Lv 2
2
Oyaj twitz awal k'ok'e'kywitz
1Qama tzul jun xjal tuk'i'l toyaj twitz awal nwitze', arin tb'anilxi'x tu'n ttzaj tiq'i'n ex kjawix tq'o'n aseyt ex sturak tib'aj; 2kxel tiq'i'ntzuntz kyeju' pale tk'wal Aaron, juntzun kyxol kjawil q'inte jun jot arin tuk'i'l aseyt junx tuk'i'lju' sturak, kb'el ttz'e'ysa'ntzuntz tib'aj q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'. 3Atzunju' kjel tpa'ntib', qu'n xjan na' kyxolju' oyaj inkub' tz'e'yset te ninb'ilweye', kxe'l te Aaron kyuk'i'lju' tyajajil.
4Qama txi' kyq'o'n jun kyoyaje' twitz awal tzq'ajsa'n toj chuj, kyq'onxe' muqintl ti'j tb'anil arin xyuq'i'n tuk'i'l aseyt mixti' ttx'amal, mujqa xwok' muqin mixti' ttx'amal witxk'a'n aseyt kyi'j.
5Qatzun twitz awalju' kyoyaje' tzq'ajsa'n toj sarten, ati tu'n kyb'inchanteye' tu'n tb'anil arin xyuq'i'n tuk'i'l aseyt mixti' ttx'amal; 6kb'ajel kypiẍu'ne' ex kb'ajel kywitxk'a'ne' tu'n aseyt, qu'n oyaj te twitz awal.
7Qatzun twitz awalju' kyoyaje' tzq'ajsa'n toj k'wil, ati tu'n tb'inchet tu'n tb'anil arin ex tuk'i'l aseyt. 8Ajtzun tb'aj kyb'incha'nju'ye' oyaj kyuk'i'lju' junjunl ti'xti' lu, ktzajel kyiq'i'ntzuntze' nwitze' ex kxel kyq'o'ne' teju' pale, atzunte kxel iq'inte tk'etz q'olb'eb'l. 9Atzuntzu' kjawitza' tiq'i'n pale ch'i'n tu'n tkub' ttz'e'ysa'n tib'aj q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'. 10Atzunju' kjel tpa'ntib' ti'ju' oyaj, aju' jun tnej xjan kyxolju' oyaj inche tz'e'yset te ninb'ilweye', kxel q'et te Aaron ex kyeju' tyajajil.
11Mixti'xte jun ttx'amal oyaj twitz awal kb'elex kyq'o'ne' aju' intzaj kyq'o'ne' weye', expe' mixti'x jun ttx'amal ex myel kb'el tz'e'yset te oyaj te ninb'ilweye'. 12B'a'nte' tu'n tkub' kyq'o'ne' ttx'amal ex myel nwitze' te jun oyaj tnejel twitz awal, naqtzun o'kx mya te jun oyaj tu'n tkub' tz'e'yset te jun tb'anil tk'ok'jal.
13Ilti'j kxel kyq'o'ne' atz'an kyoju' kyoyaje' twitz awal, ex lalun tzaj kyq'o'ne' kyoyaje' twitz awal mixwitti' atz'an toj teju' yol kyejni b'entti'j wu'ne' ayine' Dyos Manb'aj.
14Qama tzaj kyq'o'ne' kyoyaje' tnejel twitz awal weye', ate ktzajel kyq'o'nju'ye' aju' matxi' tijin twitz, wensi'n ex pa'n twi'. 15Kb'el kyqo'ne' aseyt tib'aju' kyoyaje' ex kb'el kyq'o'ne' sturak tib'aj, qu'n oyaj twitz awal. 16Kb'el kytz'e'ysa'ntzun paletz ch'i'n twitz awal pa'n twi' ex aseyt junx tuk'i'l tkyaqilju' sturak, k'okeltzuntz te jun oyaj te nab'ab'l tz'e'ysa'n te ninb'ilweye', chiku'ya kye, chi Qman Dyos te Moyses.
Currently Selected:
Lv 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999