1 R 8
8
Pon q'i'n tkaxilju' chaq'b'il toj tja Dyos
(2 Cr 5.2-14)
1Eb'ajtzajtzun tb'u'yi'n Salomon tijwnaq kyxol aj Israel tu'n kypon tuk'i'l toj Jerusalen, exqe' nejenel kye junjun tnej kyyajajil exqe'ju' ati kyoklen kyxol junjun ja xjal, tu'n txi' q'ib'aju' kax tkb'el tchaq'b'il Qman Dyos tzmax Syon, Ninttanam Dab'i. 2Tojtzunju' ninq'ij nim toklen, toju' xjaw Etanim, ju' twuqi'n xjaw te ab'q'i, b'aj kyb'u'yi'n kyib' kykyaqilju' aj Israel tuk'i'l nimaqkawil Salomon. 3Eb'aj pon kykyaqilju' tijwnaq toj Israel, jawtzun kyiq'i'n paleju' kax 4tzaj kyiq'i'ntzuntz tuk'i'lju' ninpach te k'lub'l tuk'i'l Qman Dyos, exqe' kykyaqilju' ti'xti' xjan ate'qe' toj, iq'i'nqe' kyu'n pale ex kyu'n aj Leb'i. 5Atitoqju' nimaqkawil Salomon kyuk'i'l kykyaqil aj Israel matxi'toq b'aj kyb'u'yi'n kyib' tuk'i'l twitzju' kax, nim txqan rit ex tman wakx e'kub' kyq'o'n te chojb'il, mixb'enta' kyajlet. 6Yajxi'tzuntl xikyiq'i'n pale tkaxilju' chaq'b'il toju' tja Dyos, tzmax toju' Najb'il Xjanxi'x, tjaq' kyxik'u' kyilb'ilal kyerb'in, 7lik'u'n kytenju' kyxik' tib'aju' tkb'el kax, ktxu'n kax kyuk'i'lxi' tqul kyu'n. 8Aye'tzu'n tqul nimaq kywe', q'ancha'l qe'ju' kytxa'n toju' Ja Xjan twitzju' Ja Xjanxi'x, maskye min q'ancha'lqe' ti'jxi'ju' ja; kukxtzun e'kyaja' tenju'. 9O'qe'kxju' kab'e' plaj ab'j tku'x toju' kax ju' kux tq'o'n Moyses Oreb', aye' ab'j ja tz'ib'a'n qe'ju' yol kyej b'entti'j tu'n Dyos kyuk'i'lu' aj Israel tej kyetz toj Ejipt.
10Atzunj kyetzju' pale toju' Ja Xjan, kub' noj toju' tja Dyos tu'n muj, 11tu'ntzu'n nimtoq muj min b'ent kykyajtenju' pale b'inchalteju' k'u'lb'il, qu'n kub' noj toju' jatu'n tajwalil Qman Dyos.
Kub' tq'o'n Salomon ja te k'u'lb'il toj tq'ob' Dyos
(2 Cr 6.1—7.10)
12Tmatzun Salomontz:
Nman Dyos, oje tmaya
qa najliya toj qxopin.
13Ayintzunwe' majaw nb'inchane'
jun tjaya tu'n ttena toj,
jun najb'il jatu'n ttena'ya tejumajx, chij.
14Tzajtzun ka'yin nimaqkawil kyeju' aj Israel wa'lqe'toq, ex tzaj tqani'n ky'i'wb'il kyb'aj 15ex tma: Nimanxwit tb'i Qman Dyos, qu'n ma japunju' tyol kyej ttziya'n te Dab'i ju' nmane', tej ttzaj tma'n te:
16B'ajx jawa' nsk'o'n jun nintname' kyxol kykyaqil tnej tyajajil Israel tu'n tjaw b'inchet jun njaye' toj jatu'n ttzaja' na'n nb'iye', atxi'x tej kyetzwiq'i'ne' ntaname' Israel toj Ejipt. Matxitzun jawnsk'o'ne' Dab'i tu'n tkawin toju' ntaname' Israel, chij.
17Ojexi'xtzun laqju' nmane' Dab'i tu'n tjaw tb'incha'n jun ja te ninb'ilte Qman Dyos. 18Atzunte Qman Dyos tzaj tma'n te:
B'a'nte' tb'is tk'u'ja tu'n tjaw tb'incha'na jun njaye'; 19naq o'kx myaya kjawil b'inchante, ate tk'walju'ya tzul kjawil b'inchante njaye', chi Dyos.
20Qu'mtzun, matxi' japunte Qman Dyos tyol tu'n. Matxi' chin kyaje' te t-xel Dab'i, ju' nmane', kse'nxju' oje tma, inchin kawine' kyib'aj aj Israel te t-xel nmane' ex matxi' jaw nb'incha'ne' jun tja Qman Dyos. 21Expe' matxi' tz'el npa'ne' jun najb'il, te tkb'el tkaxilju' yol kyejni b'entti'j tu'n Qman Dyos kyuk'i'lju' ojtxi' qyajilb'en tej kyetz tiq'in toj Ejipt, chi nimaqkawil Salomon.
22Yajxi'tzuntl kub'ten Salomon twitzju' q'olb'eb'l te Qman Dyos, kyuk'i'l kykyaqilju' aj Israel, ex jawtiq'i'n tq'ob' tojawl, 23ex jawtma'n kuw: Nman Dyos: mixti' jun Dyos toj kya'j ex twitz tx'otx' kse'n aya, in japun tyola ex in tyek'u'na tk'u'jlalila kyeju' inche ajb'en teya tu'n tkyaqil kyk'u'j; 24qu'n matxi' japunju' tzaj tma'na te nmane' Dab'i ju' tmajina, matxitzun japun tu'na teju' q'ij ja'lo. 25Qu'mtzun, Nman Dyos, ex ikx japunxju' tzaj ttziya'na te nmane' Dab'i ju' tmajina; qa kjapumel jun tyajajil toju' q'uqb'il te kawb'il kukxju' kyib'aj aj Israel tu'n t-xtalb'ila, qama txi' kyka'yi'nju' tk'wal kychwinqlal, exqa mache anq'in twitza kse'n sanq'ina'. 26Iktzunju', Nman Dyos, b'inchama tu'n tjapunju' tyola tzaj ttziya'na te nmane' Dab'i ju' tmajina.
27¿Ma oktzunlo knajala twitz tx'otx' Nman Dyos? Nimxi'xpenate' kya'j, extzunqa mixti' in kanun tu'n ttena toj Nman Dyos, ¡Mitzulo yate ja'lu xjaw nb'incha'ne' teya! 28Tu'npetzunju', nman Dyos, b'intzju'ya nkub'sb'ile'; b'intzju'ya nqanb'e'tze' exju' nna'j Dyose' teya ja'lo. 29Ka'yintza kukxju' tib'aju' ja lu, q'ijtl ex qonik'an, aju' oje tmaya tu'n ttena toj. B'intzju'ya nna'j Dyose' inkub' nq'o'ne' toju' ja lu, ayine' tmajina. 30B'intzju'ya nkub'sb'ile' ex kykub'sb'ilju' ttanama Israel aj qk'ulune' toju' najb'il lu. B'inqe'tza tzmax toj kya'j, ja najla'ya, ex najsama qile':
31Qa ati jun matb'incha jun taq'wix ti'j twnaqil, exqa matz'ok chq'o'n tu'n ttziyante jun tyol ax twitz q'olb'eb'l toju' tjaya lu, 32b'intza tzmax toj kya'j, b'inchama tnik'alilti'j kyeju' tmajina. Tz'e'ysama twitzju' nb'inchan myab'a'n, ex b'inchama b'a'n teju' mixti' til, kse'nxju' in nojqelan te.
33Qama kub' kyi'ju' ttanama aj Israel kyu'n ajq'oj tu'n tpaju' mache b'inchan il twitza, exqa matz'anjtzkyi'j tuk'i'la, exqa majawkyajwali'n tb'iya, exqa mache ul kub'sal twitza toju' tjaya lu, 34b'inqe'tza tzmax toj kya'j, najsanku'ya kyil, ex anjsantza kyi'j toju' tx'otx' tzaj tq'o'na kyeju' ojtxi' qchmane'.
35Qama tzaj jun nin q'ijal ex min sajtl jb'al tu'n tpaju' mache b'inchan ilju' tnam twitza, exqa mache ul kub'sal twitza toju' najb'il lu, qa makyajwalilju' tb'iya, ex makyb'inchakyib' twitza tu'nju' tz'e'ysb'il kywitz tu'na, 36b'intza tzmax toj kya'j ex najsama kyilju' tmajina, ju' ttanama aj Israel, ex yek'unxju'ya b'a'n b'e kye jatu'n kyb'eta'. Q'ontz tzuna jb'altz tib'aju' tx'otx' lu tzaj tq'o'na te kyetzb'ilju' ttanama;
37Qama tzaj we'yaj toju' txo'tx' lu, mo yab'il, mujqa makub' tzqiju' awal tu'n q'ij, mujqa mab'aj tu'n tyab', kyu'n ẍt'ikt'u'l mo tu'n soj; qama b'aj kytxoli'n kyib' ajq'oj ti'ju' ninqtaname' ex mache okten q'ojil, mujqa matzaj juntl ti'xti' qi'je' mujqa yab'il, 38-39B'intza tna'j Dyos mujqa tkub'sb'il alkyexku' mak'ulun teya, mujqa kyu'n kykyaqilu' ttanama aj Israel, qa majawkyiq'i'n kyq'ob' twitza toj kyna'j Dyos toju' tjaya lu ajkyka'yinteju' ti'xti' xkyk'ulb'a ex k'ixk'oj. B'intza tzmax toj kya'j, toju' tnajb'ila, ex najsaku'ya kyil; ex b'inchama te junjun kse'nx tb'inchb'en, qu'n o'kxta ojtzqilteju' t-xim tanmi xjal. 40Kche nimaltzuntz teya toju' kyanq'ib'l twitzju' tx'otx' tzaj tq'o'na kyeju' ojtxi' qchmane'.
41Maskyepe' jun najchaq xjal, junju' mya ttanama, naqtzun tu'nju' tb'iya matzaj toj juntl tx'otx' najchaq 42ex matzul na'lte tb'iya toju' tjaya lu, naq tu'n kb'injtzelju' tb'iya nim toklen ex nimtipumala, 43b'intza tzmax toj kya'j, tzmaxtzu' ja najla'ya, ex q'ontza te tkyaqilju' kxel tqani'n teya, tu'ntzun telkynik' kykyaqilju' nimaqtnam twitz tx'otx' ex tu'n kyniman teya, kse'nxju' nkyb'incha'n ttanama aj Israel, ex tu'n telkynik' qa in na'njtzju' tb'iya toju' tjaya matxi' jaw nb'incha'ne'.
44Ajkyexju' ttanama q'ojil kyi'j kyajq'oj, jaxjaku' mache'xa' t-sma'na, qama che k'ulun teya tu'me'lu' nintnam jaw t-sk'o'na exju' tjaya xjaw nb'incha'ne', 45b'intza kyna'j Dyos tzmax toj kya'j exju' kykub'sb'il, ex klomqe'ya.
46Exqa mache b'inchan il twitza, qu'n mix-a'lo' jun xjal mixwitti' in b'inchan il, exqa matzaj ttx'u'jila kyi'j exqa mache'x tq'o'na toj tq'ob'ju' kyajq'oj tu'n kyxi' kyiq'i'n toj jitz'jtib'il exqa mache'x kyiq'i'n toj kytx'otx', nqaku' mujqa najchaq, 47qatzun matz'anjtz kyi'j tuk'i'la toju' tx'otx' jamatxitoq che'xa q'in, qama che kub'san teya ex matz'el kynik' qa matxi'toq che b'inchan il twitza, 48Qama tz'anjtz kyi'j tuk'i'la tu'n tkyaqil kyk'u'j ex tu'n tkyaqil kyanmi toju' tx'otx' jamatxitoq che'xa' q'i'n toj jitz'jtib'il, exqa mache k'ulun teya tu'me'lju' tx'otx' lu tzaj tq'o'na kye ojtxi' qyajilb'ene', ex tu'me'lju' nintnam jaw t-sk'o'na, ex tu'me'lju' tjaya matxi' jaw nb'incha'ne', 49B'intzju'ya kyna'j Dyos ex kykub'sb'il tzmax toj kya'j, tzmaxtzu' ja najla'ya, klomqe'ya. 50Najsama kyilju' ttanama ex tkyaqilju' kypi'sal twitza. Ex yolina toj kyanmiju' ẍe' ex q'inkye toju' kytx'otx' tu'n ttzaj laq kyk'u'j kyi'j. 51Qu'n ttanamna'ya ex teya; aya etzq'inkye toj Ejipt, ja intoq che yajunjtza', ikytoqu' kye kse'n jun chujb'il k'uxb'il.
52B'intztzuna nkub'sb'ile', ex kykub'sb'ilju' ttanama Israel. ¡Qo'tb'itza, Nman Dyos, aj qkub'sane' teya! 53Taye, qu'n ana'ya sel pa'nqeye' tu'n qoke' te teku'ya kyxolu' txqantl tnam twitz tx'otx', kse'nxju' oje tmaya te Moyses ajb'el teya, tej kyetztiq'i'na qyajilb'ene' toj Ejipt, chi Salomon.
54Mejli Salomon twitzju' q'olb'eb'l te Qman Dyos tej tna'n Dyos, ex jawniti'n tq'ob' tojawtl. Tetzu'n tb'aju' tna'j Dyos ex tkub'sb'il te Qman Dyos, 55jawe'tzuntz ex tzaj tqani'n b'a'n tib'aju' tnam Israel, tma tuk'i'l tq'ojq'ojel twi' kuw:
56¡Nimanjtzxwitju' tb'i Qman Dyos, qu'n matxi' tzaj tq'o'n nak'b'il teju' ttanam Israel, kse'nxju' oje tma tu'n tb'inchante! Qu'n b'ajx tzik'a' tna'l junju' tb'anil tyol ttziya te Moyses tmajin tu'n tb'inchante.
57Atzu'n ja'lo, awt Qman Dyos ten quk'i'l kse'nx tej tten kyuk'i'lju' ojtxi' qyajilb'en. Mixwit qokyaja' tkolb'e'n ex mixwit qokyaja' ttzaqpi'n, 58Tzajxwit tq'o'n qtzalajb'il ti'j tu'ntzun qb'inchanteju' tajb'il ex tu'n kyjapunju' tchaq'b'il qu'n, e'tkawb'il ex tnuk'b'il e'tchaq' tu'n tjapun kyu'n qyajilb'en. 59Aye'ju' ti'xti' ẍe'x nqani'ne' te Qman Dyos, majxwit na'nqe' tu'n q'ijtl ex qonik'an, tu'n ttzaj tq'o'n b'a'n weye' ex teju' ttanam Israel kse'nxju' in nojqelan, 60tu'ntzun telkynik' kykyaqilju' nimaqtnam twitz tx'otx' qa ate Qman Dyosju' ex mixti' juntl. 61Qu'mtzun, che okxe' ax che yoline' twitz Qman Dyos, chejapunxu' tkawb'il kyu'ne' ex kyb'inqe'xe' tchaq'b'il kse'nx ja'lo, chi Salomon.
62Tb'ajlenxi'tzun ja'lu, kub' kyq'o'n nimaqkawil ex kykyaqil aj Israel chojb'il te Qman Dyos. 63Xitq'o'n Salomon kab'mutx' o'lajk'al (22,000) tman wakx ex o'lajmutx' (120,000) rit te Qman Dyos, chojb'il te b'inchjtib'il.
Iktzun tb'incha nimaqkawilju' ex kykyaqil aj Israel tej kyxjansanteju' ja te Qman Dyos. 64Texju' q'ij lu, t-xjansa nimaqkawilju' tnky'ajchaqil twi' pe'n, tpenju' tja Dyos, atzuntzu' ekub'a' tq'o'n chojb'il k'ok'sb'il, oyaj twitz awal k'ok'e'kywitz ex ky-until chojb'il te b'inchjtib'il, qu'n b'o'stoqju' q'olb'eb'l q'ank'uxb'il ati twitz Qman Dyos ex min b'ent kykub' tz'e'ysetju' chojb'il k'ok'sb'il, oyaj twitz awal k'ok'e'kywitz ex ky-untilju' chojb'il te b'inchjtib'il tib'aj.
65Nim txqan xjal eb'ju'l toju' tq'ijlalil lu, e'tzajx ttzi Amat ex ponx tk'etzu' a' te Ejipt, kub' tik'sa'n nimaqkawil Salomon kyq'iju' pach t-xaq tze twi' kyuk'i'l kykyaqil aj Israel te ninb'ilte Qman Dyos, ex juntl ninq'ij te wuq q'ij; kyajlajoj q'ij ninq'ij kub'kyik'sa'n tu'n tkyaqil. 66Tetzun juntl q'ij b'aj kyq'olb'e'nkyib' Salomon kyuk'i'lju' xjal, aye'tzu'n xjal xikyq'o'n chjonte teju' nimaqkawil, e'anjtzuntz kyja, inxi'x che tzalaj tu'n tkyaqilju' b'a'n matxi'toq tb'incha Qman Dyos te Dab'i, ju' tmajin, ex teju' ttanam Israel.
Currently Selected:
1 R 8: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999