'a nimaqkawil kyeju' ajb'el lu teya, kxe'l qma'nqe' teya ti' tz'elpuna', chechij.
5Atzunte' nimaqkawil xittzaq'we'n kye: matxi' kub' nximane' qa min saj kyma'nju'ye' xkub' nwitzk'a'ne' ex titi' tz'elpuna', majx che b'ajel npẍu'ne' ex majx che kb'el nxitu'ne' kyjaye'. 6Qatzun matzaj kyma'nju'ye' xkub' nwitzk'a'ne' ex titi' tz'elpuna', kxe'l nq'o'n txqan oyaje' kyeye' ex kxe'l nq'o'ne' kyoklene'. Qu'mtzun kymantze' weye' titi' xkub' nwitzk'a'ne' ex kychik'b'antze' titi' tz'elpuna', chiju' nimaqkawil xittzaq'we'n kye.
7Xi'tzun kytzaq'we'ntlju' ati kynab'l tkamaji'n:
—Q'mantzju'ya twitzik'a qeye' ex kxe'l qma'nqe' titi' tz'elpuna', chechij.
8Atzunte' nimaqkawil xittzaq'we'n kye: matxi' tz'el nnik'e' kyeye', nkjyo'ne' tu'me'l tu'n kyklete' teju' nxime' xkyb'iye'. 9Qatzun min saj kyma'nju'ye' nwitzik'e', ax kb'ajelju' kyi'je' kykyaqile' qu'n matxi' b'aj b'entti'j kyu'ne' tu'n ttzajkyma'ne' chajyolil weye', naqxwitlo tu'n tanjtzti'j nk'u'je' ti'ju' matxi' kub' nximane'. Kymantzju'ye' nwitzik'e' tu'ntzun tel nnik'e' qa kb'entel ttzajkyma'ne' tnab'l, chij kye.
10Xi'tzun kytzaq'we'ntlju' xjal ati kynab'l te: mix-a'lo'te jun xjal toj tkyaqil twitz tx'otx' kb'entelwit txitma'nju' twitzik'a ex titi' tz'elpuna'. Expe' mix-a'lo'te jun nimaqkawil tu'nwtju' nim toklen ex nimtipumal ojewt xjelun kse'n ja'lu, te jun ajpkab', ajnab'lil mujqa te jun xjal atixi'x tnab'l. 11Ch'uẍte' ntqani'na nimaqkawil, mix-a'lo' jun kb'entel ttzaq'wente, qa mya'ye'ju' dyos; ¡naqtzun aye'kye' dyos myatzu' najlqe' kyxol xjal! chechij.
12Tetzunj tb'i'n te nimaqkawil ja'lu, tzaj ttx'u'jil b'a'nxi'x, tchaq'tzuntz tu'n kykub' b'yo'n kykyaqilju' ajnab'lil te B'ab'ilon. 13Tetzunj texq'o'n chaq'b'il lu, jyonjtzu' Danyel kyuk'i'lju' tuk'i'l tu'n kykub' b'yo'n.
Pjetju' twitzik' nimaqkawil tu'n Danyel
14Yolintzun Danyel tojxi'x tu'me'l ex tuk'i'l nab'l te Aryok nejenel kyeju' xq'uqil toj tja nimaqkawil, aju' xi'toq txi' b'yolkye ajnab'lil. 15Ex xitqani'n te: ¿tiqu'ntzun setza' tq'o'n nimaqkawil chaq'b'il lu kuwxi'x ex lwiyxi'x? chij.
Xi'tzun tchik'b'a'n Ariok te titiqu'n. 16Xi'tzun Danyel twitzju' nimaqkawil ex kub'san te tu'n txiq'o'n jte' q'ij te, tu'n txitma'n witzik' ex titi' tz'elpuna'. 17Xi'tzuntz tja ex xitma'n ja'lu kye Ananiy, Misael ex Asariy, 18tu'n txi' kyqani'n o'nb'il te Dyos te toj kya'j tib'aju' witzik' lu min pjet, tu'ntzun lalun che kub' b'yo'n junx kyuk'i'lju' ajnab'lil te B'ab'ilon. 19Tojtzunju' qonik'an lu tzaj yek'u'n witzik' te Danyel, ex jaw tajwali'n tb'i Dyos te toj kya'j, 20tma kjalu:
Ajwalinjtzxwit tb'iya Dyos tejumajx,
qu'n teju'ya nab'l ex ipumalj.
21Ateju'ya nch'exb'enkye t'q'ijlalil exqe' tab'q'iyil;
nche oktq'o'na nimaqkawil ex nche el tiq'i'na,
ntzaj tq'o'na kynab'lju' atixi'x kynab'l
ex ntb'incha'na tu'n kyximanju' k'atzqe'.
22Nche tzaj tyek'u'na ti'xti' ch'uẍqe' ex e'wa'nqe';
tojtzqi'nju'ya ati toj qxopin,
qu'n ateju'ya spik'un.
23Aya Dyos, Kydyos nmane',
nchin q'on chjonteye' teya ex njaw wajwali'na
qu'n matxi' tzaj tq'o'na nnab'le' ex wipumale';
matxi' tzajtyek'u'nju'ya xxiqqanine' teya;
matxi' tzaj tyek'u'na nxi'xtoq ximan nimaqkawil ti'j, chij.
24Xi'tzun Danyel tk'etz Aryok, teju' jaxa' q'ma'na' tu'n kykub' b'yo'nju' ajnab'lil te B'ab'ilon, ex xitma'n te:
—Lalun che kub' tb'yo'nju'ya atixi'x kynab'l. Chin tiq'i'nxa twitzju' nimaqkawil, ex kxe'l nchik'b'a'nwe' twitzik', chij.
25Textzu'n kmuj lu xiq'i'n Danyel tu'n Aryok twitzju' nimaqkawil Nab'ukodonosor ex xitma'n te:
—Matz'okyal jun ichan wu'ne' kyxolju' aj Juda b'je'tzniqe' iq'et toj kytanam, kb'entel ttzaj tchik'b'a'nju' twitzik'a ex titi' tz'elpuna', chij.
26Xi'tzun tma'n nimaqkawil te Danyel, ju' okq'o'n tb'i B'eltzasar:
—¿Ma kb'entel ttzaj tchik'b'a'na kub' nwitzk'a'ne' ex titi' tz'elpuna'? chij.
27Xi'tzun ttzaq'we'n Danyel te:
—Mix-a'lo'te' jun ajnab'lil, ajpkab', exju' nxnaq'tzan kyi'j che'w kb'entel tchik'b'anteju' tajb'ila nimaqkawil tu'n tb'inteya. 28Naq o'kxte Dyos te toj kya'j ntzaj yek'unteju' ati toj ewaj. Matxi' tzaj tyek'u'n teya titi' kb'ajel tjax chix. Kxe'l nchik'b'a'nju'ye' twitzik'a exju' tzaj yek'u'n teya tej intoq wtana: 29atoqtzu' ta'ya toj tkuẍb'ila nimaqkawil, kub'tentzuntza ximil ti'ju' kb'ajel tjax chix, atzu'n ntzaj yek'unteju' ati toj ewaj, matxi' tzaj tyek'u'n teya nimaqkawil. 30Ex matxi' tzajtyek'u'nju' ati toj ewaj lu weye', ex mya tu'nwtju' atixi'xwit nnab'le' kyekywitz txqantl xjal, ate' lu matzajyek'u'n weye' tu'n t-xinchik'b'a'ne' teya nimaqkawil titi' tz'elpuna'ju' witzik', tu'ntzun teltnik'a nimaqkawil ti'ju' t-xima nul toj tnab'la.
31Toju' twitzik'a nimaqkawil, intoq xitka'yi'na jun tilb'ilal xjal nimin atitoq twitza ex intoq qoptz'aj b'a'nxi'x, majxtoq xob'ajilx. 32Tz'umin q'anpwaq twi'ju' tilb'ilal xjal lu; atzu'n ttzitk'u'j kyuk'i'lu' tq'ob' saqpwaqqe'; atzu'n tk'u'j kyuk'i'lju' tkux q'ank'uxb'ilqe'; 33aye'tzu'n tk'u'j tqan k'uxb'ilqe'; aye'tzu'n tqan k'uxb'il smo'n tk'i' q'antx'otx'. 34tetzunj intoq ka'yinxa ti'j nimaqkawil, naq minab'en ttzaj b'ultx'ij jun ab'j twi' witz, ex mix-a'lo' tzaj lmonte, ul tjuma'ntib' kyi'j tqanju' tilb'ilal xjal ex majx eb'aj kub'tb'uchi'n. 35Naq toj jun kmujx eb'jaw b'entju' k'uxb'il, e'q'a'ntx'otx', e'q'ank'uxb'il, e'saqpwaq, e'q'anpwaq te quq, kse'n nok qka'yi'n toj q'ijal ajttriyit triy, majxtzun b'ajx mso'n tu'n kyq'iq', atzu'n ab'j ultjuma'ntib' ti'ju' witzileb' jawb'ent te jun witz nimin ex majxkub' noj twitz tx'otx' tu'n.
36Atzun witzik' ja'lu. Ja'lotzun kxel nchik'b'a'ne' tnab'l teya nimaqkawil. 37Ateju'ya nimaqkawil nimxi'x toklena kyeykwitzju' txqantl nimaqkawil, qu'n a Dyos te toj kya'j tzaj q'onte tkawb'ila, tipumala, toklena 38ex tu'n tkawina kyib'aj kykyaqilju' xjal jachaqja najlqe', kyib'aj alu'mj ex kyib'aj pich'; ate Qman Dyos kub' q'onte toj tq'ob'a, qu'mtzun aju' wi'yj q'anpwaq xi' nyolina' ti'ja. 39Tb'ajlenxi'tzun kawina tzul juntl kawb'il b'o's ch'i'ntl twitzju'ta, yajxi'tzuntel tzul juntl toxi'n kawb'il q'ank'uxb'il, ex kkawil tib'aj tkyaqil twitz tx'otx'. 40Ti'jxi'tzun ja'lu tzul juntl tkyaji'n kawb'il, kuw kse'n k'uxb'il nb'ent t-xitit alchaqxkyeku' ti'xti' tu'n, ikxtzun kawb'ilju' che b'ajel ttx'u'yi'n ex che b'elt-xitu'n kykyaqilju' txqantl kawb'il.
41Ex ikx mache' tilju'ya tqan exqe'ju' twi'tqan, nik'jan q'a'ntx'otx' ex nik'jantl k'uxb'il; atz'elpuna'ju' jun kawb'il pa'ntib', maskye ati ch'i'n tipumal tu'nju' k'uxb'il, matila nimaqkawil smo'ntoq tib'ju' k'uxb'il tuk'i'lju' q'a'ntx'otx'. 42Tu'ntzun nik'janju' kywi'tqan k'uxb'ilqe' ex nik'jantl q'a'ntx'otx', atz'elpuna'ju' ktenb'el tipumalju' kawb'il ex tojuntl tu'me'l lay ten tipumal. 43Iktzu'n kse'n xtila nimaqkawil, smo'n tib'ju' k'uxb'il tuk'i'lju' q'a'ntx'otx', ikqe'tzun kawilju' toju' kawb'il lu kkymujb'a' kyib' tu'n tmuje knab'l extzun lay b'entl kymujb'ante kyib' tu'n kyok te junx, kse'n k'uxb'il lay b'ent ttzyuntetib' tuk'i'lju' q'a'ntx'otx'. 44Tojtzu'n tq'ijlalil kykawb'ilju' nimaqkawil lu, kb'eltq'o'n Dyos te toj kya'j jun kawb'il layx b'ent tkub' xitu'n ex mix-a'lo' jun nintnam kb'el kawinte, qu'n ape'na' kb'el xitunkye txqantl kawb'il, kjel tentzuntz tejumajx. 45Atzun tz'elpuna' ab'ju' xtila nimaqkawil saj tololon twi' witz ex mix-a'lo' saj tolinte; aju' ab'j xkub' xitunkye k'uxb'il, q'ank'uxb'il, q'a'ntx'otx', saqpwaq exju' q'anpwaq, ex majx ẍe'kub' quqix tu'n. Matxi' tzaj yek'u'nju' kb'ajel tjax chix teya nimaqkawil tu'nju' Dyos nim toklen. Axte' witzik' ex ax pujb'ente, chi Danyel.
46Kub'tzun meje nimaqkawil Nab'ukodonosor twitz Danyel, majx kuponju' tplaj twitz tx'otx', tmatzuntz tu'n tkub' q'o'n chojb'il ex sturak twitz. 47Ex xitma'n te Danyel:
—Axxi'x aju' Kydyose' nimxi'x toklen kyekywitzju' txqantl dyos; a kyajaw nimaqkawil ex a ntzaj yek'unteju' ati toj ewaj, qu'n matzaj tyek'u'n e'wa'n lu teya, chij te Danyel.
48Oktzun q'o'n Danyel tojun nimaq toklen tu'nju' nimaqkawil, ex nim txqan oyaj twi' wi'yal xiq'o'n te; expe' okq'o'n te kynejel kawil toj tkyaqil B'ab'ilon ex nejenel kye kykyaqilju' ajnab'lil toju' nintnam lu.
49Yolintzun Danyel tuk'i'lju' nimaqkawil tu'n txitq'o'n nim kyoklen Sadrak, Mesak ex Ab'ed-neko tu'n kynuk'un toj B'ab'ilon, atzunte Danyel kyejten toju' tja nimaqkawb'il.
Currently Selected:
Dn 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999