1 R 15
15
Tkawb'il Ab'yam toj Juda
(2 Cr 13.1-22)
1Tzyet tkawin Ab'yam toj Juda, toj twajxaqlajoji'n (18) ab'q'i ttzyetlen tkawin Jerob'oam, tk'wal Nab'at. 2Oxe' ab'q'i kawin toj Jerusalen. Maaka tb'iju' ttxu, tmyaltoq Ab'salon. 3Aye'x ilju' tb'incha Ab'yam kse'n etb'inchaju' tman nejtl, ex myab'a'nju' tanmi twitz Qman Dyos, mikxa' kse'nte Dab'i, ju' tchman. 4Naqtzun tu'n tk'u'jlalil Qman Dyos ti'j Dab'i, qu'mtzun min kub' tnajsa'nju' tyajajil, tu'n tokju' tk'wal toj tq'uqb'il tik'lenxi' tu'n tkuwsante toj Jerusalen; 5Qu'n matxitoq tz'anq'inte Dab'i b'a'n twitz Qman Dyos, qu'n mixti' jumaj ma'wt tz'el tpa'ntib' ti'ju' tchaq'b'il Qman Dyos toju' tchwinqlal, okxku' myab'a'nju' tb'incha ti'j Uriy ju' itit.
6-7Majx kyejten q'oj kyxol Rob'oam tuk'i'l Jerob'oam tej itz'xtoq Rob'oam. Ex ten q'oj kyxol Ab'yam tuk'i'l Jerob'oam. Atzu'n jni'tl tqanil ti'j Ab'yam ex tkyaqilu' tb'incha, tz'ib'a'nqe' toju' tu'jil tqanil kyb'inchb'aju' nimaqkawil toj Juda. 8Tetzunj tkyim Ab'yam, kux mqu'n toj Ninttanam Dab'i. Atl Asa ju' tk'wal kawin te t-xel.
Tkawb'il Asa toj Juda
(2 Cr 14.1-5; 15.16-19)
9Tzyet tkawin Asa toj Juda toj junaq (20) ab'q'i ttzyetlen tkawin Jerob'oam toj Israel, 10Kab'naq (40) ab'q'i kawin toj Jerusalen. Maaka tb'iju' tya, tmyal Ab'salon.
11B'a'n b'aj tb'incha'n Asa twitz Qman Dyos, kse'nte Dab'i ojtxi' tyajilb'en. 12Majx eb'je'x t-xlaja'nju' inche b'inchan k'u'lb'il te ajpaji'n, ex eb'je'l tiq'i'n tkyaqilju' witzileb' eb'ajkub' kyq'o'n tyajilb'en. 13Ex eltiq'in toklen Maaka ju' tya te txub'aj nimaqkawil, tu'n tpaju' ojetoq tchaq' tu'n tkub' b'incha'n jun witzleb' Asera. Kub' t-xitu'n Asa witzleb' lu ex kub'ttz'e'ysa'n ttzi a' Sedron. 14Maskyepe' min eb'aj xitu'nju' kyja witzileb' kywi'witz, ok Asa b'a'n okslal kukxju' te Qman Dyos, 15ex kub' tq'o'n tkyaqilju' q'anpwaq ex saqpwaq toj tja Dyos, ju' ojetoq kub' t-xima'n ex ojetoq kub' t-xima'nju' tman tu'n kyq'onte te Dyos.
B'antti'j kyyol Asa tuk'i'l B'en-adad
(2 Cr 16.1-10)
16Majx ten q'oj kyxol Asa tuk'i'l B'aasa nimaqkawil toj Israel. 17Tej txi' B'aasa q'ojil ti'j Juda, b'jo'k tq'o'n tapi ti'jile Rama tu'n mix tena'tlju' mujb'ab'ltib'il tu'n tuk'i'lju' nimaqkawil toj Juda. 18Atzunte Asa b'je'tztiq'i'n tkyaqil q'anpwaq ex saqpwaq atixtoq kyoju' k'uwenj toj tja Dyos ex toju' tja te kawb'il, xit-sma'ntzuntz kyu'nelju' nche kawin tuk'i'l te B'en-adad nimaqkawil toj Sirya, tk'wal Tab'rimon ex tchman Esyon, najlitoq Damask, ex xitma'n sanjelj lu te:
19Qb'incham tten jun qyol tu'n tkyejb'ent ti'j qxol kse'nx kyb'incha qman. Lu q'anpwaq ex saqpwaq matxi nsma'ne' te jun oyaj teya. Xitunku'ya mujb'ab'lkyib'e' tuk'i'l B'aasa, nimaqkawil toj Israel, tu'ntzun lalun q'ojintl wi'je', chij.
20B'a'n ela'ju' xitma'n nimaqkawil Asa toj twitz B'en-adad, ex e'tzaj tchq'o'n nejenel kye t-xjal te q'oj q'ojil kyi'ju' nimaqtnam toj Israel. Iktzu'n kub'kyi'ju' tnam Liyo'n, Dan, Ab'el-b'et-maaka, tkyaqilju' Kyineret ex tkyaqil kytx'otx' tyajajil Neptali. 21Tej tb'inte B'aasa, kyej ttzaqpi'n tb'inchjiju' tapi ti'j Rama ex anjti'j Tirsa. 22Tchaq'tzun nimaqkawil Asa tu'n kytxket kykyaqil aj Juda, mix-a'lo' tu'n tkyejten, ex b'ajx kyiq'in ab'j ex tze ajb'en tu'n B'aasa tu'n tjaw b'inchet tapi ti'jile Rama, ex e'ajb'en tu'n nimaqkawil Asa tu'n kyjaw tb'incha'n tapi ti'jile Keb'a toj kytx'otx' B'enjamin ex ti'jile Mispa.
Kyim Asa
(2 Cr 16.11-14)
23Atzu'n jni'tl tqanil ti'j Asa ex tb'inchb'aj, exju' tb'incha exqe' nimaqtnam b'jaw tb'incha'n, tz'ib'a'nqe' toju' tujil tqanil kyb'inchb'aju' nimaqkawil toj Juda.
Kub' yab'ti Asa kyu'n tqan tu'n tijil; 24tetzunj tkyim, ku'x mqu'n kyk'etzju' ojtxi' tyajilb'en toj Ninttanam Dab'i. Atl Josapat ju' tk'wal kawin te t-xel.
Tkawb'il Nadab' toj Israel
25Toj tkab' ab'q'i ttzyetlen tkawin Asa toj Juda, tzyet tkawin Nadab' tk'wal Jerob'oam toj Israel, naq kab'e' ab'q'i kawin. 26Taq'wixi'xju' tb'inchb'aj twitz Qman Dyos: aye'x ilju' tb'incha kse'nx b'aj tb'incha'nju' tman, tu'ntzun tpaj eb'inchana' ilju' aj Israel. 27Atzu'n B'aasa, tk'wal Ayiy, ju' tyajajil Isakar, jaw tb'u'yi'n jun tnej xjal q'ojil ti'j ex kub' tb'yo'n toj Wib'eton, nimaqkytanam pilistey ojetoq cheb'aj ttxoli'n Nadab' aj Israel te q'oj ti'jile.
28Kub' tb'yo'n B'aasa Nadab' toj toxi'n ab'q'i nkawin Asa toj Juda, ex kkawil te t-xel. 29Akxtoqtzun ttzyet tkawin, eb'aj Kub' tb'yo'n kyyaqilju' toj tja Jerob'oam, kse'nxju' ojetoq tma Qman Dyos toj ttzi Ayiy aj Silo, majx eb'aj mankun kykyaqilju' tyajajil Jerob'oam tu'n B'aasa, mixti'x jun kyej anq'in tu'n. 30B'aj ja'lu tu'n kpaju' il b'aj tb'incha'n Jerob'oam, ju' xiq'onkye aj Israel toj il, iktzu'n oka' kyq'o'n ttx'u'jil Qman Dyos.
31Atzu'n jni'tl tqanil ti'j Nadab', ex tkyaqilju' tb'incha, tz'ib'a'n toju' tu'jil tqanil kyi'ju' nimaqkawil toj Israel.
32Majx ten q'oj kyxol Asa tuk'i'l B'aasa nimaqkawil toj Israel.
Tkawb'il B'aasa toj Israel
33Tzyet tkawin B'aasa tk'wal Ayiy toj Tirsa tib'aj tkyaqil Israel toj toxi'n ab'q'i ttzyetlen tkawin Asa toj Juda, ex junaq kyaje' (24) ab'q'i kawin. 34Taq'wixi'x tb'inchb'aj B'aasa twitz Qman Dyos, qu'n aye'x ilju' b'aj tb'incha'n kse'nx tb'incha Jerob'oam ju' xiq'onkye aj Israel toj il.
Currently Selected:
1 R 15: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999