1 R 13
13
Jun aj Juda t-sanjelal Dyos tzak'unte Jerob'oam
1Tej intoq ttz'e'ysa'n Jerob'oam k'ok'sb'il tib'aj q'olb'eb'l, kanun jun t-sanjelal Dyos B'etel chq'o'n tu'n Qman Dyos. 2Tchaq' Qman Dyos tu'n tyolin tuk'i'l tq'ojq'ojel twi' kuw ti'ju' q'olb'eb'l, ex tma: Q'olb'eb'l, matxi' tma Qman Dyos qa k'itz'jel jun tyajajil Dab'i, Josiy tb'i k'okyel, che b'eltq'o'nju' pale nche ajb'en kyoju' ja te witzleb'i'n te chojb'il tib'aja, aye' nche kub' kytz'e'ysa'n sturak tib'aja; ex kb'el tz'e'ysa'n kyb'aqil xjal tib'aja, chiju' t-sanjelal Dyos.
3Textzunju' q'ij lu taq'ju' t-sanjelal Dyos jun techlal te lab'te'n, ex tma: A techlal ja'lu te lab'te'n matxi' tma Qman Dyos: Kb'ajel txijju' q'olb'eb'l, atzunju' tza'j tib'aj kb'ajex chitj, chij. 4Atzunj tb'inte nimaqkawil Jerob'oam tz'e'ysb'il witzb'aj tmaju' t-sanjelal Dyos ti'ju' q'olb'eb'l toj B'etel, xitnuqpi'n tq'ob' ex tma: ¡Kytzyume'! chij. Atzunju' tq'ob' xiyek'unte t-sanjelal Dyos, kyej tzeyix ex mixti' b'entl tyokchante. 5Textzu'n kmuj lu kub' txijju' q'olb'eb'l, atzunju' tza'j atitoq tib'aj b'ajx chitj, kse'nxju' techlal tchaq' Qman Dyos teju' t-sanjelal. 6Atzunte' nimaqkawil xitma'n teju' t-sanjelal Dyos ikjalu:
—Chin kub'sale' teya tu'n txi' tqani'na te Qman Dyos tu'n tb'anixju' nq'ob'e', chij.
Kub'santzunju' sanjelal te Qman Dyos ex kyej b'anix tq'ob'ju' nimaqkawil kse'nxju' tten. 7Xi'tzun tma'nju' nimaqkawil teju' t-sanjelal Dyos:
—Kutzaja wuk'i'le' njaye' tu'n txi' jun twaya, ex kxel jun nb'anile' teya, chij.
8Atzunte' t-sanjelal Dyos xittzaq'we'n te nimaqkawil:
—Maskye matzaj tq'o'na nik'janju' ati teya toju' tjaya te kawb'il, lay chinxe' tuk'i'la, lay chin wan wab'je' ex lay chin k'wan a'ye' toju' najb'il lu; 9qu'n iku' oje tzaj tma'n Qman Dyos weye'. Chij kjala: Lalun wan wab'ja ex lalun txi' tk'wa'na a', ex lalun tz'anjtzti'ja tojxu' b'e ja matxa'ya, chi Dyos weye', chij.
10Xi'tzu'n xa'ya'tlju' t-sanjelal Dyos toj juntl b'e tu'n lalun tz'anjti'j tojxju' tb'eyil B'etel.
11Atitoq jun t-sanjelal Dyos tijwnaq najli B'etel toju' tq'ijlalil lu, ext'anju' tk'wal q'malte te titi' matxitoq tb'inchaju' t-sanjelal Dyos aj Juda toj B'etel; ex ikx xikyma'n titi' tmaju' nimaqkawil. 12Xi'tzun t-xjelu'nju' kyman:
¿Alkyetzun b'e xxa'ya'? chij.
Xi'tzun kyma'nju' tk'wal alkye b'e xa'yaju' t-sanjelal Dyos aj Juda. 13Xitma'ntzuntz kyeju' tk'wal:
Kyq'onktze' t-xalmiju' b'ur, chij.
Kyb'inchatzuntz ikju', jawx chejintzun t-sanjelal Dyostz ti'j 14xi'tzuntz knolteju' t-sanjelal Dyos aj Juda. Ex kub'ti'j tu'n q'uqlitoq t-xe jun b'a'nsi, ex xit-xjelu'n te:
—¿Ma aju'ya t-sanjelal Dyos saj Juda? chij.
—Ayine', chij xittzaq'we'n:
15—Kutzaja njaye' tu'n txi' jun twaya wuk'i'le', chiju' t-sanjelal Dyos tijwnaq. 16Atzunju' t-sanjelal Dyos aj Juda xittzaq'we'n te:
—Lay b'ent tu'n nxi'ye' tuk'i'la, ex lay chin okxe' toju' tjaya, ex mixti' tu'n nwane' ex tu'n nk'wan a'ye' tuk'i'la toju' najb'il lu; 17qu'n tzaj tchik'b'a'nxi'x Qman Dyos weye': Lalun txi' twana wab'j exju' a' tza'lu, ex lalun tz'anj ti'ja tojxu' b'e jasaja'ya, chi Dyos weye', chij.
18Ilxi'xtzunti'j tu'nju' tijwnaq, xitma'n te:
—Ikx t-sanjelal Dyos qinwe' kse'nxta, ex matzaj tma'n jun tanjl Qman Dyos weye' tu'n txiwiq'i'na njaye' ex tu'n txinq'o'ne' twaya ex tk'wa'ya, chij.
Maskyepe' naq jawtchanju' tijwnaq, 19xi'ju' t-sanjelal Dyos aj Juda tuk'i'l, wan ex k'wan tuk'i'l toj tja. 20Tetzunj q'uqliqe'k ti'j mes, yolin Qman Dyos teju' t-sanjelal Dyos tijwnaq aju' anjtz anjsante ti'ju' t-sanjelal Dyos aj Juda, 21ex tmaju' tijwnaq tuk'i'l tq'ojq'ojel twi' kuw te ikjalu:
—Matxi' tma Qman Dyos tu'n tpaj mixti'x xxitb'i'na tchaq'b'il tzaj tma'n teya, 22matz'anjtzti'ja tu'n twana ex tu'n tk'wana jaxa'tma'n Qman Dyos teya tu'n lalun tb'inchaya, lay ku'x mqu'na toju' muqb'il kye ojtxi' tyajilb'ena, chij.
23Atzunj tb'aj wan ex tb'aj k'wanju' t-sanjelal Dyos aj Juda, jaw tq'o'n t-sanjelal Dyos tijwnaq t-xalmiju' tb'ur, 24xi'tzun t-sanjelal Dyostz aj Juda. O'kxtzun tetz jun b'alun ti'j toj b'e ex majxkub' b'yo'n tu'n, kyej tz'aqiju' t-xmilal toj b'e. Atzunju' b'ur exju' b'alun axtzu' e'kyaja'ten tk'etzju' anmi. 25Eb'jik'tzun jte' ichan atzu' ex kyilju' anmi woqli toj b'e, ex axtoqtzu' ta'ju' b'alun tk'etz. Tetzunj kypon toju' nintnam janajla' t-sanjelal Dyos tijwnaq, xikyoli'nju' ojetoq kyil. 26Tetzunj tb'inte t-sanjelal Dyos tijwnaqju' anjtz anjsante ti'ju' juntl, jaw lab'ti: Ate t-sanjelal Dyosju', ju' mixti' xitb'i'nju' tchaq'b'il Qman Dyos. Qu'mtzun matxi' txitq'o'n Qman Dyos te jun b'alun tu'n tkub' tzaqu'n ex matxi' kub' tb'yo'n, kse'nxu' tma Qman Dyos te, chij.
27Xitma'ntzuntz kyeju' tk'wal tu'n tjaw kyq'o'n t-xalmi jun b'ur, ex kyb'incha ikju'. 28Xi'tzu'n t-sanjelal Dyos tijwnaq ex knetju' anmi tu'n kub'ni tz'aq toj b'e, atitoqju' b'ur exju' b'alun tk'etz. Na'mxtoq txi' tch'yo'n B'alunju' anmi ex na'mxtoq tkub' ttzaqu'nju' b'ur. 29Jawtzun tiq'i'n t-sanjelal Dyos tijwnaq t-xmilalju' t-sanjelal Dyos aj Juda, ex jawx tq'o'n tib'aju' b'ur ex anjti'j tuk'i'l toju' ninttanam, tu'n tkub' twitz'le'n ex tu'n tku'x tmqu'n.
30Ku'x tmqu'n toju' tmuqb'il teku', ex oq' ti'j, intoq tma'n:
¡Qab'anx twitza witz'in! chij.
31Tb'ajku'xlenxi'tzun tmqu'n, xitma'n kyeju' tk'wal:
—Ajnkyime', axtzu' chin b'elexa' kymqu'ne' tojxju' muqb'il ja xku'xa' nmqu'ne' ichan tmajin Dyos lu. Junx chin b'elexa' kymqu'ne' tk'etz, 32qu'n ilti'j tu'n tjapunju' yol tzaj tma'n Qman Dyos te tu'n tmante ti'ju' q'olb'eb'l B'etel ex kyi'j kykyaqilju' ja te witzleb'i'n kyoju' nimaqtnam toj Samarya.
33Tu'npetzunju' lu, mixti' kyej tq'o'n Jerob'oam tchwinqlal myab'a'n, e'oktq'on jumajtlu' pale kyoju' tnam tu'n kyten toju' ja te witzleb'in. Alkyetoq b'a'n toj twitz, intoq che t-xjansa'n Jerob'oam tu'n kyok te pale kyoju' ja te witzleb'i'n. 34Tu'ntzun tpaju' tb'inchb'aj Jerob'oam lu, eb'inchan ilju' tk'wal, tu'ntzunju' majx b'aja' kyyajajil tejumajx.
Currently Selected:
1 R 13: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999