يُوحَنَّا اللّْوّْلَى 1
1
الْفَصْلْ اللّْوّْلْ
كْلْمَةْ الْحَيَاةْ
1هَادَاكْ اللِّي كَانْ مْنْ الْبْدُو، اللِّي سْمَعْنَاهْ وْاللِّي شْفْنَاهْ بْعِينِينَا، اللِّي بَانْ لِينَا مْزْيَانْ وْاللِّي مْسِّينَاهْ بْيْدِّينَا، هُوَ كْلْمَةْ الْحَيَاةْ.#يوحنا 1:1 2هَادْ الْحَيَاةْ بَانْتْ، وْحْنَا شْفْنَاهَا وْكَنْشَهْدُو لِيهَا وْكَنْخَبّْرُوكُمْ بْالْحَيَاةْ الدَّايْمَة اللِّي كَانْتْ عَنْدْ الْآبْ وْبَانْتْ لِينَا.#يوحنا 1:14 3دَاكْشِّي اللِّي شْفْنَاهْ وْسْمَعْنَاهْ كَنْخَبّْرُوكُمْ بِيهْ، بَاشْ تْكُونْ عَنْدْكُمْ حْتَّى نْتُمَ الشّْرْكَة مْعَانَا. وْالشّْرْكَة دْيَالْنَا رَاهَا مْعَ الْآبْ وْمْعَ الْوَلْدْ دْيَالُه يَسُوعْ الْمَسِيحْ. 4وْكَنْكَتْبُو لِيكُمْ هَادْ الْأُمُورْ بَاشْ تْكُونْ الْفَرْحَة دْيَالْنَا مْكْمُولَة.
اللَّهْ نُورْ
5وْهَادِي هِيَ الْخْبَارْ اللِّي سْمَعْنَاهَا مْنْ يَسُوعْ الْمَسِيحْ وْكَنْخَبّْرُوكُمْ بِيهَا: اللَّهْ نُورْ وْمَا فِيهْشْ الضّْلَامْ ݣَاعْ. 6إِلَا ݣْلْنَا بْلِّي عَنْدْنَا الشّْرْكَة مْعَاهْ وْحْنَا كَنْعِيشُو فْالضّْلَامْ، رَاهْ كَنْكَدْبُو وْمَا كَنْدِيرُوشْ بْالْحَقّْ. 7وَلَكِنْ إِلَا كْنَّا كَنْمْشِيوْ فْالنُّورْ كِمَا اللَّهْ حْتَّى هُوَ فْالنُّورْ، غَتْكُونْ عَنْدْنَا الشّْرْكَة مْعَ بْعْضِيَّاتْنَا، وْالدّْمْ دْيَالْ يَسُوعْ الْمَسِيحْ وَلْدُه كَيْطَهّْرْنَا مْنْ ݣَاعْ الدّْنُوبْ. 8إِلَا ݣْلْنَا بْلِّي مَا فِينَا حْتَّى دَنْبْ، رَاهْ كَنْغَلّْطُو رْيُوسْنَا وْمَا كَنْدِيرُوشْ بْالْحَقّْ. 9وْإِلَا عْتَرْفْنَا بْدْنُوبْنَا رَاهْ اللَّهْ أَمِينْ وْكَيْحْكَمْ بْالْعَدْلْ، وْغَيْغْفَرْ لِينَا دْنُوبْنَا وْغَيْطَهّْرْنَا مْنْ كُلّْ إِتْمْ. 10إِلَا ݣْلْنَا بْلِّي عَمّْرْنَا مَا دْنَبْنَا، رَاهْ كَنْرَدُّو اللَّهْ كْدَّابْ وْكْلَامُه مَا فِينَاشْ.
Currently Selected:
يُوحَنَّا اللّْوّْلَى 1: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved