Jn CHIK'B'AB'L
CHIK'B'AB'L
A mankb'il u'ju' lu kub' ttz'ib'a'n Xwan kxolju' kyaje' tpakb'al b'a'n, expe' maskye mixti' ntma'n jte'xi'x q'ij kb'ajlen kub' tz'ib'a'n txqantl tej tkub' tz'ib'a'n. Naqpe' tka'yinx majx q'ancha'l qa junxi'tl se'nqeju' oxe'tl tpakb'al b'a'n, qu'n nyolin ti'j txqan ti'xti' b'ent tu'n Qajaw ex ti'ju' tyol, aye'j mixti' nche elyal kyoju' oxe'tl tpakb'al b'a'n, ex maskye aye'xju' tb'inchb'en Jesus naq a mikxa'tl chik'b'anteju'. Ik ntzyetaju' se'nte tpakb'al b'a'n tu'n Kuẍ, intzyet tyolin ti'ju' taq'un Xwan Jawsal a' (1.19-51). Atzun ti'ju' taq'un Jesus kwitz kkyaqil xjal (2.1—12.50), atzu' nyolina'xi'x toj Judey, naq ch'i'naq nyolin ti'ju' taq'un Jesus toj Kaliley. Ex ikx nok tq'o'n toklenju' tpomlen Jesus toju' tq'ij tzaqpib'l ex kyoj txqantlu' ninq'ij nik' kxol aj Juda. Ex nyolin kyi'ju' ti'xti' nimaq kyoklen b'aj tb'incha'n Jesus toju' mankb'il tq'ijlalil tten toj Jerusalen (13.1—19.42) ex nyolin ti'ju' tjaw anq'in ex tej tkub' tyek'u'ntib' b'a'npun maj, nyolin kyi'ju' mixti' nyolin kyoju' oxe'tl tpakb'al b'a'n. Iku' se'n nyolin tej tokyal Jesus kyuk'ilju' parisey ex tej kpon aj kryek tk'etz Jesus. O'kx tpakb'al b'a'nju' nyolin ti'j tkub'len tyek'u'ntib' Jesus mankb'il maj, ttziju' Njab' toj Kaliley ex tej tten jumajtl toklen Luch, atzu' nyolina' toju' jun tnej tok tmuj tpakb'al b'a'n lu (cap. 21).
Junxi'tlte' tpakb'al b'a'n kub' ttz'ib'a'n Xwan, qu'n minti' naq nyolin ti'ju' xb'aj tb'incha'n Jesus, aku'te nkub' yek'unte alkyeju' Jesus. Qu'mtzun atzu' nyolina' tnejel tnej ti'j (1.1-18), jankub' tyek'u'na' Jesus se'n tyol Dyos tejumajx, ok te xjal ex najan kxol xjal. Aye'ju' b'a'nq'ob'aj eb'aj tb'incha'n mujqa aye'ju' techlal nche yek'unte toklen Jesus. Atzu' nche tyek'u'na' ex nche tchik'b'a'na' tb'a'nq'ob' toju' tpakb'ab'l, ex nche ajb'en a', wab'j exju' spik'un tu'n te techlal, tu'n tchik'b'etju' toklen chwinqlal tejumajx ntzaj tq'o'n Dyos naqx tu'ne'l Jesukrist, jun oklenj ntzaj q'o'n ja'loxi'x, toju' qchwinqlal, kyeju' nche okslan te Qajaw Jesukrist ex kyeju' nelkynik' ti'j qa ate b'e, axxi'x ex chwinqlal. Aye'ju' tnej 13-17 nkq'o'n nim tqanil tb'anilxi'x ti'ju' tk'u'jlalil ten kxol Jesus kyuk'ilju' t-xnaq'tzb'en teju' qonik'an tej ttzyet kyu'n xjal, ti'ju' tna'j Dyos kyi'j t-xnaq'tzb'en ex tu'nju' tyol te q'uqb'ab'l k'u'jb'aj b'ajx tma'n kyeju' t-xnaq'tzb'en tej ch'inxtltoq ttzyunjtz kyu'n xjal ex ch'inxtltoq tjaw q'o'n twitz krus.
Atzu' toju' tpakb'al b'a'n lu nel yalaju' nimaq yol Ayinwe' chi Jesus: Ayinwe' wab'j te chwinqlal, ayine' q'olte spik'un toj tkyaqil twitz tx'otx', ayine' ttzi kja rit, ayine' b'a'n k'ik'lel, ayine' anq'ib'l ex chwinqlal, ayine' b'a'n b'e, ayine' axxi'x ex chwinqlal, ex ayine' tqan ub'a axxi'x, chij. Ex ikx o'kxku' tpakb'al b'a'n ja'lu kxolju' kyaje' tpakb'al b'a'n nchik'b'anxixte tb'is tk'u'ju' u'j lu kub' tz'ib'a'n: tu'ntzun alkyexku' majaw ẍch'inte kxe'l toksla'n qa ate Jesusju' Krist tzajni ttziya'n Qman Dyos, aju' tk'wal Dyos, ex tu'nju' qama che okslan te Jesus ktenb'il kychwinqlal (20.31).
Currently Selected:
Jn CHIK'B'AB'L: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999