Ro CHIK'B'AB'L
CHIK'B'AB'L
Na'mxtoq tponte Pawl toju' tnam Rom tej tkub' ttz'ib'a'nju' u'j lu, kyeju' okslal toju' tnam aju', extzun intoq t-xima'n tu'n txi' toj tnam Rom ex xi'toq xa'ya' toj tb'eyil tnam Spanya jatoq nt-xima'na' tu'n tik'. Ex intoq ayonte Pawl tu'n toninjtz kyu'nju' xjal lu tu'ntoq tjapunju' tb'is tk'u'j. Aju' u'j lu kub' ttz'ib'a'n, ikx se'nju' xit-sma'n kyeju' aj Kalasya, aye'tzun nimaqxixju' kxolju' txqantl u'j xi' ttz'ib'a'n, ex atzu' ntchik'b'ana' Pawl tkyaqilju' nkane toj twitz ti'ju' okslab'l ti'j Qajaw Jesukrist, titi' tz'elpuna', ex se'n tu'n qnajana' qa ma'toq qo' okslan te Jesukrist. Atzu' ok lpeya ti'ju' tz'ib'b'enkye u'j toju' tq'ijlalil na'j, qu'mtzun nejxi'x nyolin ti'ju' nkub' tz'ib'ante ex kub' ttz'ib'a'n jun q'olb'eb'l tnejelxi'x, ex kub' ttz'ib'a'n jun tnej yol te q'ob'l chjonte, ex jun chik'b'ab'l ti'ju' tb'is tk'u'ju' u'j (1.1-17). Ex yajxi'tzuntl (vs. 16-17) ntb'u'yi'n jun tal chik'b'ab'l tib'aju' tpakb'al b'a'n — a'yeju' b'a'n tqanil — exqetzunju' xnaq'tzb'il nimaqxi'x kyoklen toju' tpakb'ab'l: a'ye' aj Juda exqetzu'n mya aj Juda, ex kkyaqilju' xjal te tkyaqil twitz tx'otx', in nojqelanju' kolb'ilkye; qu'n atzu' toju' tpakb'al b'a'n npakb'anjtz se'n tu'me'l tu'n qkleta' tu'n Dyos toju' qil: naqx tu'n qokslab'l qo kletila' (1.17).
Q'ancha'lxi'x qa tkyaqilju' u'j kub' ttz'ib'a'n Pawl junelniyile, qu'n ikx tz'ib'ankyeju'. Ti'jxiju' jun chik'b'ab'l, nkub' pa'na' toj kab'e' tnej, aju' tnejel nok q'o'n tb'i te tx'olb'ab'lteju' xnaq'tzb'il, atzun toju' tkab' tnej atzu' nyolina' kyi'ju' xnaq'tzb'il tu'n qb'inchante toj qchwinqlal, ex mankb'ilxi' nyolina' kyi'ju' yol b'aj kyej toqxeni'n Pawl ex kyi'ju' q'olb'eb'l kye kkyaqil xjal mujqa naq te jun xjal.
A tqik'ju' nimxi'x nyolin ti'j xnaq'tzb'il toju' u'j lu: 1.18—11.36. Atzu' toju' u'j lu nxnaq'tzana' Pawl ti'j qa kkyaqilju' xjal tqe' tjaq' tipumal il, aj Juda ex mya aj Juda, qu'mtzun kykyaqilx che kxe'l toj tz'e'ysb'il witzb'aj. Qu'mtzun kkyaqil xjal nojqelanju' kolb'ilkye (1.18—3.20). A kolb'ilju'lu qa a Dyos nkub'najsante tilju' xjal, intklo'n toj til ex in b'entju' tchwinqlal tu'n tten tmojb'ab'l tuk'i'l Dyos, naqx tu'nelju' tokslab'l ti'j Qajaw Jesukrist (3.21—4.25). Atzun tu'n nok yalju' xjal tuk'i'l Dyos, nel yalju' jun tchwinqlal ak'a'j tuk'i'l Qajaw Jesukrist. Aju' okslal oje klonjtz tu'n Xewb'aj Xjan teju' tipumal il ex kamik, ex oje b'ent tten tuk'i'l Dyos, matxi' txi' q'o'n jun nak'b'il toj tanmi. A tb'is tk'u'ju' kawb'il aju' tu'n tel tnik'u' xjal ti'ju' til, ex ajtzun tkub'najsa'n til ex ajtklonjtz toj il, inkyajten tchwinqlal tjaq' tipumal Xewb'aj Xjan (caps. 5-8). Makub' t-ximante Dyos tu'n tjqonte xtalb'il ntzaj toj kya'j kye kkyaqil xjal tu'nju' matz'el ik'u'n Jesus kyu'n tnimalju' aj Juda. Ex mixti' ẍe el tik'unju' aj Juda, tixju' tk'u'jlalil kyi'j ex inx txokon kye, qu'n ajtb'aj tq'ijlalil ex ikxkye aj Juda ok che okslal te Jesus ex kkyaqil aj Israel che kletel tu'n (caps. 9-11).
B'ajkub' ttz'ib'ante Pawlju' tyol tib'aju' tchwinqlal jun okslal, ex tma qa aju' tk'u'jlajiltib'il t-xjanilju' chwinqlal toj okslab'l, ex ikxju' ajb'eb'l toj taq'un Dyos extzunju' ti'xti' b'a'n tu'n qb'inchante kyuk'ilju' ajkawil ex kyuk'ilju' txqantl xjal. Ex ikx nyolin tib'aj junjun ti'xti' tu'n ttzaj anq'in toj qanmi (12.1—15.13). Aju' tz'ib'a'n mankb'il toju' u'j lu atzu' nyolina' kyi'ju' junjuntl u'j nche tzaj tna'n Pawl ex kyi'ju' q'olb'eb'l nxi' tq'o'n kyeju' xjal (15.14—16.27).
Currently Selected:
Ro CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999