رِسَالَةْ فِيلِبِّي 2
2
الْفَصْلْ التَّانِي
التَّوَاضُعْ وْالْعَظَمَة دْيَالْ الْمَسِيحْ
1وْمَا دَامْ كَايْنْ التَّشْجِيعْ فْالْمَسِيحْ، وْكَايْنَة الْمْوَاسْيَة فْالْمْحَبَّة، وْكَايْنَة الشّْرْكَة فْالرُّوحْ الْقُدُسْ، وْكَايْنَة الْمْحَنَّة وْالرَّحْمَة، 2إِيوَا زِيدُو كَمّْلُو الْفَرْحَة دْيَالِي، وْكُونُو عْلَى رَأْيْ وَاحْدْ، وْكُونُو مْتَّاحْدِينْ فْالْمْحَبَّة بْقَلْبْ وَاحْدْ، وْفَكّْرُو تَفْكِيرْ وَاحْدْ، 3وْعَمّْرْكُمْ مَا تْدِيرُو شِي حَاجَة بْالْأَنَانِيَّة وْالْإِفْتِخَارْ، وَلَكِنْ بْالتَّوَاضُعْ، فَكّْرُو دِيمَا تْفَضّْلُو غِيرْكُمْ عْلَى رَاسْكُمْ. 4وْحْتَّى وَاحْدْ مْنّْكُمْ مَا يْفَكّْرْ غِيرْ فْمْصْلَحْتُه، وَلَكِنْ حْتَّى فْمْصْلَحْةْ النَّاسْ لْخْرِينْ. 5وْدَاكْشِّي اللِّي كَتْدِيرُوهْ خَاصُّه يْكُونْ بْحَالْ دَاكْشِّي اللِّي دَارُه الْمَسِيحْ يَسُوعْ:
6هُوَ اللِّي كَانْ فْالطّْبِيعَة دْ اللَّهْ،
عَمّْرُه مَا فَكّْرْ يْسْتَغْلّْ الْمْسَاوْيَة دْيَالُه مْعَ اللَّهْ لْمْصْلَحْتُه.
7وَلَكِنْ تّْنَازْلْ عْلَى الْقِيمَة دْيَالُه،
وْخْدَا الطّْبِيعَة دْيَالْ عَبْدْ،
وْوْلَّى فْصُورْةْ بْنَادْمْ،
وْتّْعْرَفْ بْحَالْ بْنَادْمْ بِينْ النَّاسْ.
8تْوَاضْعْ وْطَاعْ حْتَّى لْلْمُوتْ،
الْمُوتْ عْلَى الصّْلِيبْ.
9هَادْشِّي عْلَاشْ رْفَعْ اللَّهْ مْقَامُه،
وْعْطَاهْ إِسْمْ فُوقْ مْنْ كُلّْ إِسْمْ،
10بَاشْ تْسْجَدْ لْإِسْمْ يَسُوعْ كُلّْ رْكْبَة،
فْالسّْمَا وْعْلَى الْأَرْضْ وْتَحْتْ الْأَرْضْ،
11وْيْعْتَرْفْ كُلّْ لْسَانْ بْلِّي يَسُوعْ الْمَسِيحْ هُوَ الرَّبّْ،
بَاشْ يْبَانْ الْعَزّْ دْيَالْ اللَّهْ الْآبْ.
ضَوِّيوْ وَسْطْ النَّاسْ بْحَالْ الضُّو فْالدّْنْيَا
12إِيوَا آ خُوتِي الْعْزَازْ، كِمَا كْنْتُو دِيمَا كَتْطِيعُونِي، هَاكْدَا دَابَا خَاصّْكُمْ تْطِيعُونِي كْتَرْ، مَاشِي غِيرْ وْأَنَا حَاضْرْ، وَلَكِنْ حْتَّى وْأَنَا غَايْبْ، وْدِيرُو جَهْدْكُمْ بَاشْ تْكَمّْلُو النّْجَا دْيَالْكُمْ بْالْخُوفْ وْالطَّاعَة. 13حِيتْ اللَّهْ هُوَ اللِّي كَيْخْدَمْ فِيكُمْ بَاشْ تْبْغِيوْ وْتْدِيرُو دَاكْشِّي اللِّي كَيْرْضِيهْ.
14دِيرُو كُلّْشِي بْلَا مَا تّْشْكَّاوْ وْبْلَا مَا تْخَاصْمُو عْلَى بْعْضِيَّاتْكُمْ، 15بَاشْ تْكُونُو بْلَا لُومْ وْنْقِيِّينْ. وْتْكُونُو وْلَادْ اللَّهْ، مَا فِيكُمْ حْتَّى عِيبْ فْوَسْطْ جِيلْ حْيَاتُه فَاسْدَة، وْتْضَوِّيوْ وَسْطْ النَّاسْ بْحَالْ الضُّو فْالدّْنْيَا، 16وْنْتُمَ تَابْتِينْ فْكْلَامْ اللَّهْ اللِّي كَيْعْطِي الْحَيَاةْ، وْهَكَّا غَنْفْتَخْرْ فْالنّْهَارْ اللِّي غَيْرْجَعْ فِيهْ الْمَسِيحْ، حِيتْ مَا جْرِيتْشْ بْلَا فَايْدَة وْمَا ضْرَبْتْشْ تَمَارَة عْلَى وَالُو. 17وَلَكِنْ رَاهْ حْتَّى إِلَا كْنْتْ بْحَالْ الزِّيتْ الْمْعَطّْرْ مْخْوِي عْلَى الدّْبِيحَة دْ الْخْدْمَة دْيَالْ إِيمَانْكُمْ، غَنْكُونْ فْرْحَانْ وْغَنْفْرَحْ بْزَّافْ مْعَاكُمْ كَامْلِينْ. 18إِيوَا هَكَّا فْرْحُو وْسَعْدُو حْتَّى نْتُمَ مْعَايَ.
تِيمُوتَاوُسْ وْأَبَفْرُودِيتُسْ
19كَنْتّْمَنَّى بْمُرَادْ الرَّبّْ يَسُوعْ، نْصِيفْطْ لِيكُمْ تِيمُوتَاوُسْ دْغْيَا بَاشْ نْفْرَحْ إِلَا عْرَفْتْ خْبَارْكُمْ. 20حِيتْ مَا عَنْدِي حَدّْ بْحَالُه اللِّي كَيْدِّيهَا فِيكُمْ بْقَلْبْ صَافِي. 21عْلَاحْقَّاشْ كُلّْشِي كَيْقَلّْبْ غِيرْ عْلَى مْصْلَحْتُه، مَاشِي عْلَى الْأُمُورْ دْيَالْ يَسُوعْ الْمَسِيحْ. 22أَمَّا تِيمُوتَاوُسْ، رَاكُمْ كَتْعَرْفُو الْحْوَايْجْ اللِّي دَازْ مْنّْهُمْ، عْلَاحْقَّاشْ خْدَمْ مْعَايَ بْحَالْ الْوَلْدْ مْعَ بَّاهْ بَاشْ يْزِيدُو النَّاسْ يْسَمْعُو عْلَى الْإِنْجِيلْ. 23هَادَا هُوَ اللِّي كَنْتّْمَنَّى نْصِيفْطُه لِيكُمْ مْلِّي نْعْرَفْ أَشْنُو غَيْجْرَا لِيَّ. 24وْرَاهْ عَنْدِي التِّقَة فْالرَّبّْ بْلِّي حْتَّى أَنَا قْرِيبْ نْجِي لْعَنْدْكُمْ.
25وَلَكِنْ شْفْتْ بْلِّي خَاصّْنِي نْصِيفْطْ لِيكُمْ خُويَا فْالْإِيمَانْ أَبَفْرُودِتُسْ، اللِّي عَاوْنِّي فْالْخْدْمَة وْكَافْحْ مْعَايَ، وْاللِّي صِيفْطْتُوهْ لْعَنْدِي بَاشْ يْعَاوْنِّي فْدَاكْشِّي اللِّي كَنْحْتَاجْ لِيهْ. 26رَاهْ كَانْ مْشْتَاقْ بْزَّافْ يْشُوفْكُمْ كَامْلِينْ، وْكَانْ مْغْمُومْ عْلَاحْقَّاشْ سْمَعْتُو بْالْمَرْضْ دْيَالُه. 27حِيتْ كَانْ مْرِيضْ وْقْرِيبْ يْمُوتْ، وَلَكِنْ اللَّهْ شَافْ مْنْ حَالُه، وْشَافْ مْنْ حَالِي حْتَّى أَنَا بَاشْ مَا نْزِيدْشْ هَمّْ عْلَى هَمّْ. 28عْلَى هَادْشِّي صِيفْطْتُه لِيكُمْ دْغْيَا، بَاشْ مْلِّي تْشُوفُوهْ تْفَرْحُو مَرَّة خْرَى وْيْنْقَصْ عْلِيَّ الْهَمّْ. 29إِيوَا رَحّْبُو بِيهْ بْالْفَرْحَة بْحَالْ خُوكُمْ فْالرَّبّْ، وْتّْهَلَّاوْ فْكُلّْ وَاحْدْ بْحَالُه، 30عْلَاحْقَّاشْ عْلَى وْدّْ الْخْدْمَة دْيَالْ الْمَسِيحْ كَانْ قْرِيبْ يْمُوتْ، وْغَامْرْ بْحْيَاتُه بَاشْ يْكَمّْلْ دَاكْشِّي اللِّي كَانْ نَاقْصْ فْخْدَمْتْكُمْ لِيَّ.
Currently Selected:
رِسَالَةْ فِيلِبِّي 2: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved