ŊAƁTA 36
36
Telda tam guro-boy sa yaw vocota kay sli sa hay jaf mara'ɗi
1Sum sa ŋulona kuɗ jafna vi Galaad, gurona vi Makir, gurona vi Manase, jar jafna vi gurona vi Yosef, nisi co'o law vok Musus hiɗi sa ŋulona kuɗ jafna vi gurona vi Israyel kafe. 2Nisi di'e: Ma-Vatɗin di taŋ ala naŋ ma ɓuraw nagat kuɗ ɦayta, vula' voco'o mi gurona vi Israyel. Ma-Vatɗin vulaŋ hagat kaw ala naŋ ma vul vocota vi ɓasuma'na Selofkad, mi guro-boyna valamu. 3Wulin kayni la nisi sli sa mara'a ma kuɗ jaf hena vi gurona vi Israyelawa, vocota visi ta hay jafna vi busit tay loɗi, na' ma tap ɗawn jar vocota vi jaf ma nisi muɗi goy hayamna; ki kayn nala vocota vuma'a ta ŋaɓta kuɗ ɦayta vula' muma'ta muɗ ɗawn kiɗaya. 4Hay li ma busata vi firita vi gurona vi Israyel coowa, ir vocota visi tap ɗawn jar jaf ma nisi yawi goy hayamna nala vocota vi buma' muɗ ɗawn kiɗaya.
5Ki kayn nala, Musus vul dita vi Ma-Vatɗin tam gurona vi Israyel, nam disiya: Dita vi jafna vi gurona vi Yosef hay liya'a. 6Kayni mi va ma Ma-Vatɗin di'e kay guro-boyna vi Selofkad: Nisi as sli sa ki nisi min nala, may ma li mi sa ma hay jafna vi busiya. 7Vocota vi sum sa Israyella as fokis hay jaf hena kay jok hay jaf maraɗi, may gigekaw ma wa' ti vocota valam hay jafna vi sumiyamu. 8Goot-cat tarige kaw, la voco ka hay ba'a jar jafna vi gurona vi Israyel, na' ma slum mi sa ma hay jafna vi bu'a, kay gurona vi Israyel gigekaw ma mus hiɗi vocota vi sumiyamu. 9Voco tarige kaw as fokis hay jaf hena kay jok hay jaf maraɗi. May gigekaw ma wa' ti vocota valam hay jafna vi sumiyamu.
10Guro-boyna vi Selofkad li kuɗ va ma Ma-Vatɗin dum mi Mususna. 11Mahla, Tirsa, Hogla, Milka hiɗi Nowa, guro-boyna vi Selofkad, yawsi si gurona vi ɓosiyom busina; 12yawsi si sum sa hay jafna vi gurona vi Manase goora vi Yosef, ki kayn nala vocota visi hin hay jafna vi busiya.
13Lakŋi mi vun-ma-gatna hiɗi gatta mara'a mara'a ma Ma-Vatɗina vulum mi Musus kay nam ɗekem tam sa Israyella, hay fulda vi Mowab, goboy hiɗi Yordan, ɗiger vok Yeriko.
Currently Selected:
ŊAƁTA 36: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001