1 R 6
6
Tchaq' Salomon tu'n tjaw b'inchetju' ja te k'u'lb'il
(2 Cr 3.1-14)
1Tchaq' Salomon tu'n ttzyet tb'inchet tja Dyos toj tkyaji'n ab'q'i ttzyetlen tkawin toj Israel, toju' xjaw Sib', ju' tkab' xjaw teju' ab'q'i, tej matxi'toq b'aj junk'al kyajnaq (480) ab'q'i kyetzlenju' aj Israel toj Ejipt. 2Te junaq wuq (27 m.) metr tnuqub'ju' tja Dyos tchaq' nimaqkawil Salomon tu'n tjaw b'inchet, atzun b'eljoj metr twitz ex oxlajoj metr tk'i' nik'jan (13.50) twe'. 3Atzu'n koredor twitz tja Dyos jaw b'incha'n, te b'eljoj metr tnuqub', kse'nx twitzju' tja Dyos, atzun kyaje' metr tk'i' nik'jan etzna'ten twitzju' ja. 4E'kyaj q'o'n k'uxb'il te kolb'ilkye tokexspik'un te tja Dyos. 5Ex ikx e'jaw b'incha'n jte'tl ja twitzju' tapi ti'jile tja Dyos, ti'jileju' nin ja toj nky'ajchaq ex b'o'schaq ja ti'jileju' ja xjan. 6Kab'e' metr tk'i' ch'i'ntl (2.25) toju' tal ja exni ch'isa'n tnejel kol; atzunju' tkab' kol, ch'intlmi oxe' metr (2.70) toj; atzunju' toxi'n kol, oxe' metr tk'i' ch'i'ntl (3.15) toj; qu'n okb'o'tzix tpimilju' tja Dyos ti'jxi' tu'n lalun che okxju' ttxa'n ptzo'n tojxi' tkojonil. 7Jso'miletl kywitzju' ab'j b'a'nxi'x e'ajb'en tej tjaw b'inchetju' tja Dyos, qu'mtzun mix-a'lo'te pojne tej tjaw b'inchet tja Dyos, tk'i'xpe'wt tu'n juntl aq'unb'il k'uxb'il. 8Atoqtzu' ta' tjpelju' tal ja te tnejel kol ttx'u'kju' tja Dyos toj tb'a'nq'ob'; ex atitoq jun yotx b'incha'n xkuyi'ntib' tu'n kyjax xjal kyoju' ja toj tkab' kol ex toj toxi'n kol.
9Tej tb'antju' tja Dyos kyu'n taq'unal Salomon, b'jo'k kyq'o'n ptzo'n k'ute ti'jile te tilb'ilal. 10Ex eb'jaw tb'incha'n ja ti'jileju' tja Dyos, te kab'e' metr tk'i' ch'intl (2.25) kywe', ex tiqatib' ttapiyilju' tja Dyos kyuk'i'l ptzo'n k'ute. 11Tzajtzun yolin Qman Dyostz te Salomon ex tma: 12A nyolju'ye' teya ti'ju' ja ntb'incha'na, qama tb'inchaya se'nqe'xju' nkawb'ile' ex nnuk'b'ile', exqa ma japun tkyaqilju' nchaq'b'ile' tu'n tanq'inteya, kjapumelwe' nyol oje nmaye' ti'ja te Dab'i, ju' tmana; 13oktzun chin tenb'elwetz kyxol aj Israel ex lay kyej ntzaqpi'ne' ntaname' Israel, chi Dyos.
14B'entu' tja Dyos kyu'n taq'unal Salomon. 15B'jo'k kyq'o'n tz'lan k'ute kywitzile ttapiyil tja Dyos tojxi', ex kub' kyq'o'n tz'lantzaj toju' tja Dyos. 16Ex b'aj kykxu'n jun tneju' tja Dyos t-xexi' tu'n tz'lan k'ute, tzajx twitz tx'otx' ex japunx tqul ja, te b'eljoj metr toj, ok tq'o'ntzuntz te Ja Xjanxi'x. 17Te wajxaqlajoj metr (18) tnuqub'ju' tnejel ja te tja Dyos ati twitzxi'ju' Ja Xjanxi'x. 18K'uteyileju' tz'lan ok te tilb'ilal tojxi'ju' tja Dyos, b'incha'mileqe' kyilb'ilal b'ech extzun twitz. Tkyaqil k'uteyile. Mixti' kyej q'ancha'lin jun ab'j. 19Tma Salomon tu'n tb'aj b'incha'nju' Ja Xjanxi'x toju' tja Dyos, tu'n tkub' tq'o'nju' kax k'ub'lteju' yol kyejni b'entti'j tu'n Qman Dyos toj. 20Te b'eljoj metr tnuqub'ju' Ja Xjanxi'x tojxi', b'eljoj metr twitz ex b'eljoj metr twe'. Jaw kyb'incha'n taq'unal Salomon jun q'olb'eb'l k'ute twitzju' Ja Xjanxi'x ex ok kyktxu'n tu'n q'anpwaq. 21Ex b'aj kyktxu'n tojxi' tja Dyos ex toju' Ja Xjanxi'x tu'nxi'x q'anpwaq, ex kyej kyjpu'n tu'n xpatx'q'anpwaq. 22Tkyaqil toj tja Dyos b'aj kyktxu'n tu'n q'anpwaq, ex ikxju' q'olb'eb'l ati twitzju' Ja Xjanxi'x.
23Ex e'kub' kyb'incha'n kab'e' tilb'ilal kyerb'in, olib'o kytzeyil toju' Ja Xjanxi'x. Te kyajkyaj metr tk'i' nik'janchaq kywe', 24ex te kakab' metr tk'i' ch'i'ntl (2.25) kywe'ju' kyxik'. Tu'ntzun kykab'ilju' kyxik', kyaje' metr tk'i' nik'janchaq kyqan junjun. 25Junx echb'enkyeju' kab'e' kyilb'ilal kyerb'in; kyaje' metr tk'i' nik'janchaq kyqanju' kyxik', ex junelnichaq b'inchb'enkye. 26Ex kyaje' metr tk'i' nik'janchaq kywe'. 27E'kub' kyq'o'n taq'unal Salomon toju' ja xjanxi'x. Ex lik'u'n kyten kyxik'ju' tilb'ilal kyerb'in lu, pomni t-xik'u' jun twitz tapi ex ikx t-xik'u' juntl pomni twitzju' tapi jun plajtl, aye'tzunju' kab'e'tl kyxik' nmuje kytxa'n toj nky'ajchaqju' ja xjanxi'x. 28B'jo'ktzun kyktxu'n q'anpwaq kyi'ju' tilb'ilal kyerb'in, 29ex b'jo'k kyb'incha'n tilb'ilal kyerb'in, tut ex b'ech ti'jile ex tojile ttapiyilju' tja Dyos. 30Ex kub'kyq'o'n q'anpwaq toju' tja Dyos ex ti'jxi'. 31E'ok kyb'incha'n tjpelju' ja xjanxi'x olib'o ttzeylal, exqe' tnunb'ralil ex tqan kyb'incha jun tilb'ilal te jwe' ttx'u'k. 32Aye'tzun kab'e' tjpel ja olib'o kytzeylal, ex e'ok kyb'incha'n tilb'ilal kyerb'in, tut ex b'ech kywitz; e'oktzun kyktxu'n tilb'ilaltz tu'n q'anpwaq. 33Okkyb'incha'n tqulju' ttzi jatu'n qokx toju' nin ja tnky'ajchaqilju' tja Dyos, olib'o ttzeylal kyaje' ttx'u'k. 34Tz'lantzaj kytzeyilju' kab'e' t-xaq tjpel ja, ex kykab'il t-xaq nche sutyan. 35E'b'jo'k kyb'incha'n tilb'ilal kyerb'in, tut ex b'ech kyi'j, e'oktzun kyktxu'n tu'n q'anpwaq. 36Ex jaw kyb'incha'n oxe' txol ab'j jso'n te tapi twi' pe'n ex jun txol ptzo'n k'ute.
37Ljo'ntoq tkyaji'n ab'q'i ntoq tkawin Salomon, toju' xjaw Sib', tej tku'x b'inchet tq'uqlilju' tja Dyos; 38tojtzun tjunlaji'n ab'q'i nkawin Salomon, toju' t-xjawil jb'al, twajxaqi'n xjaw teju' ab'q'i, tb'aj b'entiju' tja Dyos tkyaqil, kse'nx tkyaqilju' aq'untl kub' ximit. Wuq ab'q'i b'enta' tkyaqil tu'n Salomon.
Currently Selected:
1 R 6: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999